2 Shamwele 9 - Libuka Lya Kuyela

Ndavita na Mefwimbosheti

¹ Mutena umo Ndavita wepwile ngayi, “Kati kwashala umo ku ba lupashi lwa Shaulu ndi? Ndi kwali, nikushinga kumuholwela nceshe ndaba ya Yonatana.”

² Kwekalile mukamulimo waku ba lupashi lwa Shaulu watumbiwile ngayi Ziba, pe bamutongwezele kuya kuli Ndavita. Mwene wepwile ngayi, “Obe Ziba ndi?” Ziba wakumbwile ngayi, “Ingoi, amibene, hekulu.”

³ Mwene wamwipwile ngayi, “Kati kwashala umo ku ba lupashi lwa Shaulu ndi? Ou nikutwesha kuholwela nceshe ngonehe eshe na kulupishile Nyambi ngayi nikashitenda ndi?” Ziba wakumbwile ngayi, “Kushili umo ku bana ba Yonatana babalume, owe wapenga.”

⁴ Mwene wepwile ngayi, “Wekala kuti?” Ziba wakumbwile ngayi, “Ku litala lya Makiya mwana Amiyele mu Londemba.”

⁵ Mwene Ndavita wamutuminine ntumwana kuya mu kumuleta kuya ku litala lya Makiya mwana Amiyele mu Londemba.

⁶ Mefwimbosheti muzukulya Shaulu mwana Yonatana, akumine, wafunkamine hanci ku meho a Ndavita na maleema. Ndavita wambile ngayi, “Obe Mefwimbosheti ndi?” Niye wakumbwile ngayi, “Ingoi, amibene, hekulu.”

⁷ Pe Ndavita wakumbwile ngayi, “Hinga utina. Nikaholola shishemo kukwobe ndaba ya tatiyobe Yonatana. Nikakubweshela mafuba nimwawo aya engilenga a nkaka yobe Shaulu, pe shikati nimwasho ukezanga mu kulya ku tebulu yami.”

⁸ Niho kami Mefwimbosheti ashinkamine pe wambile ngayi, “Obe hekulu, ami kawa wakulifwila. Kati shumangani ukunyuvwila nceshe?”

⁹ Niho mwene ehanine Ziba, mukamulimo wa Shaulu, pe wambile ngayi, “Nili na kupana Mefwimbosheti, muzukulya hekulyobe Shaulu, byuma nimwabyo biya byengile bya Shaulu na ba lupashi lwendi.

¹⁰ Pe obe na bana bobe babalume na bakamulimo bobe bakalimanga mafuba aba lupashi lwa hekulyobe Shaulu, bakawanengako byakulya. Ngoboni Mefwimbosheti ukalilanga ku tebulu yami shikati nimwasho.” (Ziba wekalile na bana babalume likumi na mutanu na makumi abili a bakamilimo.)

¹¹ Niho Ziba akumbwile ngayi, “Nikatenda nimwabyo ebye anatoyo hekulu.” Niho Mefwimbosheti alilenga ku tebulu ya mwene ngonehe umo wa bana ba mwene babalume.

¹² Mefwimbosheti wekalile na mwanendi wamushe wa ndumbana watumbiwile Mika. Nimwabo ba lupashi lwa Ziba bengile bakamilimo ba Mefwimbosheti.

¹³ Niho Mefwimbosheti, ou wapengele mawulu nimwawo, wekalilenga mu Yelushalema halilanga byakulya byendi nimwabyo ku tebulu ya mwene matena nimwawo.