Bakakuyata 14 - Libuka Lya Kuyela

Shamishoni na Mbuyama waku Timina

¹ Mutena umo Shamishoni wayile ku Timina, pe wakamonene mbuyama umo wa Kafwilishitina.

² Niho abokele ku munzi pe watongwezele tatiyendi na mandiyendi ngayi, “Ku Timina kwali kankanga umo wa Kafwilishitina nakamvwabulu mutima, yenunga mukamuncimbile, nikushinga ngayi enge mukazami.”

³ Ngoboni tatiyendi na mandiyendi bambile kukwendi ngayi, “Kati shumangani uku fwanina kuyila ku Bafwilishitina bakakubula kwitabila mu kuyekelako mbuyama? Kati kutwesha kuyeka kankanga hakati ka mavumo wetu ufwako, hinge hakati ka bantu betu ndi?” Ngoboni Shamishoni watongwezele tatiyendi ngayi, “Niye muntu nikushinga ngayi mu munyekele, ndaba niye nashingi.”

⁴ Tatiyendi na mandiyendi kaliha balimukile ngayi ou wengile Nyambi ya Ngula watwaminine Shamishoni kutenda eshe, ndaba Nyambi ya Ngula washingilenga nzila ya kulwisha Bafwilishitina, aba balelelenga Ishalela.

⁵ Niho Shamishoni wayile ku Timina hamo na tatiyendi na mandiyendi. Oho bapitilenga kuyo ku mafuba a mikabo ya shinyanca, wayuvwile mwana shimbwi habuluma.

⁶ Kubazumuka Moyo wa Nyambi ya Ngula washumishakale Shamishoni. Pe watabwile shimbwi hakati na maboko wendi, ngonehe mwana mpongo. Ngoboni kaliha watongwezele tatiyendi na mandiyendi eshe atendele.

⁷ Niho Shamishoni ayile kuli mbuyama na kwambola nendi, kami wamushingile shikuma.

⁸ Oho kwapitile matena amashe Shamishoni wabokele kuya na kumukatula. Ha kuboka washanukile mu nzila na ku mona ku shimbwi ou azihile, pe wakomokele ha ku mona ngayi munatulili mpuka hamo na bimbumba bya wushi mu kapumpo ka shimbwi wakufwa.

⁹ Walolele wushi wendi pe wayile na kulya oho ayilenga mu nzila. Wayile kuli tatiyendi na mandiyendi pe wabapanikileko wumo wushi. Bawulile, ngoboni Shamishoni kaliha wabatongwezele ngayi washimbile wushi mu kapumpo ka shimbwi wakufwa.

¹⁰ Tatiyendi wayile ku litala lya mbuyama pe Shamishoni wapingile shimbo. Eshe shengile shiheka hakati ka bandumbana.

¹¹ Oho Bafwilishitina bamumonene, baletele bandumbana makumi ahatu mukwikala nendi.

¹² Shamishoni wambile kukwabo ngayi, “Lehenu nimiyumbe kashau. Ndi mu kutwesha kuntongweza eshe kakutontoloka kano kashau, shilolo matena a shimbo sha shifupawenga mutanu na abili apite, nikamilabila muntu na muntu likwiza lyaliwahe lya kulelema makumi ahatu, kami hamo na likwiza lya kuvwala lyaliwahe lya kulelema makumi ahatu.

¹³ Ngoboni, ndi kutwesha kuntongweza mufwako, pe mukampana bintabwila bya makwiza amawahe a kulelema makumi ahatu hamo na makwiza akuvwala amawahe a kulelema makumi ahatu.” Bambile kukwendi ngayi, “Tutongweze kashau kobe. Shashiwahe tukayuvwe.”

¹⁴ Wambile ngayi, “Ku mukakulya kwafumine shuma sha kulya, ku mukangovu kwafumine shuma shashitobe.” Kunyima ya matena ahatu, bandumbana bakwangile kutontolola kaya kashau.

¹⁵ Ha mutena wawunaa bambile kuli mukaza Shamishoni ngayi, “Bengezeka mukokwobe atutongweze eshe kakutontoloka aka kashau. Ndi ukukana pe tukahokesha litala lya tatiyobe na kukuhokeshela kumo nalyo. Kati nibyo mwakatulobela ubili wenu ngayi mwize mutupukule, kaliha noho ndi?”

¹⁶ Nohobene mukaza Shamishoni wayile kukwendi halila pe wambile kukwendi ngayi, “Shishemo na nami ufwasho! Wanzimba bene! Wayumbile bahoni bami kashau na kubula kuntongweza eshe kakutontoloka!” Wambile kukwendi ngayi, “Mona nabulu kutongweza batate na bamawa. Shumangani eshe nikukutongwezela?”

¹⁷ Wekalile na kulila haneshe shuma ku matena mutanu na abili nimwawo a shimbo. Ngoboni ha mutena wamutanu na abili wamutongwezele kutontoloka kwa kashau, ndaba wamuzaminine shikuma. Niho atongwezele Bafwilishitina.

¹⁸ Nohobene ha mutena wa mutanu na abili, oho shilolo Shamishoni aye mukwingina ku kampenci kaku wulili, bantu baha munzi bambile kukwendi ngayi, “Bishini byatobala kupitakana wushi? Bishini byekala na ngovu kupitakana shimbwi?” Shamishoni wakumbwile ngayi, “Sha kubula mwalimishinga na namani wami wa shitole, shinga kutontolola aka kashau kami mufwako.”

¹⁹ Kubazumuka tuhu Moyo wa Nyambi ya Ngula wamushumishile, pe wayile ku Ashikeloni, niko akazihile bantu makumi ahatu, wabapukwile, pe wapanine makwiza wabo amawahe ku bantu aba batungwinine kashau. Kufuma oho wabokele ku munzi kukwabo hinga apilama shikuma hanebye byamonekele.

²⁰ Mukaza Shamishoni wapanikiwile kuli minendi uya wezile mukwikala ku shimbo sha shifupawenga.