2 Shamwele 23 - Libuka Lya Kuyela

Mazu a Ndavita amamaninino

¹ Awa niwo mazu a Ndavita amamaninino. Ndavita mwana Njeshe, muntu ou Nyambi aneneheshele, owe awabishile Nyambi wa Yakobo kwinga mwene, owe wengile mukakuhonga nyimbo zaziwahe za Ishalela. Pe wambile ngayi,

² “Moyo wa Nyambi ya Ngula ukwamba mumwami, Lizu lyendi lili ha lulimi lwami.

³ Nyambi wa Ishalela unamba, Limanya lya Ishalela wambile kukwami ngayi, oho Mwene a kulela na kulunga, kulela oku hatina Nyambi,

⁴ ukubatatumukila na mincalala, ngo mutena ha kututika kwawo kwakubula makumbi, ngo mutena uya wameneshanga mwila oho mvula unaketuku.

⁵ Pe shiya nisho Nyambi afuywelele lupashi lwami, ndaba unalimama na nami Kulimama kwa mwaya myaka, kuliyuvwashana kuya kukabula kumana, shikulupisho shiya shikubula kufutuliwa. Pe mwa shikuma Nyambi ukanyavwa na kumpana ebye ni ku shinga.

⁶ Ngoboni bakawubi banafweke ngonehe mihengela iya yinayumbiwi. Kowa muntu ukutwesha kuyikwata na maboko anahiya,

⁷ ndele kuliyavwisha shondo hinge mulinga. Bantu bakayihokeshela nimwayo bene hayo.”

Bakanzita ba Ndavita ba mpupo

⁸ Awa niwo mazina a bakanzita ba Ndavita ba mpupo, wakutatika wengile Yosheba Mbashebeti waku Takimoni, owe wengile mukakutwaminina waku naba “Bahatu.” Walwishilenga na mulinga wendi balume 800 pe wabazihile nimwabo mu nzita yimo.

⁹ Wakulundamina hakati ka baya bantu bahatu wengile Eliza mwana Ndondo, wa ku livumo lya Ahohi. Mutena umo niye na Ndavita balwishile Bafwilishitina aba bakungulukile mu kulwa. Pe Baishalela batinine,

¹⁰ ngoboni niye walishumishile na ngovu zendi na kulwisha Bafwilishitina hantu noho liboko lyendi lyengile shingole, pe kaliha watweshele ku puha mukwale wendi. Nyambi ya Ngula wapanine kukoma kwakunene ku Baishalela ha mutena uyo. Oho nzita yamanine Baishalela babokele okwe kwekalile Eliyazala na kushimba lipuku ku bafu.

¹¹ Wawuhatu ku mpupo ku naba bahatu wengile Shama mwana Ange waku Hala. Bafwilishitina bakungulukilile ku Lehi okwe kwekalile mfuba ya manyanta. Baishalela batinine ku Bafwilishitina,

¹² ngoboni Shama walikwatishile na kwimana mu mfuba, wayilamwinine pe wazihile Bafwilishitina. Nyambi ya Ngula wamupanine kukoma kwakunene shikuma.

¹³ Kwakwipi naku mabalikilo a shikati sha kuteza, bahatu baha “Makumi ahatu” bayile ku linzolongoma lya Andulama, oku ekalilenga Ndavita. Muhoko wa bakanzita ba Bafwilishitina batulilile mu Mukulo wa Lefwayima.

¹⁴ Ha shikati shiyo Ndavita wekalile mu shipata, pe Bakanzita ba Bafwilishitina bekalile mu Mbetelehema.

¹⁵ Ndavita walishozele ku munzi, pe wambile ngayi, “Tawee! Shinga taha na muntu wakundetelako mema akunwa aku lishima lya hahepi na lipangati lya ku Mbetelehema.”

