Bakakuyata 16 - Libuka Lya Kuyela

Shamishoni ku Nganza

¹ Shamishoni wayile ku Ngaza, oku akalihanganine na mbuyama walwiholwiho, pe walalile nendi.

² Bantu ba ku Ngaza babatongwezele ngayi Shamishoni unezi, nohobene bazingulukile munzi na kumubelamina wushiku nimwawo na kulyambisha nibo bamwine ngayi, “Tukamubelamina hantu mutena unatutiki, pe tukamuzihe.”

³ Ngoboni Shamishoni walanganine kutwala na mukati ka wushiku. Niho apindukile kami wanyenkanishile lipangati lya ku munzi pe wazukwile bikwiliti na bihala na tupatisho nimwabyo. Wabiyakile ha bifuzi byendi pe wabitwalile kuyilu ya lipili oho Hembuloni hamoneka.

Shamishoni na Ndelila

⁴ Kufumoho, Shamishoni walihakile na mbuyama wamu Mukulo wa Sholeki, lizina lyendi Ndelila.

⁵ Bamyene ba Bafwilishitina mutanu bayile kuli Ndelila, pe bambile ngayi, “Katekenyeshe Shamishoni ngayi akakutongweze aha hemana ngovu zendi, kami naneshe tukutwesha kumukoneneka. Pe muntu na muntu ukakupana 1,100 muwayawaya wa shiliva.”

⁶ Nohobene Ndelila wambile kuli Shamishoni ngayi, “Mbayi, ntongweze shumangani wekalila na ngovu nehe. Ndi muntu ukushinga kukumanga na kukukoneneka, pe ukutenda nahiti?”

⁷ Shamishoni wambile ngayi, “Ndi ba kumangisha na mikunzi yaha bipando bya mukunzi mutanu na yibili yiya ya kubula kuyuma, nikenga wakupopa ngonehe bantu bamina.”

⁸ Nohobene bamyene ba Bafwilishitina baletelele Ndelila mikunzi yaha bipando bya mukunzi mutanu na yibili ya kubula kuyanika, pe wamangishileko Shamishoni.

⁹ Mbuyama wekalile na balume bamo aba babelamininenga mu kampenci kamo, niho abilikizile ngayi, “Shamishoni! Bafwilishitina bali na kwiza!” Ngoboni waketwile mikunzi yaha bipando bya mukunzi ngonehe bishuta binakwata mundilo na kuhoka. Nohobene kaliha balimukile nyala zendi aha zaholama.

¹⁰ Ndelila wambile kuli Shamishoni ngayi, “Haya mona tuhu, uli na kuncengwiza na kunyongeza. Mbayi, ntongweze eshe muntu aku fwanina kukumanga.”

¹¹ Wamutongwezele ngayi, “Ndi ba kumangisha na nyimbwa zazipya za kupohela ziya babulu kutendesha, pe nikabula ngovu ngonehe bantu bamina.”

¹² Nohobene Ndelila wawanine nyimbwa zazipya za kupohela wamumangishilezo. Niho abilikizile ngayi, “Shamishoni! Bafwilishitina bali na kwiza!” Balume babelamininenga mu kampenci kamina. Ngoboni Shamishoni waketwile nyimbwa ha mikoko yendi ngonehe bishuta.

¹³ Ndelila wambile kuli Shamishoni ngayi, “Ushili kuncengwiza na kunyongeza. Ntongweze eshe muntu aku fwanina kukumanga.” Wamutongwezele ngayi, “Ndi ukushinta mancunkili wami a huki mutanu na abili ha bitondo bya kutungila makwiza na kuwashumisha na mpimpi, pe nikabula ngovu ngonehe bantu bamina.”

¹⁴ Niho Ndelila abengezekele Shamishoni, pe walanganine, washimbile mancunkili wendi mutanu na abili, pe wawashintilile ha bitondo bya kutungila makwiza na mbambo. Wamushumishile na mpimpi, pe wabilikizile ngayi, “Shamishoni! Bafwilishitina bali na kwiza!” Ngoboni wapindukile, oho akokele huki zendi niho bitondo bya ku shintila byazukukile.

¹⁵ Nohobene wambile kukwendi ngayi, “Kati shumangani ukwambila ngayi nikuku haka, oho ku haka ufwako? Wancengwizakale bikati hibihatu, pe ushili kukana kuntongweza eshe sha kupana ngovu.”

