Bahebelu 9 - Libuka Lya Kuyela

Kulemesha kwa hanci na kwa muyilu

¹ Kulimama kwa kutatika kwekalile na biheka bya kulemesha hamo na ntanda ya hano hanci ya kulemeshela.

² Ntanda ya kulemeshela yatendiwile nehi, mu kampenci kakutatika kaya katumbiwile ngayi Kampenci Kakuyela, mwekalile kalonga ka kandela na tebulu na mankende.

³ Kunyima ya mu wumbo wa wubili, kwekalile kampenci katumbiwile ngayi Kampenci Kakuyela Shikuma.

⁴ Muyo nimo mwekalile kaala ka ngolinde ka kuhokeshela incence, na Likwati lya Kulimama liya lyafwikiwile nimwalyo na ngolinde, mu likwati mwekalile ntesho ya ngolinde muya mwekalile maana na muwana wa Aloni uya wazobelele mabizi na matapa abili haya hatikitiwile ndayano.

⁵ Hayilu ya likwati hekalile makelumbi a wuwahe aya afwikile shipona sha shikeketima na mbando zawo. Haya shino kaliha nisho shikati sha kutontolola ebye byuma nimwabyo.

⁶ Oho byuma ebye byekalile nahiyo, bakankombela bengininenga mu kampenci ka kutatika shikati nimwasho batendelenga mulimo wabo.

⁷ Ngoboni mu ka wubili, mwengininenga tuhu Mukulwane wa Bakankombela Nimwabo kamo ha mwaka.Washimbilenga mukeza uya atupwilenga ndaba ya wubi wendi niye mwine na wubi wa bantu uya batendelenga mu wulube.

⁸ Moyo wa Kuyela uku longesha shiwahe ngayi hanebye nimwabyo byatendiwilenga nehi, nzila ya kuya ku Kampenci Kakuyela Shikuma oho shilolo yishinkululiwe ndaba kampenci ka kutatika kekalileko.

⁹ Ebye nibyo byengile shimonekesho shenikilenga ku shikati shino, ndaba zintupu na zinkombela ziya batendelenga, kaliha byatweshele kulembukisha mitima ya bakakulemesha.

¹⁰ Ndaba byengile tuhu bya kulya na bya kunwa na biheka bya mishoboshobo bya kuliyowesha. Ebye byengile tuhu bya ha munkanda kutwala ha shikati oho Nyambi akatenda nimwabyo wupya.

¹¹ Ngoboni Kilishitu wezile ngayi enge Mukulwane wa Bakankombela Nimwabo wa byuma byabiwahe biya bikeza, wenginine mu ntanda ya kulemeshela yayinene na ya kukulembuka ya kubula kutendiwa na maboko a wuntu, nohobene kaliha ya muno mu kaye kalengiwile.

¹² Kaliha wenginine na mukeza wa bampongo hinge wa tunamani, ngoboni na mukeza wendi niye mwine. Wenginine kamo mu Kampenci Kakuyela Shikuma niho atuwaninine ku shoboloka mwaya myaka.

¹³ Ndaba ndi mukeza wa bampongo na bankunzi na mutoko wa namani yinahokeshiwi ukumyanziwa ku bantu bali na biheka bya mazilo ukutwesha ku bayelesha ha munkanda.

¹⁴ Nohobene, mukeza wa Kilishitu, ou wakubula shihepwa, uya atupwile niye mwine kuli Nyambi kupitila mu Moyo wa mwaya myaka, ukayelesha bihanganiko byetu kubifumisha ku milimo yikutwala ku lufu ngayi mwanga tutende milimo ya Nyambi wakuyoya.

¹⁵ Ndaba yanebye, Yeshu niye mukakwimanina kulimama kwakupya, ngayi baya banehaniwi mwanga batambule shikulupisho sha likona lya mwaya myaka ndaba Yeshu unafu ngayi aba kulize na ku bashobolola ku wubi uya batendele mu kulimama kwa mwaka.

¹⁶ Ndaba shifungo shikutwesha tuhu kwikala na wupaki ndi uya mwine washo unafu,

¹⁷ ndaba shifungo shekalanga tuhu na ngovu ndi uya mwine washo nafu, ndaba kowa ebi shikutwesha kupaka ndi uya mwine shifungo ushili kuyoya.

¹⁸ Nohobene hinge kulimama kwa mwaka kwekalile na ngovu ndaba baliyavwishilenga mukeza.

¹⁹ Ndaba oho Moshesha amanishile kwamba bya ndayano nimwazo ku bantu nimwabo, washimbile mukeza wa tunamani na bampongo na mema na wushako wakufubila na hishopu, wamyanzilile ha libuka na ha bantu nimwabo.

²⁰ Wambilenga ngayi, “Ou niwo mukeza wakushumisha kulimama kuya amitongwezele Nyambi ngayi mwombatale.”

²¹ Kami Moshesha wamyanzilile mukeza ha ntanda ya kulemesha na ha byuma nimwabyo baliyavwishilenga ha kulemesha.

²² Kami kuya na ndayano, wingi wa byuma nimwabyo byayeleshiwanga na mukeza, kwakubula kuyita mukeza wubi kuyatiwila wufwako.

Nkombela ya Kilishitu yinafumishi wubi

²³ Nohobene kwafwaninine ngayi byuma biya byengile bifwanikizo bya byuma bya muyilu biyeleshiwe na ziya zinkombela, ngoboni byuma bya nkama bya muyilu bikuyeleshiwa na zinkombela za kupitakana eze.

²⁴ Ndaba Kilishitu kaliha wenginine mu Kampenci Kakuyela kaya batendele na maboko a wuntu, kaya kengile shifwanikizo sha kampenci kakupwisha, ngoboni wayile muyilu mwine, muya ali na kutwimanina ku meho a Nyambi.

²⁵ Kaliha ngayi wayile muyilu ngayi mwanga akalitupule niye mwine bikati byabingi ngonehe Mukulwane wa Bakankombela Nimwabo engininenga mu Kampenci Kakuyela Shikuma ha mwaka nimwawo na mukeza wa kayamana.

²⁶ Ndaba shinga noho shinga unafwanini kuyanda kakengi kufuma ku kulengiwa kwa kaye, ngoboni wuluno unezi ha kukotoka kwa kaye mu kufumisha wubi na kulitupula.

²⁷ Nehi kwemikiwile ku bantu ngayi bafwe kamo, munyima niho bakayatiwe na Nyambi.

²⁸ Nahiyo kami Kilishitu walitupwile kwinga nkombela kamo ngayi ashimbe wubi wa bantu babengi, ukaboka ka wubili, kaliha kwiza na kushimba wubi, ngoboni ukeza na kupulwisha aba banamutatilili.