Amoshi 4 - Libuka Lya Kuyela

¹ Yuvwililenu elye lizu, enu bambuyama bamu Shamaliya, enu muli na kushuwa ngonehe zingombe za ku Mbashani, enu mu kuyandisha bancepwe, enu mu kulyatilila bakakuyanda, enu mukwambila bakokwenu ngayi, letenu malovu tunwe.

² Nyambi wa Makunge nalibeze na lizina lyendi lya kuyela ngayi, “Monenu, matena anakwiza oho bakamishimba na tuhanto, hinge wamamaninino kukwenu nimwenu ukenga ngo nyinci uli ku kahanto.

³ Nohobene umo na umo wenu ukatina na kupitila mu matubwa a kembi, pe bakamitandila ku Halimoni.”

Baishalela ba kukwanga kulilongesha

⁴ Nyambi wa Makunge ukwamba ngayi, “Yenu ku Mbetele mukatende wubi, yenu ku Ngilingale, pe mukatende wubi wawingi shikuma, mukatwale zinkombela ku lumenemene na lumenemene na bya wulikumi oho kunapiti matena ahatu.

⁵ Tupulenu linkende lya mumena kwinga nkombela yakukambilila na kubilika zinkombela za kupana na kufunga na kuyikwayanisha. Ebye nibyo mwashinga kutenda enu bantu ba Ishalela, kati kaliha noho ndi?” Ebye nibyo akwamba Nyambi wa Makunge.

⁶ Nabulile kumipanika byakulya mu minzi yenu nimwayo na kapande kekalile mu minzi yenu, hinge noho kaliha mwabokele kukwami. Eshe nisho anamba Nyambi ya Ngula.

⁷ Nakanishile mvula kukwenu oho kushili zingonda zihatu kukuma ku shikati sha kuteza natumine mvula ku munzi umo, pe namukanishile ku munzi wamina, mfuba yimo walokelelemo, ngoboni mu mfuba muya abulile ku lokela, mbuto yalebukile.

⁸ Bantu bayebangilile kufuma mu minzi yamina kuya mu minzi yimina na kushinga mema akunwa, ngoboni ku balingana afwako, hinge noho kaliha mwabokele kukwami. Eshe nisho anamba Nyambi ya Ngula.

⁹ Naletele wulweli wakukonyangalisha mbuto yenu na wakushipisha mabizi wayo. Nalobeshele mafuba wenu a mbuto na mafuba wenu a mikabo ya shinyanca na mitondo yenu ya mikuyu naneye ya olive yaliwile ku mikumbi, hinge noho kaliha mwabokele kukwami. Eshe nisho anamba Nyambi ya Ngula.

¹⁰ Natumine wulweli wakuliyambwisha wakufweka ngo wamu Engepita. Nazihile bandumbana benu na mukwale. Namiyangwile bambishi benu. Netabilishile livumba lyamu minkungwa yenu kunukila mu mizulu yenu, hinge noho kaliha mwabokele kukwami. Eshe nisho akwamba Nyambi ya Ngula.

¹¹ Nalobeshele bamina hakati kenu ngonehe nalobeshele Shondoma na Ngomola, enu mwengile ngo shishinzi banayokolo mu mundilo, hinge noho kaliha mwabokele kukwami. Eshe nisho anamba Nyambi ya Ngula.

¹² Nohobene ebye nibyo nikatenda kukwenu enu Baishalela, haya liwahishilenu kuyata kwami.

¹³ Ou walengele mapili na kulenga mpepo, na kutontolola bihanganiko byendi ku muntu, ou wafutulanga wezi kwinga mincimpwe, na kwenda ha binkanda bya hano hanci, lizina lyendi niye Nyambi ya Ngula, Nyambi wa Makunge.