2 Timoteo 1 - Libuka Lya Kuyela

¹ Ami Paulu, ntumwana wa Yeshu Kilishitu na shifungo sha Nyambi natumiwi kuya na ku shimikila shikulupisho sha wumi ou tuli nawo muli Kilishitu Yeshu.

² Kuli obe Timoteo, mwanami wakuhakiwa, nceshe na shikeketima na ku mwena, binafumu kuli Nyambi Tate na Kilishitu Yeshu Mwene wetu bikale nobe.

Kukambilila na ku shumankanishiwa

³ Nikukambilila kuli Nyambi ou nikutendela milimo na bihanganiko bya ku shoboloka ngonehe batendelenga bankaka zami. Namukambililanga oho na kwanukanga mu malombelo ami wushiku na mwaana.

⁴ Oho nanukanga mihozi yobe nashinganga shikuma kuku mona ngayi ninzale na ku wahilila.

⁵ Nikwanuka kukulupila kwobe kwakubula shishweka, kukulupila kwobe ngonehe kuya kwekalile ha kutatika muli nkaka yobe Loishi na muli mandiyobe Yunishi na kulupili ngayi na nobe kami ulinakwo.

⁶ Nohobene nikukwanukisha ngayi uhambize shishemo eshe Nyambi ayakile mumwobe oho na kukambikile maboko.

⁷ Ndaba Nyambi kaliha watupanine moyo wa bowa, ngoboni wa ngovu na shishemo na kulilama shiwahe.

⁸ Hinga wikala na lisheni kupaka bya Mwene wetu, hinge kwikala na lisheni na nami kayili ka Kilishitu, ngoboni winge mukakutambula shitapilo sha makando a ncango zaziwahe na ngovu za Nyambi.

⁹ Nyambi unatupulwishi na kutwihana ngayi twinge bantu bendi, kaliha ndaba yanebye twatendele, ngoboni ndaba ya shifungo shendi na nceshe zendi. Eze nceshe zapanikiwile kukwetu muli Kilishitu Yeshu oho nimwabyo shilolo bitatike,

¹⁰ ngoboni wuluno unabihololo kukwetu kupitila mu kuholoka kwa Mulamwini wetu Yeshu Kilishitu, ou unamanishi ngovu za lufu, kami kupitila mu ncango zaziwahe unalete wumi wa mwaya myaka.

¹¹ Nyambi wahatile kuya na ku shimikila, kwinga ntumwana na mulongeshi wa ncango zaziwahe,

¹² ndaba ya byuma ebye, nibyo nami kami nikuyandila. Ngoboni lisheni nifwalyo, ndaba nikulimuka ou na kulupili ngayi ukutwesha kulama ebye nakongele kukwendi kutwala ku Mutena uyo.

¹³ Zamina ku mazu akupwisha, awa unayuvwu kukwami kwinga mwanza ou unafwanini kukonka, tenda byuma mu kukulupila na shishemo muli Kilishitu Yeshu.

¹⁴ Lama byuma byabiwahe byakongiwile mumwobe na kuyavwiwa kwa Moyo wa Kuyela ou wekala mumwetu.

¹⁵ Ukulimuka ngayi bantu nimwabo ba mu litunga lya Esha na Fwingelashi na Hemongenashi banamfutamini.

¹⁶ Mwanga Mwene ekale na nceshe ha litala lya Oneshifwelashi, ndaba bikati byabingi wankatulwishile, kami kaliha wekalile na lisheni na nami hinge oho namangiwile na mawenge.

¹⁷ Ngoboni oho akumine mu Loma, wancingancingile shikuma, hantu angwanine.

¹⁸ Nikulomba ngayi Mwene amupane nceshe Oneshifwela ha Mutena uyo! Ukulimuka shiwahewahe ebye atendele kukwami mu Efweshe.