2 Shamwele 7 - Libuka Lya Kuyela

Mazu a Natani kuli Ndavita

¹ Haya mwene Ndavita oho wekalishakale mu musheke wendi, pe kami Nyambi ya Ngula oho wamulamakale ku bamalamo bendi nimwabo.

² Niho mwene ambile kuli muluwe wa Nyambi Natani ngayi, “Mona. Ami nili na kwikala mu litala linatendiwi na bishimi bya mutondo wa shinda, ngoboni Likwati lya Kulimama lya Nyambi linatentekiwi mu ntanda.”

³ Natani wakumbwile mwene ngayi, “Tenda eshe shili mu mutima wobe, ndaba Nyambi ya Ngula uli hamo na nobe.”

⁴ Ngoboni wushiku uyo lizu lya Nyambi ya Ngula lyezile kuli Natani ngayi,

⁵ “Yanga na kutongweza mukamulimo wami Ndavita ngayi, ‘Kati obe ukantendela litala mwa kwikala ndi?

⁶ Ku balika ku shikati shiya nalamwinine bantu ba Ishalela mu Engepita kuleta ni shikati shino, hinga natanga kwikala mu litala, nekalilenga mu ntanda omu twapitile na kwenda nimwamo.

⁷ Omu twapitile na kwenda na bantu ba Ishalela nimwabo hinga natanga kunyepa hinge umo wa bakakutwaminina baya nemikile ngayi shumangani mwabula kunzikila litala na mutondo wa shinda.’

⁸ “Nohobene tongweza mukamulimo wami Ndavita, eshe nisho akwamba Nyambi wa Makunge ngayi, ‘Nakufumishile mu mabuyishilo muya wabuyishilenga bambelele na kukwinga kalela wa bantu bami ba ishalela.

⁹ Nekalilenga nobe oku nimwako wayilenga, pe nakomene bamalamo bobe nimwabo aha wayilenga na kulikaka. Nika kutumbalalisha ngonehe bakakutwaminina babanene ba hano hanci.

¹⁰ Nahatili mwanya bantu bami ba Ishalela na kubazikishamo, oku bakekalenga kwakubula muntu wakubayandisha kami.

¹¹ Hinga benginina muno mu litunga bonzelanga kubalwisha ku bantu bababi, ngoboni eshe kukamoneka kami shifwako. Nakulupishi kukoma bamalamo bobe na kuzika litala lyobe, pe wene wobe kukamana wufwako.

¹² Oho wakafwa ukafundiwa kwa fundiwa bankakazobe. Nikashwanisha umo ha bana bobe kwinga mwene, pe nikalama wene wendi na ku wushumisha.

¹³ Niye muntu ou ukazikila lizina lyami litala, pe nikamona ngayi kulela kwendi kukekala mwaya myaka.

¹⁴ Nikenga tatiyendi, niye ukenga mwanami. Oho akabipisha, nikamushushula ngonehe tata muntu ashushulanga mwanendi wa mulume.

¹⁵ Ngoboni kukamuyuvwila shishemo sha mwaya myaka nifwako ngonehe shiya natendele kuli Shaulu. Ou nafumishile ngayi obe mwanga winge mwene.

¹⁶ Ukekala na bazukulu shikati nimwasho, pe nikashumisha wene wobe kwihala mwaya myaka. Litanda lya wene wobe kukamana lifwako.’”

¹⁷ Natani watongwezele Ndavita biya nimwabyo Nyambi ya Ngula aholwele kukwendi.

Lilombelo lya Ndavita lya kukambilila

¹⁸ Niho mwene Ndavita enginine mu ntanda ya ku meho a Nyambi ya Ngula. Wekalile hanci na kulombela ngayi, “Obe Nyambi ya Ngula, kati ami yani kami ba lupashi lwami bayani kukwobe, ngayi untendele ebye nimwabyo?

¹⁹ Haya Obe Nyambi wa Makunge, unapitakana mukutenda noho, unatende bikulupisho bya ku bazukulyami ku myaka ya kumbili. Obe Nyambi wa Makunge, pe kami, unetabilishi ngayi muntu amone ebye unatende kukwami.

²⁰ Obe Nyambi wa Makunge, nikutwesha kwamba bishini kukwobe. Obe ulimuka muka mulimo wobe.

²¹ Shengile sha mutima wobe kami shengile shifungo shobe. Unatende byuma nimwabyo bya kupitakana ngayi mwanga undongeshe.

²² Obe Nyambi wa Makunge. Wunene wobe wakuma hati! Kowa wakufweka, Kami kowa nyambi wamina, Obe tuhu Nyambi tunaliyuvwili na matu wetu.

²³ Kowa litunga lyamina hano hanci lya kufweka ngonehe Ishalela, aba walamwinine ku wulungo na kubenga bantu bobe. Byuma byabinene na bya kukomokesha ebye watendele kukwabo byatwalile mpupo ya lizina lyobe hano hanci nimwaho. Watandile mikoka yashenge na ba nyambi babo oho bantu bobe bayilenga na kulikaka, bantu aba walamwinine mu Engepita kwinga bobe.

²⁴ Unengishi bantu ba Ishalela kwinga bantu bobe mwaya myaka, pe Obe Nyambi ya Ngula wengakale Nyambi yabo.

²⁵ “Pe haya, Obe Nyambi ya Ngula, obe uli Nyambi, shumisha shikulupisho shobe watendele na nami na bazukulyami, shikati nimwasho na kutenda ebye watoyele ngayi ukabitenda.

²⁶ Mpupo ya lizina lyobe yikenga yayinene, kami bantu bakambanga shikati nimwasho ngayi, Nyambi wa Makunge niye Nyambi wa Ishalela. Lehela litala lya mukamulimo wobe Ndavita litangame.

²⁷ Nyambi wa Makunge, Nyambi wa Ishalela. Nili na kukanca ha kulombela lilombelo lino kukwobe, ndaba unahololo ebye nimwabyo kukwami, mukamulimo wobe, kami unantongweze ngayi ukatenda bazukulyami kwinga bamyene.

²⁸ “Haya, Obe Nyambi wa Makunge, Nyambi uya walamanga bikulupisho byobe bikati nimwabyo, pe unatende eshe shikulupisho shashiwahe kukwami.

²⁹ Nikunyepa ngayi mwanga shikuwahililishe kufuywela bazukulyami, ngayi mwanga bazamine kwikala mu nceshe zobe. Obe Nyambi wa Makunge, unakulupishi eshe kami mfuywezi zobe zikekala hahabo mwaya myaka.”