2 Shamwele 3 - Libuka Lya Kuyela

¹ Ngunga yashimbile shikati shashitali mukati ka bakanzita bemaninine lupashi lwa Shaulu na bakanzita aba bemaninine Ndavita. Aha ngovu za Ndavita zanenehele shikuma, pe ngovu za bamalamo bendi zapopele shikuma.

Bana ba Ndavita babalume

² Aba nibo bana ba Ndavita babalume bahemuwilile ku Hembuloni, kuya ngo omu balikonkelele. Wakutatika wengile Aminoni, mandiyendi wengile Ahinoma, waku Yezilelu,

³ wa wubili wengile Kiliyambi, mandiyendi Ambingelu, mfwile wa Nambalu, waku Kamela. Wawuhatu wengile Ambishalome, mandiyendi wengile Maaka, mwana mwene Talimayi waku Ngeshula,

⁴ wa wunaa wengile Andoniya, mandiyendi wengile Hangati, wa mutanu wengile Shefwatiya, mandiyendi Ambitali.

⁵ Na wa mutanu na umo wengile Itileyemu, mandiyendi wengile Engila. Nimwabo aba bana babalume bahemuwilile kuli Ndavita mu Hembuloni.

Ambina ukulifungila na Ndavita

⁶ Oho nzita yatwalilileho mukati ka bakanzita ba Ndavita na bakanzita baya bengile bakulunga ku lupashi lwa Shaulu, ngovu za Ambina zanenehele shikuma mukati ka bakakukonka Shaulu.

⁷ Mutena umo Ishi-Mbosheti, mwana Shaulu wapanikile mulandu Ambina wakulala na Lizipa mukaza Shaulu wakwinginina, mwana Aiya.

⁸ Eshe shapilamishile shikuma Ambina ndaba ya mazu a Ishi-Mbosheti, pe wakumbwile ngayi, “Kati ukuhanganika ngayi nikubeba Shaulu ndi? Kati ukuhanganika ngayi nikutendela milimo Yunda ndi? Kufuma bene ku kutatika nenga wa shishemo kwimanina tatiyobe Shaulu na bawushinda wendi na bahoni bendi, kami namilamwinine kuli Ndavita ngayi mubule kukomiwa. Ngoboni lelo uli na kunyata na mulandu wakulala na mbuyama.

⁹ Nyambi ya Ngula walibezele hali Ndavita ngayi ukashimba wene kuli Shaulu naku bazukulyendi na kuyaka Ndavita ku mwinga mwene wa Ishalela nawa Yunda,

¹⁰ kubalika kunkumo ya litunga lya Ndani kukakuma ku nkumo ya Mbetishemba. Haya Nyambi mwanga ankame nifwe, ndi kutenda eshe kwinga sha kupwisha nifwako.”

¹¹ Ishi-Mbosheti kaliha wakumbwile hinge lizu limo ndaba watinine shikuma Ambina.

¹² Ha shikati shiyo Ndavita ekalilenga ku Hembuloni, pe Ambina watumine bantumwana kukwendi na kwamba ngayi, “Kati lino litunga ukalilela yani? Toko tuliyuvwashane na nami, pe nika kuyavwa kuleta Ishalela nimwayo kumbalila yobe.”

¹³ Ndavita wakumbwile ngayi, “Shinawaha. Ngoboni, nikaliyuvwashana na nobe tuhu ha shuma shimo. Ndele wize na Mikale mwana Shaulu wa mbuyama kukwami oho ukwiza mu ku mona.”

¹⁴ Niho Ndavita atumine kami bantumwana kuli Ishi-Mbosheti mwana Shaulu na kwamba ngayi, “Mpanike mukazami Mikale. Namulundilile myanda ya bikonde bya hambili bya Bafwilishitina ngayi mwanga nimuyeke.”

¹⁵ Nohobene Ishi-Mbosheti wamufumishile kuli mukokwendi Palitiyelu, mwana Laisha.

¹⁶ Palitiyelu wamukonkele haya na kulila ha nzila nimwayo, kukakuma ku munzi wa Mbahulima. Ngoboni Ambina wambile ngayi, “Boka ku munzi.” Pe, wabokele.

¹⁷ Ambina wayile kubakakutwaminina ba Ishalela pe wambile kukwabo ngayi, “Mwashingilenga Ndavita ngayi enge mwene yenu shikati shashitali.

¹⁸ Haya nisho shikati shenu. Anukenu ngayi Nyambi ya Ngula wambile ngayi, ‘Nikatendesha mukamulimo wami Ndavita kulamwina bantu bami Ishalela ku Bafwilishitina naku bamina bamalamo babo nimwabo.’”

¹⁹ Ambina wambile kami ku bantu ba mushobo wa Mbenjamani, pe niho ayile ku Hembuloni mu kutongweza Ndavita ebye banetabili kutenda bantu ba Mbenjamani na Ishalela.

