Bakakuyata 1 - Libuka Lya Kuyela

Mushobo wa Yunda na Shimiyoni ba kukwata Andonimbezeki

¹ Yoshuwa oho wafwakale, Baishalela bepwile Nyambi ya Ngula ngayi, “Kati bayani ku mishobo yetu bakenga bakutatika kuya na kulwisha Bakenaani?”

² Nyambi ya Ngula wakumbwile ngayi, “Ba mushobo wa Yunda nibo bakenga bakutatika kuya. Nili na kubapanika ngovu za kutambula litunga.”

³ Bantu ba Yunda bambile ku bantu ba Shimiyoni ngayi, “Tuyenunga nenu hamo mu litunga elye batupanikile, pe tukalwishe Bakenaani nimwetu. Niho tukaya nenu hamo mu litunga liya bamipanikile.” Nohobene mishobo ya Shimiyoni

⁴ na Yunda bayile hamo ku nzita. Nyambi ya Ngula wabapanine ngovu za kukoma Bakenaani na Bapelizi, pe bakomeneko bantu ku Mbezeki 10,000.

⁵ Bawanineko Andonimbezeki, pe bamulwishile.

⁶ Andonimbezeki wetukile, ngoboni bamukonkele, niho bakamukwatile, pe bamuketwile byaala byendi na manyenca wendi.

⁷ Andonimbezeki wambile ngayi, “Bamyene makumi mutanu na abili baya naketwile byaala byabo na manyenca wabo, batolelenga ncankuncanku ziya zapulumukililenga mu nceto ya tebulu yami. Haya Nyambi unashitende kukwami ngo eshe natendele kukwabo.” Andonimbezeki watwaliwile ku Yelushalema, niko akafwililile.

Mushobo wa Yunda ukukoma Yelushalema na Hembuloni

⁸ Bantu ba Yunda balwishile lukena lwa Yelushalema na kulupukula. Bazihile bantu balwo kami bahokeshele lukena.

⁹ Ku balika haya bantu ba Yunda bayile mu kulwisha Bakenaani aba bazikilenga ku mabukubuku mu litunga lya binkanda na lya binyekwa namu litunga lya nyuminine lya Nengembu.

¹⁰ Bantu ba Yunda bakatukilile mutakwe mu kulwisha Bakenaani aba bazikilenga mu lukena lwa Hembuloni, olu batoyelenga ngayi lukena lwa Kiliyati Aleba. Bakomene mavumo a Sheshayi na Ahimani na Talimayi.

Otiniyele ukukoma lukena lwa Ndembila

¹¹ Oho bafumine bantu ba Yunda bakatukilile mutakwe mu kulwisha bantu ba ku munzi wa Ndembila, ou batoyelenga ngayi Kiliyata Shefwila.

¹² Kalembu wambile ngayi, “Nikapana mwanami Akisha ngayi ayekiwe ku mulume ou ukatwesha kulwisha na kupukula lukena lwa Kiliyata Shefwila.”

¹³ Otiniyele, mwana Kenazi mukonzo wa Kalembu wapukwile uya munzi, nohobene Kalembu wayekiwishile mwanendi Akisha kuli Otiniyele.

¹⁴ Ha mutena wa shifupawenga, Otiniyele wamukandamikile ngayi anyepe tatiyendi mfuba. Pe oho ashulukile ha mbongolo yendi, Kalembu wamwipwile ngayi, “Kati ukushinga bishini?”

¹⁵ Wakumbwile ngayi, “Ntandalishe na maziba amo a mema, ndaba litunga wampana lya nyuminine.” Nohobene Kalembu wamupanine tuheloke twa kuyilu na tuheloke twa ku nceto.

Mishobo ya Yunda na Mbenjamani Bakukoma

¹⁶ Bazukulya bamukowendi Moshesha wa Kakeneta, bafumine ku Yeliko, lukena lwa Minkomona, hamo na bantu ba Yunda, benginine mu munzi wa Alandi mu zimbalila za ngawungawu ku mabukubuku a litunga lya Yunda. Bayile kuyo mu kuzika mukati ka Baameleka.

¹⁷ Bantu ba Yunda bayile hamo na bantu ba Shimiyoni, kami bakomene Bakenaani hamo aba bazikilenga ku munzi wa Zefwati. Bakutile munzi na kuwulobesha. Pe bawutumbile ngayi Homa.

