2 Shamwele 8 - Libuka Lya Kuyela

Kukoma kwa bakanzita ba Ndavita

¹ Oho kwapitile shikati mwene Ndavita walwishile Bafwilishitina, pe wabakomene na kumanisha ngovu za kulela kwabo mu litunga.

² Ndavita wakomene Bamowambi. Walalikile bantapwa hanci na kuziha babili mukati ka bantu bahatu. Bamowambi bashalileho bengile bantu bendi na kutela mutelo kukwendi.

³ Pe kami Ndavita wakomene mwene Handandeza, mwana Lehobi, wamu litunga lya Zomba mu Shiliya, oho Handandeza ayilenga mu kuhongolola ngovu zendi za mwaka zaha litunga lyekalile ku mutwe wa mushinzi wa Yufuleti.

⁴ Ndavita wapukwile 1,000 makoloyi wendi a nzita na 7,000 a bakanzita bakakukandama ha bambishi na 20,000 a bakanzita bakwenda hanci. Walelele bambishi ba kufwanikiza ku makoloyi 100, kami wingi wabo wabaketwile makana.

⁵ Oho Baalamu ba ku Ndamashika batumine bakanzita kwiza mu kuyavwa Mwene Handandeza waku Zomba, Ndavita wabalwishile pe wazihileho bantu 22,000.

⁶ Niho Ndavita azikile minkungwa ya bakanzita mu litunga lyabo, bengile bantu bendi kami batelelenga mutelo kukwendi. Nyambi ya Ngula wakomeshele Ndavita nimwako.

⁷ Ndavita wapukwile makebo a ngolinde aya bashimbilenga babilolo ba Handandeza na ku watwala ku Yelushalema.

⁸ Washimbile lubemba lwalwingi lwaku Mbeta na Mbelota, minzi alelelenga Handandeza.

⁹ Oho Mwene Toyi waku Hamati ayuvwile ngayi Ndavita unakomo bakanzita ba Handandeza nimwabo

¹⁰ pe watumine mwanendi wa mulume Yolama mu kushangwisha Mwene Ndavita na kumuyemeza ha kukoma Handandeza, ou walwishilenga Toyi bikati byabingi. Yolamu kami watwalile bishemo kuli Ndavita bya ngolinde na shiliva na lubemba.

¹¹ Mwene Ndavita wabifungwilile kuli Nyambi ya Ngula kwinga bya kuliyavwisha mu kulemesha, hamo na shiliva na ngolinde eye ashimbile ku matunga awa akomene.

¹² Engile Endoma na Mowambi na Amoni na Fwilishitina na Amaleki na shitika sha lipuku ashimbile kuli Handandeza mwana Lehombu mwene waku Zomba.

¹³ Ndavita watumbalalile shikuma oho abokele mu kuziha Baendoma 18,000 mu mukulo wa mushele.

¹⁴ Wazikile minkungwa ya bakanzita mu litunga nimwalyo lya Endoma, pe bantu ba kuyo bafutukile kwinga bantu bendi. Nyambi ya Ngula wakomeshele Ndavita nimwako kuya ayilenga.

¹⁵ Ndavita walelele Ishalela nimwayo pe wamonene ngayi bantu bendi banekalishiwi shiwahe mu ku mwena.

¹⁶ Yowambu mwana Zeluya, wengile mukulwane wa bakanzita. Yehoshafwati mwana Ahilundi wengile mukulwane mukakulama byatikitiwa.

¹⁷ Zandoki mwana Ahitumbi na Ahimeleki mwana Ambiyatale bengile bakankombela. Shelaya wengile mukakutikita wamu nkuta.

¹⁸ Mbenaya mwana Yehoyanda wengile mukulwane wa bakelete na bapelete. Bana ba Ndavita bengile bakakubela mwene.