Bakakuyata 12 - Libuka Lya Kuyela

Bya Yefwita na Baefulemu

¹ Bantu ba Efulemu baliwahishilile nzita, pe bazabukile mishinzi wa Yondana kukakuma naku Zafwoni, pe bambile kuli Yefwita ngayi, “Shumangani wakilukile nginza mu kulwisha Baamoni sha kuluba kutwihana ngayi tuye nobe? Tukakuhokeshela mu litala lyobe!”

² Ngoboni Yefwita wabatongwezele ngayi, “Bantu bami na nami twekalile na nkani zazinene na Baamoni. Namihanine ngoboni kaliha mwandamwinine kukwabo.

³ Oho namonene ngayi kaliha mwandamwinine pe nengile nkanzi kuliyoha, niho nakilukile nginza mu kubalwisha Baamoni, pe Nyambi ya Ngula wampanikile ngovu za kubakoma. Hano shumangani mukwizila mu kundwisha?”

⁴ Niho Yefwita alobele bantu ba Ngiliyande nimwabo hamo, balwishile bantu ba Efulemu pe babakomene. Ha kutatika Baefulemu bambile ngayi, “Enu Bangiliyande muli mu Efulemu na Manashe, mwenga ba kukaniwa kuli Efulemu!”

⁵ Ha kukanisha Baefulemu kupanza, Bangiliyande bakwatile myaba okubazabukililenga Yondana, mu kukanisha Baefulemu ngayi babule kuzabuka. Oho Baefulemu ou washingilenga kwezeka kupanza ukwipula ngovu za kuzabuka, bantu ba Ngiliyande bakwipula ngayi, “Kati uli Kaefulemu ndi?” Ndi ukwamba ngayi, “Byo,”

⁶ ba kumutongweza kwamba ngayi, “Shimboleti.” Ngoboni niye kami ukwamba ngayi, “Simboleti,” ndaba kaliha watweshele kwamba shiwahe. Niho bamukwatile na kumuzihila kuya ku mishinzi wa Yondana ha kuzabuka. Ku shikati shiyo bazihile Baefulemu ba kulingana 42,000.

⁷ Yefwita watwamininine Ishalela ha myaka mutanu na umo. Niho afwile kami wafundiwile mu munzi wendi mu Ngiliyande.

Bya Imbizani na Eloni na Ambindoni

⁸ Yefwita oho wafwakale, Imbizani waku Mbetelehema watwaminine Ishalela.

⁹ Wekalile na bana babalume makumi ahatu na bana babambuyama makumi ahatu. Wayekiwishile bana bendi babambuyama ku bantu ba ku mavumo ashenge, pe wahuhwilile bana bendi babalume batunkanga makumi ahatu ba ku mavumo ashenge. Imbizani watwaminine Ishalela myaka mutanu na yibili,

¹⁰ niho Imbizani afwile, kami wafundiwile ku Mbetelehema.

¹¹ Imbizani oho wafwakale, Eloni waku Zembuloni watwaminine Ishalela myaka likumi.

¹² Niho Eloni afwile, kami wafundiwile ku Ayaloni mu litunga lya Zembuloni.

¹³ Eloni oho wafwakale, Ambindoni mwana Hilela waku Pilotoni, watwaminine Ishalela.

¹⁴ Wekalile na bana babalume makumi anaa na bazukulu makumi ahatu, aba bakandaminenga ha bambongolo makumi mutanu na babili. Ambindoni watwaminine Ishalela ha myaka mutanu na yihatu,

¹⁵ niho Ambindoni mwana Hilela afwile, pe wafundiwile ku Pilotoni mu litunga lya Efulemu, mu litunga lya binkanda lya Baamaleki.