2 Shamwele 5 - Libuka Lya Kuyela

Ndavita ukwinga mwene wa Ishalela na Yunda

¹ Niho mishobo nimwayo ya Ishalela bayile kuli Ndavita ku Hembuloni, pe bambile kukwendi ngayi, “Mona, tunengi lutu lumo na mukeza umo.

² Ku mwaka hinge oho Shaulu engilenga mwene yetu, watwamininenga bantu ba Ishalela ku nzita, Nyambi ya Ngula wakulupishile ngayi ukatwaminina bantu kwinga kalela wabo.”

³ Nohobene bakakutwaminina nimwabo ba Ishalela bezile kuli mwene Ndavita ku Hembuloni. Walimamine nabo ku meho a Nyambi ya Ngula, bamuwabishile kwinga mwene wa Ishalela.

⁴ Ndavita wekalile na myaka makumi ahatu oho engile mwene, niho alelele myaka makumi anaa.

⁵ Walelele mu Hembuloni mu Yunda myaka mutanu na yibili na shitika, pe mu Yelushalema ha Ishalela nimwayo na Yunda, myaka 33.

⁶ Shikati sha kumine oho Mwene Ndavita na bantu bendi bayile mu kulwisha Yelushalema. Bayembushi, aba bazikilenga kuyo, bahanganikile ngayi Ndavita kutwesha kukoma lukena wufwako, pe niho bambile kukwendi ngayi, “Kukenginamo wufwako, hinge kashishitwa na wakupenga ba kutwesha ku kushintulula.”

⁷ Ngoboni Ndavita wapukwile shipata shabo sha Ziyoni, pe nilwo lwalimukiwile ngayi “Lukena lwa Ndavita.”

⁸ Mutena uyo Ndavita wambile ku bantu bendi ngayi, “Kwali muntu kuno wazimba Bayembushi ngonehe nabazimba? Kati shinafwanini ku baziha ndi? Niho mulehenu apite na nzila ya mumpongo wa mema. Akalwishe baya batushishitwa ba kuyanda, ba kupenga,” Eshe nisho shiya shambiwile ngayi, “Tushishitwa na ba kupenga kutwesha kukengina mu Litala lya Nyambi ya Ngula bafwako.”

⁹ Ha kumanisha kupukula shipata, Ndavita wekalilemo, niho ashitumbile ngayi, “Lukena lwa Ndavita” Pe, wazikile lukena kuzingwilishako, kubalikila ku mwanya uyo babuwilile na limvu ku mbalila ya mushamuko wa shinkanda.

¹⁰ Ndavita wakulile na ku shuma shikuma, ndaba Nyambi wa Makunge wekalilenga nendi hamo.

¹¹ Mwene Hilamu waku Tile watumine bantumwana kuli Ndavita. Wapanikile Ndavita bishimi bya bitondo bya Shinda na bakakubaza na bakakumangula mamanya akuzikisha musheke.

¹² Pe kami Ndavita walimukile ngayi Nyambi ya Ngula wamwikalikakale kwinga mwene wamu Ishalela, kami watangamishilenga wene wendi, ndaba ya bantu bendi.

¹³ Oho Ndavita watuntukakale mu Hembuloni kuya mu Yelushalema wayekele bambuyama babengi na bakazendi bakwinginina. Pe bana bendi babalume na babambuyama bavulile.

¹⁴ Aba nibo bana bahemuwile kukwendi mu Yelushalema, bengile ba Shamuwa na Shobabu na Natani na Sholomoni,

¹⁵ na Imbaha na Elishuwa na Nefwengi na Yafwiya,

¹⁶ na Elishama na Eliyanda na Elifweleti.

Ndavita ukukoma Bafwilishitina

¹⁷ Bafwilishitina oho bayuvwile ngayi Ndavita bamwingakale mwene ha litunga nimwalyo lya Ishalela, niho bakanzita babo bayile na kumushinga shinga ngayi bamukwate. Ngoboni Ndavita wayuvwileko, pe wayile ku shipata sha ku shuma.

¹⁸ Bafwilishitina bakumine ku mukulo wa Lefwayima na kutulilako.

¹⁹ Ndavita wepwile Nyambi ya Ngula ngayi, “Kati niye na ku lwisha Bafwilishitina ndi? Kati ukabampana ndi?” Nyambi ya Ngula wakumbwile ngayi, “Ee, yanga ukalwe. Nika ku panabo.”

²⁰ Ndavita wayile ku Mbaalu Pelazimu, pe wakakomene Bafwilishitina. Wambile ngayi, “Nyambi ya Ngula u na kupulu bamalamo bami ngonehe libazi lya kupulanga.” Nohobene mwanya watumbiwile ngayi Mbaalu Pelazima.

²¹ Bafwilishitina oho batinine, bashiyile tunankishi twabo, pe Ndavita na bantu bendi batushimbile.

²² Bafwilishitina babokele ku Mukulo wa Lefwayima pe bawukomene.

²³ Ndavita wepwizizile kuli Nyambi ya Ngula. Pe wamu kumbwile ngayi, “Hinga ubalwisha kuno, ngoboni yanga lishetenu ku zinguluka ngayi ubalwishe, pe waliwahishile kubalwishila kuliyahikiza hahepi na mitondo ya Mbalashama.

²⁴ Oho mukayuvwa mishindo ya kwenda mu mitwe ya mitondo ya mbalashama, pe lwenu ndaba nikenda ku mbili yenu mu kukoma bakanzita ba Bafwilishitina.”

²⁵ Ndavita watendele eshe alayelele Nyambi ya Ngula. Pe watweshele kutanda Bafwilishitina ku Ngemba kuka bakumisha naku Ngeza.