¹⁶ Ndelila wamwikalikile shimpihi ha mutena ha mutena. Shamishoni wanyikwile na kukwanga ha kwonzela kumukabakanisha ha shuma osho,

¹⁷ haya, niho amanishile kumutongweza kupwisha ngayi, “Huki zami hinga zatanga ku shehiwa. Nafunguliwila kuli Nyambi ya Ngula ngonehe Kanazaleta kubalika ku shikati nahemuwile. Shinga huki zami zashehiwilenga, shinga nyala zami zapupuka kwinga ngonehe bantu bamina.”

¹⁸ Oho Ndelila amonene ngayi unamutongweze kupwisha, watumine lizu ku bamyene ba Bafwilishitina pe wambile ngayi, “Bokenu shikati shimo kami. Unantongweze kupwisha.” Niho bezile pe bashimbile mali.

¹⁹ Ndelila wabengezekele Shamishoni kulangana ha bilama byendi ngayi aye mutulo, pe wehanine muntu mu kusheha mancunkili mutanu na abili niho atatikile kumushonkashonka, ngoboni nyala zendi zamanine.

²⁰ Ndelila wabilikizile ngayi, “Shamishoni! Bafwilishitina bali na kwiza!” Shamishoni watonene na kuhanganika ngayi, “Nikalishobola, pe nikuya lubilo ngonehe atendanga bikati nimwabyo.” Kaliha walimukile ngayi Nyambi ya Ngula unamushiyi.

²¹ Bafwilishitina bamukwatile na kumutiba meho. Bamutwalile ku Ngaza, bamumangishile na nketwana za lubemba. Wayakiwile ku mulimo wakutwa ku nkunzu mu tolongo.

²² Ngoboni huki zendi kami zatatikile kukula kami.

Lufu lwa Shamishoni

²³ Bamyene ba Bafwilishitina bezile hamo ku shimbo sha kukombelela kuli nyambi yabo Ndangoni. Bembilile ngayi, “Nyambi yetu unatupana ngovu za kukoma kamalamo wetu Shamishoni!”

²⁴ Bantu oho bamumonene bembilile na kuyemeza nyambi yabo ngayi, “nyambi yetu unatupana ngovu za kukoma kamalamo wetu ou wabipishile litunga lyetu kami wazihile babengi hakatiketu.”

²⁵ Pe oho balikuwilenga na ku wahilila mu mitima yabo, pe bambile ngayi, “Yihanenu Shamishoni ngayi mwanga atuhepeshe!” Oho batutwishile Shamishoni mu tolongo, bamwimikile mukati ka zimpangwa ngayi mwanga abahepeshe.

²⁶ Shamishoni wambile kuli ndumbana ou wamwendeshelenga hinga amukwatilila ku liboko ngayi, “Ndehe taha nikwate ku zimpangwa eze za shumisha litala. Nikushinga kuyendaminaho.”

²⁷ Mu litala mwabunganine balume na bambuyama. Nimwabo bamyene ba Bafwilishitina mutanu bekalile kuyo, kami kwekalile balume na bambuyama ba kukuma 3,000 ha shiluli na ku shembuka Shamishoni habahepesha.

²⁸ Shamishoni wehanine kuli Nyambi ya Ngula na kulombela ngayi, “Obe Mwene Nyambi ya Ngula, nyanuke nikulomba, obe Nyambi hekulu, umpane nyala za kupitakana kamo tuhu, nohobene ngayi naneye nkoni yimo tuhu nitweshe kubweshela Bafwilishitina ha kutiba meho wami abili.”

²⁹ Nohobene Shamishoni wemanine mukati na kukwata zimpangwa za shumisha litala. Pe wakwatile maboko wendi abili ha zimpangwa nimwazo zibili, wayendaminine wulemu wendi hahazo,

³⁰ pe wabilikizile ngayi, “Ndehenu nifwe hamo na Bafwilishitina!” Wanyakile na ngovu zendi nimwazo, pe litala lyanyemukilile ha baya bamyene mutanu hamo na bantu nimwabo. Wazihile bantu babengi shikuma ha lufu lwendi kupitakana aba azihile ha kuyoya kwendi.

³¹ Bakonzobendi na bawushinda wendi nimwabo bamushimbile na kumubwesha mu kumufunda mukati ka Zola na Eshitawolu, mu shinzimbi sha tatiyendi Manowa. Shamishoni wengile mukakutwaminina wa Ishalela myaka makumi abili.