Bakakuyata 13 - Libuka Lya Kuyela

Kuhemuwa kwa Shamishoni

¹ Baishalela babipishilile kami Nyambi ya Ngula, pe wetabilishile Bafwilishitina ngayi babalele myaka makumi anaa.

² Ku shikati shiyo kwekalile mulume watumbiwile ngayi Manowa wamu munzi wa Zola, kami wengile waku lupashi lwa mushobo wa Ndani. Mukazendi wengile mumba, hinga atanga kubeleka mwana.

³ Lingeloyi lya Nyambi ya Ngula lyaliholwele kuli mbuyama pe wambile ngayi, “Obe hinga watanga kubeleka mwana, ngoboni haya wuluno wimite pe ukabeleka mwana wa mulume.

⁴ Nohobene, winge wakushangama hinga unwa waine, hinge malovu a mukuku hinge kulya byakulya byazilikiwa,

⁵ pe ukemita na kubeleka mwana wa mulume. Oho wahemuwakale, hinga ukasheha huki zendi, ukafunguliwila kuli Nyambi ya Ngula kwinga ngonehe Kanazaleta. Ukatatika mulimo wakulamwina Baishalela ku Bafwilishitina.”

⁶ Niho mbuyama ayile na kutongweza mukokwendi ngayi, “Muntu wa Nyambi unezi kukwami, kami unamoneke kwinga wakutinisha ngonehe lingeloyi lya Nyambi. Kumwipula oku anafumu nifwako, kami kuntongweza lizina lyendi ufwako.

⁷ Ngoboni nantongweze ngayi nikemita pe nikabeleka mwana wa mulume. Nantongweze kami ngayi hinga nikanwa waine hinge malovu a mukuku, hinge kulya byakulya bya shizila, ndaba ndumbana owe ukenga wakufunguliwila kuli Nyambi kwinga ngonehe Kanazaleta mu kuyoya kwendi nimwako.”

⁸ Niho Manowa alombelele kuli Nyambi ya Ngula ngayi, “Hekulu, Obe Nyambi ya Ngula, leha muntu wa Nyambi uya watumine aboke kukwetu na kututongweza eshe tuku fwanina kutenda ha nowe ndumbana oho akahemuwa.”

⁹ Nyambi watendele eshe anyepele Manowa, pe lingeloyi lyabokele kuli mbuyama oho ushili kwikala mu mfuba. Mukokwendi Manowa kaliha wekalile nendi.

¹⁰ Nohobene wetukile wanguwangu kuya na kutongweza mukokwendi ngayi, “Yeka umone! Uya muntu weza kukwami uya mutena unaholoko kukwami kami.”

¹¹ Manowa wakatukile pe wayile kuli mukazendi. Niho ayile kuli uya muntu pe wamwipula ngayi, “Kati obe wambile na mukazami ndi?” Wakumbwile ngayi, “Ee.”

¹² Niho Manowa ambile ngayi, “Oho mazu obe unamba akamoneka, ndumbana wafwanina kutenda bishini? Ukayoya wumi wanahiti?”

¹³ Lingeloyi lya Nyambi ya Ngula lyambile kuli Manowa ngayi, “Mukazobe uku fwanina kutenda byuma nimwabyo ebye namutongweze.

¹⁴ Hinga alya shinge shumangani hinge shumangani sha ku mikolobozi ya shinyanca, kaliha nafwanini kami kunwa waine, hinge malovu a mukuku, hinge kulya byakulya bya shizila. Uku fwanina kukatenda byuma nimwabyo biya namutongweze.”

¹⁵ Manowa wambile kuli lingeloyi lya Nyambi ya Ngula ngayi, “Hekulu, hinga taha uya. Twimanine taha, tukutelekele mwana mpongo.”

¹⁶ Ngoboni lingeloyi lya Nyambi ya Ngula lyambile kuli Manowa ngayi, “Ndi nikwikala, kukalya byakulya byenu nifwako. Ngoboni ndi mukushinga kuteleka owo mwana mpongo, muhokeshenu kwinga nkombela yakuhokesha kuli Nyambi ya Ngula.” (Ndaba Manowa kaliha walimukile ngayi lyengile lingeloyi lya Nyambi ya Ngula.)

¹⁷ Manowa wambile kuli lingeloyi lya Nyambi ya Ngula ngayi, “Tutongweze lizina lyobe, ngayi mwanga tutweshe kukulemeeka byakamoneka ebye ukwamba.”

¹⁸ Lingeloyi lya Nyambi ya Ngula lya mwipwile ngayi, “Shumangani ukushingila kulimukila lizina lyami? Nilyo linengi lya kukomokesha?”

¹⁹ Nohobene Manowa washimbile mwana mpongo na ntupu ya mpeka na kubitupwila ha limanya kuli Nyambi ya Ngula mukakutenda bikomokesho.

²⁰ Oho milangi yekalilenga na kulasheka hayilu ya kaala, Manowa na mukazendi bamonene lingeloyi lya Nyambi ya Ngula haya muyilu mu milangi. Niho bawililile zimpala hanci na kulamba.

²¹ Pe lingeloyi lya Nyambi ya Ngula kaliha lyaholokele kami kuli Manowa na mukazendi, niho Manowa alimukile ngayi ou muntu nengi lingeloyi lya Nyambi ya Ngula.

²² Manowa wambile kuli mukazendi ngayi, “Mwa shikuma tukufwa, ndaba tunamono Nyambi!”

²³ Ngoboni mukazendi wakumbwile ngayi, “Shinga ndi Nyambi ya Ngula washinga kutuziha, shinga kutambula zinkombela zetu ufwako, shinga kutumonesha ebye nimwabyo ufwako, hinge kututongweza byuma bya nehe shikati eshe.”

²⁴ Mbuyama wabelekele mwana wa mulume pe bamutumbile lizina ngayi Shamishoni. Kanuke wakulile, pe Nyambi ya Ngula wamufuywelele.

²⁵ Kami Moyo wa Nyambi ya Ngula watatikile kumushumisha aha ekalilenga mu Munkungwa wa Ndani mukati ka Zola na Eshitawolu.