Bahebelu 8 - Libuka Lya Kuyela

Yeshu niye Mukankombela wetu wa Mukulwane

¹ Wuluno owe niwo mutwe wanebye tunamba, tuli na Mukulwane wa Bakankombela Nimwabo uya wekalile ku shilyo sha litanda lya muyilu lya Wakukangana.

² Niye watendanga milimo ngo Mukulwane wa Bakankombela Nimwabo mu Mwanya wa Kuyela Shikuma, ntanda ya kupwisha iya anatende Mwene, kaliha ya kutendiwa ku muntu.

³ Ndaba Mukulwane wa Bakankombela Nimwabo bamuhatanga ngayi atupule zintupu na kutenda zinkombela, nohobene kunafwanini ngayi na nou kami ekale na bya kutupula.

⁴ Ndaba shinga wekala hano hanci, shinga kaliha mukankombela, ndaba ku bali bakankombela baya bakutupula zintupu ngo mu shiheka sha Ndayano za Bayunda.

⁵ Eye milimo ba kutenda yenga tuhu shifwanikizo na mumvulu wa byuma bya muyilu. Niho Nyambi abelele Moshesha oho atatikile kutenda ntanda ya kulemeshela ngayi, “Tenda byuma nimwabyo ngonehe shiya nakufundizizile ha lipili.”

⁶ Ngoboni wuluno Yeshu unatambulu mulimo wakupitakana milimo yabo, ngonehe kulimama kuya awahishile mukati ka Nyambi na bantu kunengi kwakuwahe, ndaba kuli na bikulupisho byabiwahe.

⁷ Ndaba shinga kulimama kwa kutatika kaliha kwekala na mulandu, shinga shilolo kwikale kulimama kwa wubili.

⁸ Ndaba Nyambi unawana mulandu ku bantu, niho akwamba ngayi, “Mwene ukwamba ngayi, Monenu, Shikati shikeza, oho nikalimama na kulimama kwakupya na bantu ba Ishalela na Yunda.”

⁹ Kaliha ngo kulimama kuya nalimamine na bankakazabo ha mutena uyo oho na bakwatile na liboko na kubafumisha mu litunga lya Engepita. Ndaba kaliha bazamininine mu kulimama kwami, nabafutaminine.

¹⁰ Okwe niko kulimama nikatenda na lupashi lwa Ishalela munyima ya matena ayo, ebye nibyo akwamba Mwene. Nikayaka ndayano zami mu ngana zabo, na kuzitikita mu mitima yabo. Nikenga Nyambi yabo, nibo bakenga bantu bami.

¹¹ Kowa muntu ukalongesha ndambo yendi, kami kowa ukatongweza minendi ngayi, “Limuka Mwene.” Ndaba nimwabo bakandimuka, ku balika ku wamushe kutwala ku wamunene.

¹² Ndaba nikayatila kutengama kwabo, kami kukanuka wubi wabo nifwako.

¹³ Mwene oho akwamba bya kulimama kwakupya, ukutontolola ngayi kulimama kwa mwaka kunapiti. Pe shuma sha mwaka sha kulumpalanga, kami shalobanga na wangu.