Amoshi 6 - Libuka Lya Kuyela

Kulobeshiwa kwa Ishalela

¹ Makando wenu enu muli mumpoza mu Ziyoni naku nenu mu kuliyuvwa ngayi munekala shiwahe ha lipili lya Shamaliya, bantu ba kutumbalala ba ku mukoka wa hayilu ya mikoka nimwayo, oku bezanga baka litala lya Ishalela ngayi babayavwe.

² Mwambile ku bantu ngayi, yenunga mukapenze ku munzi wa Kalina, mwakafumako pe mukakume naku Hamati wawunene, niho kami mukaye ku Ngati mu litunga lya Bafwilishitina. Kati eye minzi yayiwahe shikuma kupitakana wene wetu wa matunga abili ndi? Kati litunga lyabo lyalinene kupitakana litunga lyetu ndi?

³ Kaliha mwakulupilanga ngayi mutena wabyabibi ukeza, ngoboni ebye mwatendanga byawuhenyeshelanga hahepi.

⁴ Makando wenu enu mu kulala ha malili anayaliwi mayewe a banzovu na kwalamina mu bipona byenu bya mihamino. Mukulya nyama ya bana babambelele na bana ba zingombe ba kushuwa.

⁵ Mukwimbila nyimbo zowa ha tumbuli. Mukulitendela tuhanzi twa kumbeta enu bamwine ngonehe atendelenga Ndavita.

⁶ Mukunwina waine mu zindonga za kukunama, mu kuliwabisha mazi amawahe shikuma, ngoboni kuyuvwila wunginga ha kuloba kwa Ishalela mufwako.

⁷ Nohobene enu mukenga bakutatika kuya mu wuntapwa, pe mukeyu wenu mwalamininenga mu bipona ukamana.

⁸ Nyambi wa Makunge, Nyambi Wangovu Nimwazo unalibeze niyemwine ngayi, “Kuliyemeza kwa Yakobo kunandetele wunyengwe. Pe nazimbi bipata byendi, nikapanika munzi na baya balimo nimwabo ku bamalamo.”

⁹ Ndi bantu likumi bakashala mu litala limo nabo kami bakafwa.

¹⁰ Ndi kawushinda wa muntu, uya ukamuhokesha, ukeza mu kututwisha bifupa mu litala, niho ukepula uya uli mu kampenci ka litala ngayi, “Kati kushili umo uli hamo nanenu ndi?” Ukakumbula ngayi, “Byo,” pe ukamba ngayi, “Mwena, kaliha tunafwanini ku toya lizina lya Nyambi ya Ngula.”

¹¹ Mona! Nyambi ya Ngula unakulayelela ngayi matala amanene na nawa amashe, nimwawo akanyemuniwa.

¹² Kati bambishi ba kutwesha kwituka ha mamanya ndi? Muntu ukutwesha kulima mu liwate na zingombe ndi? Ngoboni enu munafutulu kuyata kwakwoloka kwinga wulembe na mbuto ya kwoloka kwinga mutondo wawululu.

¹³ Enu mu ku wahilila ha kukoma Londemba na kwamba ngayi, “Nka twakomene Kalanaima na ngovu zetu ndi?”

¹⁴ Ebye nibyo anakwamba Nyambi ya Ngula, Nyambi wa Makunge ngayi, “Haya monenu, enu baka litala lya Ishalela, nikatumeza litunga kwiza na kumi lwisha, pe bakamiyandisha ku balika ku menginino a Hamati ku ncelele, kutwala naku mukulo wa Alamba ku mabukubuku.”