¹⁶ Bakanzita bahatu ba mpupo bengile nkanzi kuliyoha na kupita mu munkungwa wa Bafwilishitina, kuya na ku tekula mema ku lishima kwakwipi na lipangati lya Mbetelehema na kuwaleta kuli Ndavita. Ngoboni kaliha wa wanwine. Wa wayitilile hanci kwinga ngonehe nkombela kuli Nyambi ya Ngula.

¹⁷ Wambile ngayi, “Obe Nyambi ya Ngula, kutwesha kuwanwa nifwako. Nisho shikwinga ngo nikunwa mukeza wa naba bantu banayaka wumi wabo mu malamo.” Nohobene wakanine kuwanwa. Eshe shengile shimo ha biheka bya bakanzita ba mpupo.

¹⁸ Ambishayi mukonzo wa Yowambu wengile mukakutwaminina wa baya Bakanzita ba mpupo Makumi Ahatu. Mandiyendi wengile Zeluya. Walwile na bantu 300 na mulinga wendi na ku baziha. Pe wekalile na mpupo ngonehe aba bamina “Bahatu.”

¹⁹ Ambishayi wayile mpupo shikuma ha Bakanzita Makumi Ahatu, pe wengile mukakubatwaminina, ngoboni kaliha wengile wampupo ngonehe baya Bantu Bahatu.

²⁰ Mbenaya mwana Yehoyanda waku Kambizelu wengile kanzita wampupo. Watendele byuma bya kukanca byabingi, kufungilako ha kuziha bakanzita babanene babili ba Bamowambi. Kami wakunkulukilile mu liteke na kuziha shimbwi ha mutena awile makelengo.

²¹ Niho kami azihile mulume wawutambi wa Kaengepita, owe wakamatilile mulinga mu liboko lyendi. Mbenaya wamulwishile na muwana, wahukwile mulinga mu liboko lya Kaengepita, pe wamuzihishileko.

²² Obyo nibyo byuma bya kukanca atendele Mbenaya mwana Yehoyanda, umo wa bamina “Makumi Ahatu.”

²³ Wekalile na mpupo shikuma hakati ka Bakanzita Makumi Ahatu, ngoboni kaliha ngonehe baya Bahatu. Ndavita wamuyakile ku bakulwane bakakumulama.

²⁴ Bamina ku bantu “Makumi Ahatu” bengile ba Ashaheli mukonzo wa Yowambu na Elihanani mwana Ndondo waku Mbetelehema,

²⁵ na Shama na Elika ba ku Halondi,

²⁶ na Helezi waku Paliti na Yila mwana Yikesha waku Tekoya,

²⁷ na Ambiyeza waku Anatoti na Membunayi waku Husha

²⁸ na Zalumoni waku Ahohi na Mahalayi waku Netofwa,

²⁹ na Helendi mwana Mbaana waku Netofwa na Itayi mwana Limbayi waku Ngimbiya mu litunga lya Mbenjamani,

³⁰ na Mbenaya waku Pilotoni na Hindayi waku mikulo ya kwakwipi na Ngashi,

³¹ na Ambiyaboni waku Alamba na Azimabeti waku Mbahulima,

³² na Eliyahimba waku Shalimboni na bana ba Yasheni babalume na Yonatana

³³ mwana Shama waku Hala na Ahiyama mwana Shalala waku Hala,

³⁴ na Elifweleti mwana Ahashibayi wa mulume waku Maaka na Eliyami mwana Ahitofwele wa mulume waku Ngilo,

³⁵ na Hezilo waku Kamela na Palayi waku Alibi,

³⁶ na Ingalu mwana Natani waku Zomba na Mbani waku Ngandi,

³⁷ na Zeleki wa Kaamoni na Nahalayi waku Mbeloti, washimbilenga bilwisho bya Yowambu mwana Zeluya,

³⁸ na Yila na Ngalembi waku Yatile

³⁹ na Uliya wa Kahita. Bekalile makumi ahatu na mutanu na babili bakanzita ba mpupo nimwabo.