Bakakuyata 15 - Libuka Lya Kuyela

¹ Oho kwapitile kashikati, ha shikati sha kuteza loto, Shamishoni wayile na kuzingula mukazendi, pe wamutwalilile kana ka mpongo. Watongwezele mukowendi ngayi, “Nikushinga kuya ku kampenci ka mukazami.” Ngoboni tata mbuyama kaliha wamwitabilishile ngayi enginemo.

² Pe tata mbuyama watongwezele Shamishoni ngayi, “Nahanganika ngayi wamukanine, nohobene namuyekiwishile kuli muhoni wobe. Ngoboni mukonzo wendi wamuwahe shikuma kumupitakana. Ukutwesha kumuyeka ngayi ahingemo.”

³ Shamishoni wambile ngayi, “Shikati shino kukekala na shihepwa haneshe nikushinga kutenda ha Bafwilishitina nifwako!”

⁴ Nohobene wayile mu kukwata bamimbwe 300. Wabamangile ku mishila babili babili pe wayakileko lumuni lwa mundilo ha manungilo mukati ka umo na umo.

⁵ Niho ayakile mundilo ku zimuni za mwila, pe walehelele bamimbwe mu mafuba a loto a Bafwilishitina. Kaliha bahokeshele tuhu loto luya lwateziwile, ngoboni na loto luya kami lwekalile mu mafuba. Na mafuba a shinyanca na bitondo bya olive kami byahokele.

⁶ Niho Bafwilishitina bashingile kulimuka ou watendele eshe. Bawanine ngayi Shamishoni watendelesho ndaba mukowendi wa Katimina unayekiwishi mukaza Shamishoni kuli muhoni wendi. Nohobene Bafwilishitina bayile na kuhokesha mbuyama na kumuziha na kuhokesha litala lya tatiyendi.

⁷ Shamishoni wabatongwezele ngayi, “Nohobene aha munatende eshe nikubeza ngayi kukalehasho nifwako hantu naliyumbili!”

⁸ Wabalwishile shikuma nakuzihaho babengi. Niho ayile na kwikala mu linzolongoma lyamu limanya ku Etami.

Shamishoni ukukoma Bafwilishitina

⁹ Bafwilishitina bezile batulilile mu Yunda na kulwisha munzi wa Lehi.

¹⁰ Bantu ba Yunda babepwile ngayi, “Shumangani mu kutulwishila?” Bakumbwile ngayi, “Tunezi mu kukwata Shamishoni ngayi enge ntapwa na kumuyandisha ngonehe atuyandishanga.”

¹¹ Niho bantu ba Yunda ba kulingana 300 bayile ku linzolongoma lyamu limanya lya ku Etami, pe bambile kuli Shamishoni ngayi, “Kati kulimuka ufwako ngayi Bafwilishitina banengi batulela betu ndi? Kati ebye unatendele nehi kukwetu bishini?” Wakumbwile ngayi, “Natende kukwabo, ngonehe eshe batenda kukwami.”

¹² Bamutongwezele ngayi, “Tunezi kuno mu kukumanga, ngayi tutweshe kukupana ku liboko lya Bafwilishitina.” Shamishoni wambile ngayi, “Lihahenu ngayi enu kunziha mufwako.”

¹³ Bambile ngayi, “Byo! Tuli na kukumanga tuhu na kukupana kukwabo. Kukuziha tufwako.” Nohobene bamumangishile nyimbwa zibili zazipya pe bamututwishile mu linzolongoma.

¹⁴ Oho akumine ku Lehi, Bafwilishitina bezile na kwitukila kumbili yendi, hibamubilikiza. Kubazumuka, Moyo wa Nyambi ya Ngula wamushumisha, pe nyimbwa ziya zamangiwile ha mikoko ya maboko zafutukile ngonehe nyimbwa zinahoko ku mundilo, pe bimangisho byawile ku maboko wendi.

¹⁵ Pe wawanine shifupa sha kubombola sha mumbanga wa mbongolo, pe washitolele nakuzihishako bantu 1,000.

¹⁶ Nohobene Shamishoni wembilile lwimbo ngayi, “Na shifupa sha mumbanga wa mbongolo, nazihishiko bantu 1,000, na shifupa sha mumbanga wa mbongolo, nababungiki mishiinzi kwii!”

¹⁷ Oho amanishile kwimbila, wayumbile shifupa sha mumbanga. Mwanya oku kwatendiwilile byuma ebye watumbiwile ngayi Lamati Lehi.

¹⁸ Niho shamishoni wayuvwile linyotwa, nohobene wehanine kuli Nyambi ya Ngula pe wambile ngayi, “Obe wampanine kukoma okwe kwakunene. Haya nili na kufwa ku linyotwa ngayi Bafwilishitina bakubula kwitabila bankwate.”

¹⁹ Niho Nyambi ashinkwilile wina wa hanci kuyo ku Lehi, pe mema atutikilemo. Shamishoni wanwine, pe wapwezulukile. Nohobene lishima lyatumbiwile ngayi Eni Hakikola niko lishili nihano ku Lehi.

²⁰ Shamishoni watwamininine Ishalela ha myaka makumi abili aha balelelenga litunga Bafwilishitina.