Bahebelu 1 - Libuka Lya Kuyela

Mazu a Nyambi kupitila muli Mwanendi

¹ Kushikale Nyambi wambile ku bankakazetu bikati byabingi mu zinzila za kupitila muli bamiluwe,

² ngoboni mu matena ano aku kotoka unamba kukwetu kupitila muli Mwanendi. Nyambi walengele byuma nimwabyo kupitila mumwendi, ou ahatile kwinga mukakukona byuma nimwabyo.

³ Kilishitu niye kubyazima ku kumonesha wuwahe wa Nyambi, kami niye shifwekesha sha kupwisha sha mutuntu wa Nyambi na kwimanika byuma nimwabyo na lizu lyendi lya ngovu. Oho amanishile kuyelesha wubi wetu niye mwine, wekalile ku liboko lya shilyo lya wuwahe wa Nyambi wa Makunge.

Kilishitu ukupitakana mangeloyi

⁴ Kilishitu ukupitakana mangeloyi na lizina ashwana lya kukangana kukwawo.

⁵ Ndaba hinge Nyambi kaliha wambile ku umo wa mangeloyi ha shikati shamina ngayi, “Obe uli Mwanami, mutena walelo nengakale Tatiyobe.” Nyambi kaliha wambile ku lingeloyi ngayi, “Nikenga Tatiyendi, niye ukenga Mwanami.”

⁶ Ngoboni Nyambi oho atumine Mwanendi wa mweli mu kaye wambile ngayi, “Mangeloyi nimwawo aku fwanina kumulemesha.”

⁷ Ku mangeloyi Nyambi wambile ngayi, “Ukuliyavwisha mangeloyi endi myoyo, na bakamilimo bendi milangi ya mundilo.”

⁸ Ngoboni bya Mwanendi unamba ngayi, “Obe Nyambi, litanda lyobe likekala mwaya myaka! Ukalela bantu bobe mu kupwisha.

⁹ Wahaka kupwisha na kuzimba wubi. Nohobene Nyambi, Nyambi yobe, na kukatulu na kuwabishi mazi aku monesha ku wahilila kupitakana baminobe.”

¹⁰ Wambile kami ngayi, “Obe Mwene, ha kutatika wa yalile mimbi ya hanci, wa tendele mayilu na maboko wobe.

¹¹ Nimwabyo ebye bikaloba, ngoboni obe ukashala, nimwabyo bika kulumpala ngonehe bivwalo.

¹² Kami ukabipeteka ngonehe shikobelo, kami bikafutuka ngonehe likwiza. Ngoboni obe wufwako kukafutuka, na myaka yobe yikabula kumana.”

¹³ Nyambi kaliha wambile ha umo wa ba mangeloyi bendi ngayi, “Yikala ku liboko lyami lya shilyo hantu nafutulu bamalamo bobe kwinga shipona sha kulyata mawulu wobe?”

¹⁴ Kati mangeloyi enga shumangani? Nka nimwawo enga myoyo ya kutendela milimo Nyambi, kami yatumiwile kuyavwa aba bakatambula kupuluka.