Bakakuyata 10 - Libuka Lya Kuyela

Bya Tola

¹ Kunyima ya lufu lwa Ambimeleki, hahingile Tola mwana Puwa muzukulya Ndondo, mu kulamwina Ishalela. Wafumine ku mushobo wa Ishaka, kami wazikilenga ku Shamila mu litunga lya binkanda lya Efulemu.

² Pe wengile ntwamina wa Baishalela ha myaka 23, niho afwile pe bamufundile ku Shamila.

Bya Yayila

³ Tola oho wafwakale hahingile Yayila, waku Ngiliyande. Watwamininine Ishalela myaka 22.

⁴ Wekalile na bana babalume 30, aba bakandaminenga ha bambongolo 30. Bekalile na minzi 30 mu litunga lya Ngiliyande, eye bashili kutoya ngayi minzi ya Yayila.

⁵ Yayila wafwile pe wafundiwile ku Kamoni.

Bya Yefwita

⁶ Niho kami Baishalela babipishile kuli Nyambi ya Ngula. Balemeshelenga bambaalu na Baashitaloti, banyambi bamu Alamu na Shindoni na Mowambi na Amoni na Fwilishitiya. Bafutulukilile Nyambi ya Ngula, pe balehele kumulemesha.

⁷ Nohobene Nyambi ya Ngula wapilaminine Baishalela na kulehela Bafwilishitina na Baamoni ngayi babakome.

⁸ Mu myaka 18 babamoneshele malwa pe bayandishilenga Baishalela nimwabo, aba bazikile mu litunga lya Baamoli ku mushamuko wa mishinzi wa Yondana mu Ngiliyande.

⁹ Baamoni kami bazabukilenga Yondana mu kulwisha mishobo ya Yunda na Mbenjamani na Efulemu. Ishalela wekalile mu makando amanene.

¹⁰ Niho Baishalela balililile kuli Nyambi ya Ngula, pe bambile ngayi, “Tunabipishi kukwobe ndaba twakushiyile, obe Nyambi yetu, pe twalemeshele Bambaalu.”

¹¹ Nyambi ya Ngula waba kumbwile nehe ngayi, “Baengepita na Baamoli na Baamoni na Bafwilishitina

¹² na Bashindoni na Baamaleki na Bamawoni bamiyandishilenga ku mwaka, pe mwalililile kukwami. Kati kaliha namilamwinine kukwabo ndi?

¹³ Ngoboni mwanciyile na kulemesha banyambi bashenge, nohobene haya kuya na kumi lamwina kami nifwako.

¹⁴ Yenunga mukalilile ku banyambi aba munahata. Oho mukawana makando, shashiwahe bakamilamwine.”

¹⁵ Ngoboni bantu baishalela bambile kuli Nyambi ya Ngula ngayi, “Tunabipishi. Tenda eshe ukushinga kutenda, ngoboni tukulomba Hekulyetu, lelo utulamwine.”

¹⁶ Nohobene balehele banyambi babo bashenge, pe balemeshele Nyambi ya Ngula, Nyambi ya Ngula waliyakatile ha makando a Ishalela.

¹⁷ Niho banzita ba Baamoni balishakashakilile kulwa, bezile na kutulila ku Ngiliyande. Banzita ba Ishalela bezile hamo, pe batulilile ku Mizipa ku Ngiliyande.

¹⁸ Pe kuyo bantu na bakakutwaminina ba mishobo ya Ishalela balipwile umo na wamina ngayi, “Kati yani ou ukatatika kulwisha Baamoni? Ou nimwendi aliyakemo, pe niye ukenga ntwamina wa bantu nimwabo bamu Ngiliyande.”