Bahebelu 12 - Libuka Lya Kuyela

Nyambi Tatiyetu

¹ Nohobene ndaba tunazingulukiwi na likumbi lyalinene lya bapaki, tuyenunga tutule biya nimwabyo bikutukwangisha na wubi ou unatulamatili shikuma, pe twituke na lunzewe mukala ou uli kumbili yetu.

² Pe tuchonchomeke meho etu hali Yeshu ou mukakutatika na mukakulembukisha kukulupisha kwetu. Yeshu wazumananine ha shishempakano ndaba ya ku wahilila biya bikeza kumbili, kaliha wayuvwile lisheni lya lufu lwa ha shishempakano, hano unekala ku liboko lya shilyo ku litanda lya Nyambi.

³ Yakenu bihanganiko byenu hali Yeshu, ou wazumananine nkani za bakawubi! Mwanga mubule kukwanga hinge kupopa mu mitima yenu.

⁴ Enu mu ngunga yenu ya kukana wubi, kowa ou unakanangana kukuma na ku shikati sha kuzihiwa.

⁵ Kami munavulama mazu akumishumisha aya Nyambi ambile kukwenu bana bendi ngayi, “Mwanami, yuvwilila oho Mwene akukushuza, hinga upopa oho akukwambila.

⁶ Ndaba Nyambi wa shuzanga ou ahaka na ku Zipola mwana nimwendi ou uku tambula.”

⁷ Ndi mu ku shuziwa, zumananenu ndaba ya nisho atendanga Nyambi ku bana bendi. Kati niko ali mwana wakubula ku shuziwa na tatiyendi ndi?

⁸ Ngoboni ndi mu kubula ku shuziwa, ngonehe shinatendiwi ku bana bendi nimwabo, pe enu kaliha bana bendi muli ba washenge.

⁹ Nohobene nanetu kami twekalilenga na batatizetu mu wuntu, batushuzilenga, ngoboni twabapaninenga maleema, kati kaliha tunafwanini kwombatala Tate mu moyo mwanga tuyoye ndi?

¹⁰ Batatizetu batushuzile mu kashikati kakashe ngonehe bashingile, ngoboni Nyambi ukutushuza ngayi twikale mu wuwahe, pe mwanga tutambule shitapilo sha kuyela kwendi.

¹¹ Wuluno oho tukushuziwa, ku wahilila tufwako, ngoboni tukuyuvwa kukola. Ngoboni baya bakwombatala oho ba kushuziwa, bakateza mu ku mwena mukabo wakwoloka.

Mazu akwambila na nawa akushuza

¹² Nohobene shumishenu maboko enu anakwanga, kami shumishenu manungo enu akuzikima.

¹³ Endenunga mu zinzila za kwoloka, mwanga mawulu akushunkuta hinga apenga, ngoboni mwanga anyongomane.

¹⁴ Ezekenu kwikala mu ku mwena na bantu nimwabo, kami kuyoya kwenu kwinge kwa kuyela, ndaba kowa muntu ukamona Nyambi ndi ebye kowa.

¹⁵ Zundaminenu kutina muntu wamina ayawila ku nceshe za Nyambi, kami mukati kenu hinga kuwaniwa muntu wakufweka ngo mutondo wawululu uya ukutwesha kuleta makalikiza na wuhungu wawo.

¹⁶ Hinga kwikala muka wumambe, hinge muka mashewinizi ngonehe Ishau ou walandishile wukulwane wendi na twa kulya twa ha shikati.

¹⁷ Ndaba ngonehe mu kulimuka, oho shikati sha kumine, lshau washingile kukona mfuywezi, ngoboni bamukanine hinge ndi niye walilile shikuma ngayi aziwane, kaliha shatweshekele ngayi afutule bihanganiko byendi bya mwaka.

¹⁸ Ndaba kaliha munezi, ngo bantu ba Ishalela bezile, ku Lipili lya Shinayi liya mu kutwesha kukwata, liya likubanga na mundilo, kuya kwa ku shipa, kuli mincimpwe na likandavula.

¹⁹ Kaliha munezi ku mungunina wa mpandula, hinge ku ncungumina ya mazu, aya ba kunyepa baya ba kuwayuvwa ngayi hinga kami akambiwa kukwabo.

²⁰ Ndaba kaliha batweshele ku zumanana eze ndayano zikwamba ngayi, “Hinge ndi kuli kayamana kakuntwala ku lipili, mwanga kapuhiwe mamanya ngayi kafwe.”

²¹ Shimonekesho shengile sha kutinisha shikuma, pe Moshesha wambile ngayi, “Ninatini shikuma nili na kukanka.”

²² Ngoboni enu munezi ku Lipili lya Ziyoni, ku Yelushalema wa muyilu, lukena lwa Nyambi wakuyoya na ku likunge lya mangeloyi amengi awahililile.

²³ Munezi ku shikungulukilo sha bamyeli, baya bali na mazina atikitiwile muyilu. Munezi kuli Nyambi mukakuyata nimwabo na ku myoyo ya bakakwoloka iya yinalembuluku.

²⁴ Munezi kuli Yeshu mukakwimanina kulimama kwakupya na ku mukeza unamyanziwi, ou ukwamba byuma bya kupitakana mukeza wa Abele.

²⁵ Keyenu ngayi hinga mukana ou ukwamba. Ndaba ndi aba bakanine kuyuvwa ou wambile hano hanci kaliha bapanzile, pe etu tukapanza ndi tukufutamina ou ukwamba muyilu.

²⁶ Ha shikati shiyo lizu lyendi lyanyenkanishile hanci, ngoboni wuluno unakulupishi ngayi, “Nikabokelaho, kaliha ngayi nikanyenkanisha tuhu hanci ngoboni na liyilu nikalinyenkanisha.”

²⁷ Elye lizu likwamba ngayi, “Nikabokelaho” likutoya kufumishiwa kwa byuma bikutwesha kunyenkanishiwa, byuma biya byalengiwa, pe byuma bya kubula kunyenkanishiwa bikashala.

²⁸ Nohobene tukambililenu ndaba tukutambula wene ukubula kutwesha kunyenkanishiwa, tulemeshenu Nyambi na maleema anamufwanini, tumupanikenu maleema amanene, kami tumuyuvwilenu bowa.

²⁹ Ndaba Nyambi yetu wenga mundilo wakulobesha.