Bakakuyata 18 - Libuka Lya Kuyela

Mika na mishobo ya Ndani

¹ Ha shikati shiyo kwabulile mwene mu Ishalela. Mu matena owo mushobo wa Ndani washingilenga litunga lya kuzika. Ndaba oho shilolokale batambule litunga lyabo hakati ka mishobo ya Ishalela.

² Nohobene mushobo wa Ndani bahatile balume mutanu ba kukanca hakati ka balupashi lwabo mu mushobo, pe babatumine ku minzi yaku Zola naku Eshitawolu na kubafundiziza kuhokela litunga lya kwikala. Nohobene bayile ku litunga lya binkanda lya Efulemu na kutulila ku litala lya Mika.

³ Aha bekalilenga kuyo, batoshele nyambilo ya ndumbana wa Kalevi, nohobene bayile kukwendi pe bamwipwile ngayi, “Kati uli na kutenda bishini kuno? Yani wakuleta kuno? Uli na kutenda mulimo ngani kuno?”

⁴ Wakumbwile ngayi, “Naliyuvwashana na Mika nili mukankombela wendi, pe wampananga ncuungu.”

⁵ Bambile kukwendi ngayi, “Obe minetu, nyepa kuli Nyambi, ndi tukuya na kuwana kwakuzika ha uno mukala wetu.”

⁶ Mukankombela wakumbwile ngayi, “Mufwasho shuma sha kulikekulaho. Nyambi ya Ngula uli na kumifulankana ha uno mukala.”

⁷ Nohobene balume mutanu bakatukile, bayile ku munzi wa Laisha. Bamonene bantu eshe bekala shiwahe, ngo Bashindoni. Bengile bantu ba ku mwena na mpoza. Nakubula nkani na muntu, kwabula nebye bashinga. Bazikile kwakutali na Bashindoni, kami kaliha bekalile shibi na bantu bamina.

⁸ Oho balume mutanu babokele ku Zola naku Eshitawolu, bawushinda wabo babepwile ngayi, “Mukututongweza bishini oku mwayile?”

⁹ Bakumbwile ngayi, “Katukenu tuyenunga. Tukalwishe Laisha. Twakamona litunga nilyo linengi lyaliwahe shikuma. Hinga mwikala kuno nahiya na kubula bya kutenda. Tunyankupenu! Tuyeko na kulishimba.

¹⁰ Oho mu kuya, mukawana ngayi bantu bekala mu mpoza. Nilyo linengi litunga lyalinene, Nyambi unamipanikilyo, kami lili na byuma nimwabyo ebye ashinga muntu.”

¹¹ Nohobene balume 600 ba ku mushobo wa Ndani bafumine ku Zola naku Eshitawolu baliwahishilile bya kulwa.

¹² Bayile mu kutulila ku mponci ya Kiliyati Yeyalima wa Yunda. Nisho shiya bashili kutoyela mwanya uyo ngayi munkungwa wa Ndani

¹³ Oho bafumine kuyo bayile na kukakuma ku litala lya Mika, mu litunga lya binkanda lya Efulemu.

¹⁴ Niho balume mutanu aba bayile mu kuhokela litunga lya zinguluka Laisha, bambile ku baminabo ngayi, “Munalimuku ngayi hakati ka nawa matala hali litala lili na kanankishi ka shitondo kakufwika shiliva ndi? Muli tunankishi twamina kami na kakobelo kakepi kashizila. Haya tuhanganikenu eshe twafwanina kutenda.”

¹⁵ Nohobene bayile ku litala lya Mika oku kwekalilenga ndumbana wa Kalevi, niho bamwipwile kupinduka kwendi.

¹⁶ Ha shikati shiya bene baya banzita 600 ba Ndani, aba baliwahishilile bya kulwa, bemanine ku lipangati.

¹⁷ Bakakuhokela mutanu bapitakanine tuhu kwingina mu litala. Pe bashimbile kanankishi ka shitondo kakufwika na shiliva na tunankishi twamina na kakobelo kakepi kashizila na kanankishi kakuyungulula mukankombela hinga emana ku lipangati hamo na banzita 600.

¹⁸ Oho balume benginine mu litala lya Mika, bashimbile byuma bya shizila hamo na kanankishi ka shitondo kakufwika na shiliva na kakobelo kakepi kashizila na tunankishi twamina na kanankishi kakuyungulula. Pe mukankombela wabepwile ngayi, “Muli na kutenda bishini?”

¹⁹ Bamukumbwile ngayi, “Mwena! Hinga wamba kami. Tuyenga nobe pe ukenga mukankombela na nkongo wetu. Kati kushinga kwinga mukankombela wa mushobo nimwawo ha lupashi lwa Ndani mu Ishalela ufwako ndi? Ukushinga tuhu kwinga mukankombela wa lupashi lumo na muntu umo.”

²⁰ Pe mukankombela wawahililile shikuma, nohobene wa shimbile byuma bya shizila pe wayile nabyo.

²¹ Batengulukile pe bayile ha mukala wabo, batwamikile bana babo na bimuna babo na byuma byabo kumbili.

²² Oho bendakale mukala wawutali ha kufuma ku litala, Mika walobele bandambo bendi kuya mu kulwa nzita. Balambashanine balume ba ku Ndani, pe babawanine,

²³ pe bababilikizile. Bantu ba ku Ndani batengulukile, bepwile Mika ngayi, “Shambo ngani muli nasho? Elye likunge nimwalyo lya bishini?”

²⁴ Mika wakumbwile ngayi, “Bishini mukwambila noho ngayi, ‘Shambo ngani muli nasho?’ Nka munashimbi mukankombela wami na banyambi baya nabaza munezi nabyo! Haya nashala na bishini?”

²⁵ Bantu ba ku Ndani bambile ngayi, “Shafwanina tuhu kukwobe ku mwena na kubula kwamba, ndelewa ukushinga tuhu aba balume ubapilamishe na kukulwisha. Niho obe na ba lupashi lyobe nimwabo mwanga mufwe.”

²⁶ Niho bantu ba Ndani bayile nzila yabo. Mika oho amonene ngayi bengile bangovu shikuma kukwendi, nohobene watengulukile na kuboka ku munzi.

²⁷ Oho bantu ba ku Ndani bashimbakale byuma biya atendele Mika na mukankombela wendi, niho bakatukilile mutakwe Laisha. Munzi uya wekalile mu mpoza na bantu ba ku mwena. Munzi ou wekalile mu mukulo wa Mbetilehombi. Banzita ba Ndani bazihile bamwine litunga na kuhokesha munzi.

²⁸ Kwabulile muntu wakubalamwina ndaba Laisha wekalile kwakutali na Shindoni, pe kaliha bengile shikonzi na bantu bamina. Munzi wekalile mu mukulo wa Mbeti Lehombu. Bantu ba ku Ndani batendulwile munzi, pe bazikile kuyo.

²⁹ Niho bafutwile lizina lya munzi wa Laisha ku yaka ngayi Ndani, lizina lya nkaka yabo Ndani mwana Yakobo.

³⁰ Bantu ba ku Ndani bemikile kaya kanankishi ngayi bakalemeshenga, pe Yonatana mwana Ngeshoma, muzukulya Moshesha, watendelenga mulimo kwinga mukankombela ku mushobo wa Ndani na bazukulyendi bengile bakankombela babo hantu noho bantu batwaliwile mu wuntapwa.

³¹ Kanankishi ka Mika kashalile mu munzi wa Ndani hinga kemana, shikati nimwasho shiya yekalilenga ntanda yakulemeshela Nyambi ya Ngula ku Shilo.