²⁰ Oho Ambina ezile kuli Ndavita ku Hembuloni ngayi, “Nili na kuya haya na kukoma Ishalela nimwayo kukwobe, obe mwene ya ngoma.

²¹ Pe, bakakutambula kwinga mwene, niho ukatambula eshe washingilenga, pe ukalela ha litunga nimwalyo.” Ndavita watongwezele Ambina ngayi aye na kubula kuliyakata.

Ambina ukuzihiwa

²² Ha shikati shiya bene Yowambu na babilolo ba Ndavita babokele ku lipuku, mishiinzi yayingi ya lipuku. Ngoboni, bawanine ngayi Ambina kaliha ushili ku Hembuloni ndaba ya Ndavita wamubweshele ngayi aye na kubula kuliyakata.

²³ Oho Yowambu na bantu bendi bakumine, watongweziwile ngayi Ambina mwana Nela unezi kuli mwene Ndavita kami wamubwesha, ngayi aye na kubula kuliyakata.

²⁴ Nohobene Yowambu wayile kuli mwene pe wambile kukwendi ngayi, “Kati unatende nahiti? Ambina weza kukwobe, obe unamubweshe, haya shumangani unamwitabilishi ngayi aye.

²⁵ Ambina mwana Nela unezi kuno mu kukwongeza na kulimuka byuma nimwabyo ebye ukutenda na nimwako oku ukuya. Mwa shikuma, nobemwine hiulimuka shuma eshe.”

²⁶ Oho ukupenzesha Ndavita mongo, Yowambu watumine bantumwana mu kuleta Ambina, bakamubweshelele ku lishima lya Shila, ngoboni Ndavita kowa shuma alimukile.

²⁷ Pe oho Ambina akumine mu Hembuloni, Yowambu wamutwalile kwa ninkayendi ku kampenci kamo ka mu lipangati lya lukena, ngo muntu washingile kwamba nendi bya kuwi, kwakuyo bene wamushwangile mu livumo. Pe nisho azihiwile Ambina, ndaba wazihile mukonzo wa Yowambu Ashaheli.

²⁸ Oho Ndavita ayuvwileko, waliyawilile ngayi, “Nyambi ya Ngula unalimuku ngayi, ami na wene wami tuli bakubula mulandu ku mponde ya Ambina mwana Nela.

²⁹ Kashushwilo mwanga kawile hali Yowambu na ha balupashi lwendi nimwalwo. Mu mukoka nimwawo mwanga kwikale muntu mu ba lupashi lwendi wa bitombo hinge wa wulweli wakuliyambwisha, hinge umo ou wakupopa, hinge wakuzihiwa ku nzita, hinge wakutamwa byakulya.”

³⁰ Nohobene Yowambu na mukonzo wendi Ambishayi babweshele wubi ku wubi hali Ambina, ndaba wazihile mukonzowabo Ashaheli mu nzita ku Ngimbiyoni.

Ambina ukufundiwa

³¹ Niho Ndavita atongwezele Yowambu na bantu bendi kutabola bivwalo byabo, bavwalile bicancolo pe balilile Ambina. Ha kufunda, Mwene Ndavita wendelenga munyima ya mubanda.

³² Ambina wafundiwile ku Hembuloni, pe mwene walilile shikuma ku shinzimbi, pe na bantu nimwabo batuwumukile kulila.

³³ Ndavita watumbile lubingo hali Ambina ngayi, “Shuma ngani Ambina anafwili ngonehe afwanga muntu wakuyeba?

³⁴ Maboko wendi kaliha amangiwile, na mawulu wendi kaliha ayakiwile mu shikulo. Wafwile ngonehe muntu unazihiwi na bikelemi.” Pe bantu batuwumukile kami kumulila.

³⁵ Niho bantu nimwabo bezekele kukandamika Ndavita kulya shuma shimo, ngoboni walibezele ngayi, “Nyambi mwanga ankame nifwe ndi nikulya shuma shimo oho shilolo mutena ulele.”

³⁶ Pe bantu nimwabo batoshele eshe, kami shabawahilishile. Mwa shikuma, byuma nimwabyo atendelenga Mwene Ndavita byawahilishilenga bantu.

³⁷ Bantu ba Ndavita nimwabo ba Yunda na bantu ba Ishalela nimwabo bamukamukile mu mwanza ngayi mwene kukundama ku mponde ya Ambina mwana Nela wufwako.

³⁸ Mwene wambile ku babilolo bendi ngayi, “Kati kulimuka mufwako ngayi mukakutwaminina wamunene mu Ishalela unafu lelo ndi?

³⁹ Hinge ngayi ninengi mwene awabisha Nyambi, ngoboni lelo nikuyuvwa kupopa. Aba bana ba Zeluya babalume ba mushunga shikuma kukwami. Nyambi ya Ngula mwanga ashushule babikelemi aba hanebye binabafwanini.”