Bakakuyata 11 - Libuka Lya Kuyela

Bya Yefwita

¹ Yefwita wengile kanzita wakukanca waku Ngiliyande. Tatiyendi watumbiwile ngayi Ngiliyande, ngoboni mandiyendi wengile walwiholwiho.

² Ngiliyande kami wabelekele bana bamina babalume ku mukazendi, pe oho bana bamukazendi ba kulile, batandile Yefwita ha munzi, pe bamutongwezele ngayi, “Kukakona shuma sha kuli tatiyetu ufwako, uli mwana waku mbuyama washenge.”

³ Yefwita watinine bawushinda wendi pe wakekalile ku litunga lya Tombi. Wakakokelele bantu babihulahuli kukwendi pe bayile nakuzika nendi hamo.

⁴ Oho kwapitile shikati Baamoni bayile ku nzita mu kulwisha Ishalela.

⁵ Oho eshe shamonekele, bakakutwaminina ba ku Ngiliyande bayile mu kuleta Yefwita ku litunga lya Tombi.

⁶ Bamutongwezele ngayi, “Yeka ututwaminine, mwanga tutweshe kulwisha Baamoni.”

⁷ Ngoboni Yefwita wakumbwile bakakutwaminina Ngiliyande ngayi, “Nikuhanganika ngayi, mwanzimbile. Mwantandile ha munzi ngayi nifume mu litala lya batate. Shumangani kami mukwizila kuno kukwami ngayi hano muli mu wukalu?”

⁸ Bakakutwaminina bambile kuli Yefwita ngayi, “Hano twatengulukilakale kukwobe, ndaba tuli na kushinga ngayi tuye nobe na kulwisha Baamoni, pe ukatwaminine bantu nimwabo ba ku Ngiliyande.”

⁹ Yefwita wambile kubakakutwaminina ba Ngiliyande ngayi, “Ndi mu kumbwesha ku munzi ngayi nikalwishe Baamoni kami ngayi ndi Nyambi ya Ngula ukampana ngovu za kubakoma, nikenga kalela wenu.”

¹⁰ Pe bakakutwaminina ba ku Ngiliyande bakumbwile Yefwita ngayi, “Tukatenda ngonoho unamba. Nyambi ya Ngula nengi paki mukatiketu.”

¹¹ Nohobene Yefwita wayile hamo na bakakutwaminina ba ku Ngiliyande, pe bantu bamwingile kalela wabo. Pe Yefwita mukakutwaminina waliyuvwashanine nabo ku Mizipa ku meho a Nyambi ya Ngula.

¹² Niho Yefwita atumine bantumwana kuli mwene wa Baamoni mukwamba ngayi, “Eshe shikani nanetu shanahiti? Shumangani mu nakatukili litunga lyetu mutakwe.”

¹³ Mwene wa Baamoni wakumbwile ku bantumwana ba Yefwita ngayi, “Ndaba oho Baishalela bafuminenga mu litunga lya Engepita bashimbile litunga lyami, kubalika ku mishinzi wa Anoni kukuma ku mishinzi wa Yamboki naku mishinzi wa Yondana. Haya obe uku fwanina kutubweshelalyo mu ku mwena.”

¹⁴ Yefwita wabweshele bantumwana kuli mwene wa Baamoni

¹⁵ na kukumbula kukwendi ngayi, “Ishalela kaliha washimbile litunga lya Bamowambi hinge lya Baamoni.

¹⁶ Oho Baishalela bafuminenga mu Engepita, bayile na kupita mu libelelengwa na kukuma ku liwate lya kufubila kami bezile ku Kandeshi.

¹⁷ Niho batumine bantumwana kuli mwene wamu Endoma mukwipula ngayi ‘Twitabilishe kupita mu litunga lyobe.’ Ngoboni mwene wamu Endoma kaliha wabetabilishile. Pe banyepele kami na kuli mwene wa Mowambi, ngoboni naye kami wakanine, nohobene Baishalela bekalilenga tuhu ku Kandeshi.

¹⁸ Niho bayilenga na kupita mu libelelengwa, bayilenga na kuzinguluka litunga lya Endoma na litunga lya Mowambi, pe bezile ku mbalila yaku mushamuko wa litunga lya Mowambi, mu nciza ya mishinzi wa Anoni. Batulile kuyo, ngoboni kaliha bazabukile mishinzi wa Anoni ndaba yengile nginza ya Bamowambi.

¹⁹ Niho Baishalela batumine bantumwana kuli Shihoni, mwene wa Baamoli waku Heshimboni, pe bamwipwile ngayi abetabilishe kupita mu litunga lyendi ha kuya ku litunga lyabo.

²⁰ Ngoboni Shihoni kaliha waba kulupilile ba Ishalela kutenda noho. Walobele nzita yendi nimwayo hamo batulilile ku Yahaza pe balwishile Ishalela.