¹⁸ Mushobo wa Yunda kami washimbile minzi ya Ngaza na Ashikeloni na Ekiloni na matunga wayo abazinguluka.

¹⁹ Nyambi ya Ngula wayavwile bantu ba Yunda, pe bakomene litunga lya binkanda. Ngoboni bantu aba bazikilenga ha shibumbo sha liwate bekalilenga na makoloyi bya byondo, pe haya bantu ba Yunda kaliha batweshele kubatandamo.

²⁰ Ngonehe ambile Moshesha, Hembuloni wapanikiwile kuli Kalembu, ou watandilemo mavumo ahatu atutika kuli Anaki.

²¹ Ngoboni bantu ba mushobo wa Mbenjamani kaliha batandile Bayembushi aba bazikilenga mu Yelushalema. Nohobene kuleta naku lelo Bayembushi bashili kuzika hamo na bantu ba Mbenjamani.

Yoshefwa ukukoma Mbetele

²² Balupashi lwa Yoshefwa bayile mu kulwisha lukena lwa Mbetele, olu lwatumbiwile ngayi Luzi shikati shiyo. Nyambi ya Ngula wabayavwile,

²³ pe ba lupashi lwa Yoshefwa batumine bakakuhokela ku lukena lwa Mbetele. (Ha kutatika lukena lwatumbiwile ngayi Luzi).

²⁴ Bakakuhokela bamonene muntu hafuma mu lukena. Pe bambile kukwendi ngayi, “Tumoneshe sha kwingina mu lukena, pe tukakutenda shiwahe.”

²⁵ Nohobene wabamoneshele nzila ya kuya mu lukena. Pe ba lupashi lwa Yoshefwa bazihile bantu nimwabo mu lukena, ndele tuhu owo muntu na ba lupashi lwendi.

²⁶ Uya muntu niho ayile ku litunga lya Bahita, wazikileko munzi. Pe wakawutumbile ngayi Luzi. Nihano wushili kutumbiwa na lizina elye.

Bantu aba babulile kutandiwa ku Baishalela

²⁷ Mushobo wa Manashe kaliha watandile bantu aba bazikilenga mu zinkena za Mbeti Sheyini, hinge Tanaki, hinge Ndoli, hinge Imbilemu, hinge Mengindo na minzi ya hahepi. Bakenaani bazaminine kuzikamo.

²⁸ Oho Baishalela bawanine ngovu, bakandikizile Bakenaani kubatendela milimo, ngoboni kaliha batweshele kubatandamo nimwabo.

²⁹ Mushobo wa Efulemu kaliha watandile Bakenaani aba bazikilenga mu lukena lwa Ngeza, haya Bakenaani bazaminine kuzika nabo hamo.

³⁰ Mushobo wa Zembuloni kaliha watandile bantu bazikilenga mu zinkena za Kitiloni namu Nahalalu. Bakenaani bazikilenga nabo hamo, kami babengishile bakakubatendela milimo.

³¹ Mushobo wa Asha kaliha batandile bantu bazikilenga mu zinkena za Ako, hinge Shindoni, Ahilaba hinge Akizimbi hinge Helumba hinge Afweki hinge Lehombi.

³² Bantu ba Asha bazikilenga na Bakenaani ba kuyo ku zimbalila ha kuwana ngayi nibo kaliha batandiwile.

³³ Mushobo wa Nafwitali kaliha batandile bantu aba bazikilenga mu zinkena za Mbeti Shemeshi namu Mbetanati. Bantu ba Nafwitali bazikile na Bakenaani aba bazikilengamo, ngoboni babakandikizile kubatendela milimo.

³⁴ Baamoli balyatililile bantu ba mushobo wa Ndani mu litunga lya binkanda, kami kaliha babetabilile ngayi ba kunkuluke na kuzika ku mbuwa.

³⁵ Baamoli bazaminine kwikala mu Ayaloni na Shalambima naku lipili lya Heleshi, ngoboni bantu ba mishobo ya Yoshefwa ba Efulemu na Manashe bafutukile kwinga bangovu, pe bakandikizile Baamaleki kubatendela milimo.

³⁶ Nginza ya mwaka ya Baamoli na Baendoma yalulumanine na kupita mukati ka nzila ya ncinencine ya Akilambimu ku ncelele ya Shela.