2 Timoteo 3 - Libuka Lya Kuyela

Matena aku kotoka

¹ Anuka ngayi ha matena aku kotoka kukekala bikati byabikalu.

² Bantu bakenga bakakulihaka nibobene, baka ku haka mali, bakakulilundumika, bakakuliyemeza, bakalihandu, bakakubula kwombatala bahemi babo, bakakubula kukambilila na bakakubula Wunyambi,

³ bakakubula nceshe, bakakubula kuyatila, Bakakatungwila, bakamishunga, babakali na bakakuzimba byabiwahe,

⁴ bakakubeba baminabo, bakenga binkwange, bakakulikatula, baka ku haka myelembo kupitakana ku haka Nyambi,

⁵ baka ku moneka ngonehe ba kutenda bya Wunyambi ngoboni ba kukana ngovu za Wunyambi. Benguka ku bantu banoho.

⁶ Bamo kukwabo bakuya ku matala a bantu, bakwongeza bambuyama ba kupopa aba bali na miziho yayilemu ya wubi. Bakazi aba ba kutwamininiwa na mahungu amabi a mishoboshobo,

⁷ shikati nimwasho bakushinga kulilongesha, ngoboni kutwesha kukuma ku kalimukisho kakupwisha bafwako.

⁸ Nehi Yaneshi na Yambulashi baya bakananganine Moshesha, aba bantu kami ba kukanangana kupwisha, bantu bakubula kuhanganika shiwahe, bakakukwanga mu kukulupila.

⁹ Ngoboni kukaya kumbili bafwako, ndaba kuyeba kwabo kukamoneka ku bantu nimwabo, ngonehe kwatendiwile kuli Yaneshi na Yambulashi.

Kufundiziza kwa mamaninino

¹⁰ Ngoboni obe Timoteo unalimuku shikuma ku longesha na kuyoya kwami, shifungo shami, kukulupila kwami, lukakatila lwami, shishemo shami na lunzewe lwami,

¹¹ makando na makalikiza ami, byatendiwile kukwami mu Antiyoke, mu Ikoniyamu na mu Lishitila, nekalile mu makando amanene shikuma. Ngoboni, Nyambi wancobolwele ku nimwabyo.

¹² Bantu nimwabo bakushinga kuyoya mu Wunyambi muli Kilishitu Yeshu bakayandishiwa.

¹³ Ngoboni bakawubi na bakamahalo bakatakalala mu wubi, bakwongeza bantu nanibo kami bakwongeziwa.

¹⁴ Ngoboni obe zamina mu byuma unalilongeshe na kushumisha mu kukulupila. Ndaba obe ukulimuka ou unakulongeshebyo,

¹⁵ kufuma kuwanuke wobe unalimuku byatikitiwa bya kuyela, ebye bikutwesha kukupana ngana za kutwala ku kupuluka mu kukulupila muli Kilishitu Yeshu.

¹⁶ Byatikitiwa nimwabyo byaholokele na Moyo wa Nyambi bikuyavwa kuku longesha, ku shiwulula, kutengulula na kufundiziza ngayi muntu ayoye mukwoloka,

¹⁷ ngayi muntu wa Nyambi enge wakulembuluka na kulibalakanya kutenda milimo nimwayo yayiwahe.