²¹ Nyambi ya Ngula, Nyambi wa Ishalela wapanikile ngovu Baishalela za kukoma Shihoni na bantu bendi nimwabo. Nohobene Baishalela bashimbile wuheti nimwawo wamu litunga lya Baamoli aba bekalilenga mu litunga liyo.

²² Bashimbile litunga nimwalyo lya Baamoli kubalika ku Anoni kukakuma naku Yamboki, kubalika ku libelelengwa kukakuma naku Yondana.

²³ Nohobene Nyambi ya Ngula, Nyambi wa Ishalela, watandile Baamoli mu litunga lyabo, ndaba ya bantu bendi Baishalela.

²⁴ Hayaboni, muli na kwezeka kuya na kulibwesha ndi? Mukutwesha kulama ebye nimwabyo anamipaniki nyambi yenu Kemoshi. Nehiboni etu, tukuya mu kulama byuma nimwabyo biya anatupaniki Nyambi ya Ngula, Nyambi yetu.

²⁵ Kati mu kuhanganika ngayi munapitakana Mbalaki, mwana Zipola, mwene waku Mowambi ndi? Hinga atanga kulyamba na Baishalela, ndi walyambile nabo? Kati wezile mu kutulwisha ndi?

²⁶ Ishalela unashimbi Heshimboni na Aloya na tunzi tunabazinguluku na minzi nimwayo yaha shibumbo sha mishinzi wa Anoni kwapitakale myaka 300. Shumangani mwabulile kuyibwesha ku shikati nimwasho eshe?

²⁷ Byo, kumitenda shibi nifwako. Muli na kutenda shibi aha muli na kutenda ngunga hahami. Nyambi ya Ngula nengi mukakuyata. Ukayata mukati ka Baishalela na Baamoni lelo.”

²⁸ Ngoboni mwene wa Baamoni kaliha watulumanine ngayi ayuvwilile ku lizu liya amutuminine Yefwita.

²⁹ Niho moyo wa Nyambi ya Ngula wezile hali Yefwita. Wayile na kupita mu Ngiliyande na Manashe, pe wabokele ku Mizipa mu litunga lya Ngiliyande. Kufuma kuyo niho ayile ku Baamoni.

³⁰ Yefwita wakulupishile kuli Nyambi ya Ngula ngayi, “Ndi ukumpana ngovu za kukoma Baamoni,

³¹ nikatupula shuma nimwasho sha kutatika kuli Nyambi ya Ngula shiya shikafuma mu litala lyami mu ku ncimbawila kwinga nkombela ya kuhokesha. Oho nikaboka mu kubakoma nikatupula shiya shuma kukwobe kwinga nkombela ya kuhokesha.”

³² Nohobene Yefwita wazabukile mishinzi mu kulwisha Baamoni, pe Nyambi ya Ngula wamupanine ngovu.

³³ Wabalwishile ku Alole ku mbalila yakuzinguluka ku Minita, minzi makumi abili nimwayo, kukakuma naku Abele Kelamima. Kwekalile mponde yayinene, kami Baamoni bakomiwile ku Ishalela.

Mwana Yefwita wambuyama

³⁴ Oho Yefwita abokele ku munzi wendi ku Mizipa! Mwanendi wa mbuyama hakwiza mu kushimbawila ha shinda na kumbeta kancingili. Wengile mwanendi umo pele.

³⁵ Oho amumonene, watabwele bivwalo byendi mu wunginga, pe wambile ngayi, “Tawee mwanami! Obe wankoleshakale ku mutima! Shumangani shiku fwanina kutendiwa kukwobe, obe wankoleshakale? Nalibeze kuli Nyambi ya Ngula, pe kutwesha kulibezulula nifwako!”

³⁶ Mwanendi wambile kukwendi ngayi, “Obe tate, ndi walibeza na shikulupisho kuli Nyambi ya Ngula, tenda ebye watoya ngayi ukubitenda kukwami. Ha kuwana ngayi Nyambi ya Ngula unakupana kubweshela ha bamalamo bobe Baamoni.”

³⁷ Ngoboni walombele tatiyendi ngayi, “Tenda shuma shimo kukwami. Ndehenu taha nikale ninkayami ha zingonda zibili, nikatweshe kuya na bahoni bami na kuyambangila na kulihohoma mu mapili ngayi nikalile wunkanga wami.”

³⁸ Wamutongwezele ngayi aye, pe wamwitabilishile ngayi akekale zingonda zibili. Niye na bahoni bendi bayile ku mapili, pe Balihohomene ndaba ukafwa ushili kankanga na kubula mwana.

³⁹ Pe ha kumana kwa zingonda zibili, wezile kuli tatiyendi. Tatiyendi watendele ngonehe eshe a kulupishile Nyambi ya Ngula. Wafwile oho ushili kankanga. Eshe nisho shengile shiheka sha kutatika mu Ishalela,

⁴⁰ ngayi batunkanga bayilenga ha mwaka na mwaka ha matena anaa mu kulila mwana Yefwita waku Ngiliyande.