Bakakuyata 17 - Libuka Lya Kuyela

Banyambi ba Mika

¹ Kwekalile mulume lizina lyendi Mika ou wekalilenga mu litunga lya binkanda lya Efulemu.

² Wambile kuli mandiyendi ngayi, “Oho mwizi ayiba awa mali 1, 100 a muwayawaya wa shiliva, wakutilenga uya mwizi. Nayuvwako oho wabezanga. Mona tuhu, mali ali kukwami. Amibene na shimbawo.” Mandiyendi wambile ngayi, “Nyambi ya Ngula mwanga akufuywele, obe mwanami!”

³ Wabweshele muwayawaya wa shiliva myanda likumi na umo kuli mandiyendi, pe mandiyendi wambile ngayi, “Nikukanisha mwanami ngayi hinga akawula mbeza, amimwine nili na kulibeza na kufungwila muwayawaya wa shiliva kuli Nyambi ya Ngula. Atendeshiwe ha kanankishi ka shitondo na kanankishi kakuyungulula ka shiliva. Haya nikabwesha mali a shiliva kukwobe.”

⁴ Niho abweshele shiliva kuli mandiyendi. Mandiyendi washimbile myanda yibili ya muwayawaya wa shiliva pe wapanikile ku mfuzi ou watendele kanankishi kakubaza ha shitondo na kukafwika na shiliva na kanankishi kakuyungulula ka shiliva. Twayakiwile mu litala lya Mika.

⁵ Ou mulume Mika wekalile na mwanya wa ninkayendi wakulemeshela. Watendele tunankishi twamina na kakobelo kashizila, pe wemikile umo ha bana bendi babalume kwinga mukankombela wendi.

⁶ Ku shikati shiyo kwabulile mwene mu Ishalela. Bantu nimwabo batendelenga mwaya mitima yabo.

⁷ Haya ha shikati shimo, kwekalile ndumbana wa Kalevi ou wekalilenga mu munzi wa Mbetelehema mu Yunda.

⁸ Wafumine ku munzi wa Mbetelehema mu Yunda kuya na kushinga mwanya wamina wa kuzika. Aha ekalilenga na kwenda, wakumine ku litala lya Mika mu litunga lya binkanda lya Efulemu.

⁹ Mika wamwipwile ngayi, “Kati ukufuminina kuti?” Wakumbwile ngayi, “Nili Kalevi waku Mbetelehema mu Yunda. Nilinakushinga mwanya wa kuzika.”

¹⁰ Mika wambile ngayi, “Nikale nobe hamo. Winge nkongo wami na mukankombela wami, pe nika kupanikanga likumi lya mali a muwayawaya ha mwaka na kukuvwalikanga, hamo na kukulisha.”

¹¹ Ndumbana wa Kalevi wetabilile kwikala na Mika, pe wafutukile tuhu ngonehi mwanendi.

¹² Mika wamwimikile kwinga mukankombela wendi pe wekalilenga ku munkanda wa Mika.

¹³ Mika wambile ngayi, “Haya nikulimuka ngayi Nyambi ya Ngula ukanyendeshela byuma shiwahe, ndaba nili na Kalevi ou wengakale mukankombela wami.”