2 Shamwele 24 - Libuka Lya Kuyela

Ndavita ukulaba bantu

¹ Nyambi ya Ngula wapilaminine Ishalela kami, pe wengishile Ndavita kuleta makalikiza hahabo. Nyambi ya Ngula wambile kukwendi ngayi, “Yanga ukalabe bantu ba Ishalela na Yunda.”

² Niho Ndavita atongwezele Yowambu, mukulwane wa bakanzita bendi ngayi, “Yanga na babilolo bobe na kulaba bantu ku mishobo nimwayo yamu Ishalela kubalikila ku Ndani ku kuma ku Mbelishemba. Nikushinga kulimuka ngayi bali banga.”

³ Ngoboni Yowambu wakumbwile mwene ngayi, “Obe mwene ya ngoma, Nyambi ya Ngula, Nyambi yobe, mwanga avulishe bantu ba Ishalela mu myanda yayingi Shikuma kupitakana eshe bali wuluno, pe mwanga obe uyoye na ku mona eshe akubavulisha. Ngoboni shumangani kati obe Mwene ya ngoma ukushinga kutenda eshe?”

⁴ Ngoboni mwene watongwezele Yowambu na babilolo bendi kwombatala mazu wendi, bakatukile kuya mu kulaba bantu ba Ishalela.

⁵ Bazabukile Yondana na kutendela minkungwa ku mabukubuku a Aloya, munzi wa mukati ka mukulo, wamu litunga lya Ngandi. Kufuma kuyo bayile ku Yaza ku ncelele.

⁶ Niho bayile naku Ngiliyande bakakuminine naku Kandeshi mu litunga lya Bahita. Niho bayile ku Ndani, pe kufuma ku Ndani bayile ku Shindoni ku mponci.

⁷ Niho bayile ku Tile ku lukena lwa shipata naku minzi nimwayo ya Bahivi na Bakenaani, pe bayile ku mabukubuku ku Mbelishemba, ku mbalila ya mabukubuku a Yunda.

⁸ Nohobene kunyima ya zingonda mutanu na zinaa na matena makumi abili babokele ku Yelushalema, oho bendakale mu litunga nimwalyo.

⁹ Bashimikile kuli mwene wingi wa bantu ba kutwesha kuya ku mulimo wa nzita bengile 800,000 mu Ishalela, na 500,000 mu Yunda.

¹⁰ Ngoboni oho Ndavita walabakale bantu, wekalile na shitima shikuma, pe wambile kuli Nyambi ya Ngula ngayi, “Nabipishi shikuma ha kutenda nehe. Obe hekulu nyatile. Natende bya ku yeba.”

¹¹ Nyambi ya Ngula wambile kuli Ngandi, muluwe wa Ndavita ngayi,

¹² “Yanga, ukatongweze Ndavita ngayi nili na kumupana kulihatila ha tushushwilo tuhatu. Hataho shuma shimo pe nikashitenda kukwobe.”

¹³ Ngandi wayile kukwendi, wamutongwezele ebye ambile Nyambi ya Ngula. Pe wepwile ngayi, “Kati ukahataho shiti? Kwikala na myaka yihatu ya kapande mu litunga lyobe hinge ndi, kwikala zingonda zihatu za kwituka na kutina bamalamo bobe, hinge kwikala na matena ahatu a wulweli wakuliyambwisha mu litunga lyobe? Haya hanganikaho, pe untongweze nkumbwilo ya kubwesha kuli Nyambi ya Ngula.”

¹⁴ Ndavita wakumbwile kuli Ngandi ngayi, “Nili mu wukalu. Ngoboni kushinga ku shushuliwa ku bantu nifwako. Tulehe Nyambi ya Ngula atushushule, ndaba niye wenga wa nceshe.”

¹⁵ Nohobene Nyambi ya Ngula watumine wulweli wakuliyambwisha ha Ishalela, owe wehalile kubalika ku lumenemene luyo hantu ndele ku shikati eshe ahatile. Baishalela 70,000 bafwile kubalika ku Ndani kukakuma na ku Mbelishemba.

¹⁶ Oho lingeloyi lya Nyambi ya Ngula lyashingile ngayi lilobeshe kami Yelushalema, Nyambi ya Ngula niho alibelulwile bihanganiko byendi bya kushushula bantu, pe wambile ku lingeloyi elye lya bazihilenga ngayi, “Lehasho. Hipelee! Baba babengi!” Lingeloyi lyemanine kwakwipi na likotwelo lya Alauna, wa Kayembushi.

¹⁷ Ndavita wamonene lingeloyi elye lyazihilenga bantu. Pe wambile kuli Nyambi ya Ngula ngayi, “Aba bantu banengi ngonehe bambelele, banatende bishini? Ncushule naba lupashi lwami na ku shiyaho bantu bobe.”

¹⁸ Ha mutena uyo bene Ngandi wayile kuli Ndavita. Niho ambile kukwendi ngayi, “Yanga ku mwanya wa likotwelo lya Alauna pe mu kuzikila kaala Nyambi ya Ngula.”

¹⁹ Nohobene Ndavita wombatalile lizu lya Nyambi ya Ngula pe wayile ngonehe amutongwezele Ngandi.

²⁰ Oho Alauna amonene tuhu mwene na babilolo bendi hibeza kukwendi. Wafunkamine hanci na kulamba kuli Ndavita

²¹ pe wepwile ngayi, “Obe Mwene ya ngoma, shumangani kati eshe munezili kuno?” Ndavita wakumbwile ngayi, “Ninezi na kulanda mwanya wa likotwelo lyobe ngayi mwanga nitweshe kuzikaho kaala ka Nyambi ya Ngula, ngayi tumanishe wulweli wakuliyambwisha.”

²² Alauna wambile ngayi, “Shimba, obe Mwene ya Ngoma. Pe upane kuli Nyambi ya Ngula nimwabyo ebye ukushinga. Mapulu kami ano akuhokesha kwinga nkombela ha kaala, zimpongoho zabo na maleenge ha kupulila bino. Biyavwe ku yibikisha mundilo.

²³ Nimwabyo ebye Alauna wapanine kuli mwene Ndavita.” Pe wambile kukwendi ngayi, “Nyambi ya Ngula, Nyambi yobe, mwanga atambule ntupu yobe.”

²⁴ Ngoboni mwene Ndavita wakumbwile ngayi, “Byo, nikabilanda. Nika kupana ndando nimwayo ukatoya. Kukatupula zinkombela kuli Nyambi ya Ngula, Nyambi yami, ziya zinabulu kulandiwa nifwako.” Pe walandile likotwelo na zingombe na ndando ya makumi mutanu a muwayawaya wa shiliva.

²⁵ Wazikilile kaala Nyambi ya Ngula na kukombelela zinkombela za kuhokesha na zinkombela za kulilumikila. Nyambi ya Ngula wakumbwile malombelo wendi, pe wulweli wakubula kutwesha kupangiwa wamanine mu Ishalela.