Amoshi 3 - Libuka Lya Kuyela

¹ Enu bantu ba Ishalela, yuvwililenu lizu eli akwamba kukwenu Nyambi ya Ngula, ku lupashi nimwalwo luya afumishile mu Engepita.

² “Kumikoka nimwayo ya hano hanci naliholwele tuhu kukwenu. Haya ni kumishushula ndaba ya wubi wenu nimwawo.”

Nyambi ndi ukwamba Muluwe nafwanini kulubulula

³ Kati bantu babili, ba kutwesha kwenda hamo nibo kuliwana bafwako ndi?

⁴ Kati shimbwi, ukutwesha kukangoka mu lishaka, oho shilolo akwate kayamana ndi? Kati mwana shimbwi ukutwesha kubuluma mu limfwenke lyendi oho kowa eshe alinasho ndi?

⁵ Kati kayoni, kakutwesha kukwatiwa mu kanyimbwa kali hanci, kakubula nkabo ndi? Kati kanyimbwa kakutwesha kumwincuka kwakubula shinalyatamo ndi?

⁶ Kati bantu, kutwesha kutina bafwako ndi mpandula yikutendoka mu lukena? Kati makando akutwesha kuholoka mu lukena, oho Nyambi ya Ngula shilolo awetabilishe ndi?

⁷ Mwa shikuma Nyambi ya Ngula, Mpandashilanga kutenda shuma kwakubula ku shiholola ku bakamilimo bendi bamiluwe wufwako.

⁸ Ndi shimbwi unakukangoka, yani ukubula kutina? Oho Nyambi wa Makunge akwamba, yani ukutwesha kukana kulubulula?

Makando a Shamaliya

⁹ Tongweza bipata bya Ashindondi na bipata bili mu litunga lya Engepita ngayi, “Likungwilenu ha mapili a Shamaliya, mumone wukalu unezilili Shamaliya na makando ali mukati kendi.”

¹⁰ Nyambi ya Ngula unakwamba ngayi, “Aba bantu kulimuka kutenda shiwahe bafwako, banalikongele bya mishunga na bya wizi mu bipata byabo.”

¹¹ Nohobene Nyambi wa Makunge ukwamba ngayi, “Kamalamo ukazinguluka litunga na kunyemuna bipata byenu na kupukula misheke yenu.”

¹² Nyambi ya Ngula ukwamba eshe ngayi, “Ngonehe mulishani ayangwishanga maulu abili hinge litu lya mbelele ku mayewe a shimbwi, nisho tuhu eze bakalamwiniwe bantu ba Ishalela baya bekala mu Shamaliya, baya bali mu bipona byabo na ha malili wabo akukatalila.”

¹³ Nyambi wa Makunge, Nyambi Wangovu nimwazo, ukwamba ngayi, “Yuvwilila na kupana wupaki mu litala lya Yakobo.

¹⁴ Ha mutena nikashushula Ishalela ndaba ya wubi wendi. Nikashiwula tuula twamu Mbetele, pe mashengo aku tuula akaketoliwa na kuwayumbila hanci.

¹⁵ Nikashiwula matala a mupepo hamo na matala a mayinza, pe matala akuyenga na mayewe a banzovu akashiwuliwa na matala amanene akamana,” Eshe nisho anamba Nyambi ya Ngula.