Amoshi 2 - Libuka Lya Kuyela

Mowambi

¹ Eshe nisho akwamba Nyambi ya Ngula ngayi, “Bantu Bamowambi banatende wubi wawingi shikuma, mwa shikuma nikabashushula, ndaba bahandwile mwene wa Endoma ha kuhokesha bifupa byendi.

² Haya nikabangiza mundilo ha litunga lya Mowambi, pe ukahokesha bipata bya Keliyoti, bantu Bamowambi bakafwila mu miyoyo ya mishunga naku mungunina wa bakanzita na kutendoka kwa zimpandula.

³ Nikanongesha kalela wabo hamo nakuziha babilolo bendi nimwabo.” Eshe nisho akwamba Nyambi ya Ngula.

Yunda

⁴ Eshe nisho akwamba Nyambi ya Ngula ngayi, “Bantu ba Yunda banatende wubi wawingi shikuma, mwa shikuma nikabashushula, ndaba banalimbululu ndayano za Nyambi ya Ngula, kami banabulu kulama kufundiziza kwendi, ba nyambi babo ba mahalo aba bankakazabo bombatalilenga bana bashanwishi.

⁵ Haya nikabangiza mundilo ha litunga lya Yunda, pe ukahokesha bipata bya Yelushalema.”

Kuyata kwa Nyambi ha Ishalela

⁶ Eshe nisho akwamba Nyambi ya Ngula ngayi, “Bantu ba Ishalela banatende wubi wawingi shikuma, mwa shikuma nikabashushula, ndaba bakulandisha bantu bakulunga banakwanga kuyumba mukuli na shiliva na ba kushepwa banakwanga kuyumba mukuli wa makatulo.

⁷ Bakulyatilila ba kushepwa, ba kuyata na shihota byambo bya bakakuyandishiwa. Muntu na tatiyendi bakalala mbuyama umo wa ndungo, pe bakuhandula lizina lyami lya kuyela.

⁸ Bakulangana ku nkumo ya kaala ha bivwalo bya kukwata ku mukuli. Bakunwina waine mu Litala lya Nyambi yabo iya banayangulu baka mikuli yabo ya mali.

⁹ “Hinge noho nanongeshele Baamoli ku meho wabo, hinge ndi bengile babatali ngonehe mitondo ya shinda na ku shuma ngo mitondo ya kukoma ya Oka. Nanongeshele mikabo yendi ya kuyilu na mipishi yendi ku nceto.

¹⁰ Namifumishile kami mu litunga lya Engepita namitwamininine mu libelelengwa mu myaka makumi anaa, ngayi mukatambule litunga lya Baamoli.

¹¹ Pe nahatile bamo ha bana benu babalume kwinga bamiluwe, ha bandumbana benu nahatileho bamo kwinga Banazaleti. Enu Baishalela, kati kaliha noho ndi? Ebye nibyo anakwamba Nyambi ya Ngula.

¹² Ngoboni mwa kandamikile Banazaleti ku nwa waine na kutongweza bamiluwe ngayi balehesho ku lubulula.

¹³ Haya nikamicancwela hanci ngonehe koloyi yinenzala na mpeka, yacancwelanga shuma shili mu nceto.

¹⁴ Bakakwituka shikuma kukapanza bafwako na bakangovu kukekala na nyala bafwako. Mukanzita kukapulwisha wumi wendi wufwako.

¹⁵ Muka shipando sha mukunzi kukatwesha kukemana wufwako, mukanzita uya wafukumukanga lubilo kukatwesha kutina wufwako. Mukakukandama ha mbishi kukapulwisha wumi wendi wufwako.

¹⁶ Ha mutena uyo hinge bakanzita ba kukanca, bakatina muhelengwa.” Eshe nisho akwamba Nyambi ya Ngula.