2 Teshalonika 3 - Libuka Lya Kuyela

Tulombelelenu

¹ Ha kumanishilila, bawushinda, tulombelelenu, ngayi lizu lya Mwene lipanzane shawangu, ngayi mwanga litambuliwe na maleema, ngonehe lyengile kukwenu.

² Kami tulombelelenu ngayi atulamwine ku bantu bakuluwa na ku bakawubi ndaba kaliha ngayi bantu nimwabo banakulupili.

³ Ngoboni Mwene wa kupwisha, ukamishumisha na kumi lama shiwahe ku Mukawubi.

⁴ Tunakulupili muli Mwene ngayi enu muli na kutenda, kami mukatwalililaho kutenda byuma biya tukumitongweza.

⁵ Mwanga Mwene atwaminine mitima yenu mu shishemo sha Nyambi na mu lunzewe lwa Kilishitu.

Mulimo waku fwanina kutenda

⁶ Wuluno tukumitongweza, bawushinda, mu lizina lya Mwene wetu Yeshu Kilishitu ngayi mulifumishe ku mukakukulupila nimwendi uya uli na wuvwa, uya ukubula kukonka shihemwa shiya twamilongeshele.

⁷ Ndaba enu bamwine mu kulimuka ngayi munafwanini kutuhembwiliza, ndaba etu kaliha twekalile na wuvwa oho twekalilenga nenu.

⁸ Kami kaliha twalile byakulya bya muntu wamina kwakubula ndando, ngoboni twatendele milimo na litengela wushiku na mwaana, ngayi mwanga tubule kupana wulemezezi muntu wamina kukwenu.

⁹ Twatendele ebye kaliha ngayi twabulile ngovu za kushinga kukwenu ebye binatufwanini, ngoboni ngayi tulitende shihembwilizo kukwenu ngayi mutukonke.

¹⁰ Ndaba hinge oho twekalile nenu twamitongwezele ngayi ndi muntu kushinga kutenda milimo wufwako, pe hinga alya.

¹¹ Ndaba tunayuvwu ngayi kuli bamo mukati kenu bali na wuvwa, baya bakubula kushinga kutenda milimo, ngoboni bakwendangana tuhu.

¹² Wuluno aba banoho tukubatongweza na ku bakowamina muli Mwene wetu Yeshu Kilishitu ngayi, bekale shiwahe, kami batende milimo mwanga baliwanine byakulya byabo nibo bamwine.

¹³ Ngoboni enu bawushinda, hinga muyuvwa kukwanga ha kutenda shiwahe.

¹⁴ Ndi muntu wamina ukubula kwombatala awa mazu tunamitumini omu mu liñwati, mupenzesheshenu muntu wanoho, kami mubengukenu ngayi ekale na lisheni.

¹⁵ Ngoboni hinga mumushimba ngo mukankole, ngoboni mwambilenu ngonehe mwambanga na kawushinda.

Mazu amamaninino

¹⁶ Mwanga Mwene ou mukakupana ku mwena, amipane ku mwena shikati nimwasho na mu zinzila nimwazo. Mwene ekale nenu nimwenu.

¹⁷ Ami Paulu nikutikita na liboko lyami ngayi, Shangwe. Nohobene, nisho nayakanga shilimukisho mu mañwati ami nimwawo, kami nisho natikitanga.

¹⁸ Nceshe za Mwene wetu Yeshu Kilishitu zikale nenu nimwenu.