2 Shamwele 22 - Libuka Lya Kuyela

Lwimbo lwa Ndavita lwa kukoma

¹ Oho Nyambi ya Ngula apulwishile Ndavita kuli Shaulu na bamalamo bendi nimwabo.

² Ndavita wembilile luno lwimbo ngayi, “Nyambi ya Ngula niye limanya lyami na shipata shami sha ku shuma na mulamwini wami,

³ Nyambi yami niye limanya lyami, mumwendi nimo ni kuholama. Niye likebo lyami, uku ndamwina na ku nyinkalika shiwahe. Niye muka kunkoweza ngonehe shipata, niye ukundama, na ku ndamwina ku mushunga. Nengi muka kunkoweza, na kumpulwisha ku mushunga.”

⁴ Nikwihana kuli Nyambi ya Ngula, ou nafwanini ku yemeziwa. Pe ukumpulwisha ku bamalamo bami.

⁵ “Mankanyi a lufu nimwao anzingulukile, mankanyi akunongesha amfwikile.

⁶ Malamo a lufu anzingulukile, pe kantamba ka lufu, ka nkwatile.”

⁷ Mu makalikiza wami, nehanine Nyambi ya Ngula, nehanine Nyambi yami ngayi anyavwe. Mu litala lyendi wayuvwile lizu lyami, wayuvwilile kuku bilika kwami, kwakushinga ku yavwiwa.

⁸ Niho hanci hakankile pe hanyenkanine, mimbi ya mayilu ya kankile na ku nyenkana, ndaba Nyambi wapilamine.

⁹ Wishe watutumine kufuma mu mizulu yendi, mulangi wa ku nongesha, wafumine mu kanwa kendi, mashanga akubanga afumine kukwendi.

¹⁰ Watabwile mbimbayilu, na kuyipita hakati pe wezile hanci, hamo na likumbi lya ku shipa, lyekalile mu nceto ya mawulu wendi.

¹¹ Wekalile ha makelumbi na ku lelenteka, watukile ha mbando za mpepo.

¹² Walifwikile niyemwine na mincimpwe, makumbi akushipa a mvula, amuzingulukile.

¹³ Ku mbyazeka na ku mwesha ngonehe mundilo byekalile kumbili yendi, byapitile mukati ka makumbi akushipa.

¹⁴ Nyambi ya Ngula watendokele muyilu ngonehe mushika. Lizu lya Wakukangana lya yuvwanikile.

¹⁵ Wapuhile mivwi yendi, pe wapanzanishile bamalamo bendi, wa batandile na ku mwesha kwendi.

¹⁶ Niho nceto ya liwate ya shalile ha too, pe mimbi ya hanci ya fwikulukile. Oho Nyambi ya Ngula akalihilile bamalamo bendi, pe wa ba hashokelele na wukali.

¹⁷ Nyambi ya Ngula wa nkolobelele hanci kufuma mu yilu, pe wa nkokele ku mfumisha mu mampunga.

¹⁸ Wa ndamwinine ku bamalamo bami bangovu, na ku kwabo nimwabo baya banzimbile, ndaba bengile bangovu ku mpitakana.

¹⁹ Oho nekalile mu makalikiza, bandwishile, ngoboni Nyambi ya Ngula wankingile.

²⁰ Wantwamininine ku mwanya waku mwena, wampulwishile ndaba wangwahililile.

²¹ Nyambi ya Ngula ukumpana ncuungu, ndaba ya kulunga kwami, uku mfuywela ndaba kaliha nekalile na mulandu.

²² Ninombatala zinzila za Nyambi ya Ngula, shilolo nifume kuli Nyambi yami na kukonka byabibi.

²³ Ninalama mazu wendi nimwawo, shilolo nilimbulule ndayano zendi.

²⁴ Na shamba kukwendi, ndaba nalilamanga amimwine, kubula kutenda byabibi.

²⁵ Nyambi ya Ngula ukumpana ncuungu ndaba nengi wa kulunga, Halimuka ngayi nili wa kubula mulandu.

²⁶ Obe Nyambi ya Ngula uli wa kwoloka, ku baya bakwinga bakwoloka kukwobe, pe na kwinga wa mu wahe, ku baya bakwinga babawahe.

²⁷ Walimonekeshanga kuyela ku baya ba kuliyelesha nibo bamwine, ngoboni uli wamukalu ku baya bakuluwa.

²⁸ Wa pulwishanga baya ba ku li shepesha, ngoboni uku shepesha baya bakuliyemeza.

²⁹ Obe Nyambi ya Ngula, Obe uli lambi yami, Obe Nyambi yami, ukumunika mu mincimpwe yami.

³⁰ Ukumpana nyala za ku lwisha bamalamo bami, na ngovu za Nyambi ni ku twesha ku kiluka twimbi twabo.

³¹ Ou Nyambi, ntendelo yendi eshe ya waha na mazu wendi eshe a lubuluka. Unafweke ngonehe likebo, ku nimwabo baya bakushinga kuholama kukwendi.

³² Nyambi ya Ngula ninkayendi niye Nyambi, Nyambi ninkayendi niye limanya lyetu.

³³ Nyambi umo pele, niye shipata shami sha ngovu, pe u na botopeshe nzila yami.

³⁴ Wa lyatishanga mawulu wami shiwahe, ngonehe mawulu a shineke, wa ntwesheshanga kwenda shiwahe ha mapili.

³⁵ Niye wa ndongeshanga bya ku lwa nzita, ngayi nitweshe ku nana shipando sha mukunzi, sha ku shuma shikuma sha lubemba.

³⁶ Obe Nyambi ya Ngula, ukunkoweza na ku mpulwisha, kuyavwa kwobe ku na nkatulu shikuma.

³⁷ Obe u na ndama mu kubula ku kwatiwa, pe mawulu wami hinga atanga ku henutuka.

³⁸ Natandile bamalamo bami na kubakwata, pe kaliha na shintulukile hantu noho na balobeshele.

³⁹ Nabahubile hanci, pe kaliha batweshele ku pindukamo, ba ku wila ku mawulu wami hinga bakomiwa.

⁴⁰ Wampanine nyala za ku lwa nzita, na ku koma ha bamalamo bami.

⁴¹ Ukutanda bamalamo bami kufuma kukwami, na ku lobesha baya ba ku nzimba.

⁴² Bakalokele ku shinga ku yavwiwa, ngoboni muntu wa kubapulwisha kowa, bakwihana kuli Nyambi ya Ngula, ngoboni kuba kumbula wufwako.

⁴³ Ni ku ba cancola, pe ba ku futuka nehe lukungu lu ku pepuka na mpepo ni kubalyatangila nehe ntiti ya mu nzila.

⁴⁴ Wampulwishile ku bantu bami aba ba mfutukililemo, na kuhangulula ku lela kwami kwa ha matunga, bantu nabulile kulimuka haya bengakale bakamilimo bami.

⁴⁵ Mapukwenda balambile kukwami, oho banyuvwile, banyombatalile.

⁴⁶ Mapukwenda batampwile, pe bafumine ku bipata byabo hibakanka.

⁴⁷ Nyambi ya Ngula wayoya! Liyemeziwe Limanya lyami! Shimikilenu wunene wa ngovu za Nyambi, Ou limanya lya kupulukila kwami.

⁴⁸ Nyambi niye wampanine kukoma bamalamo bami, muka ku bombesha matunga mu nceto yami,

⁴⁹ na ku mpulwisha ku bamalamo bami. Wankatwile ha bamalamo bami, na ku ndamwina ku bantu ba mishunga.

⁵⁰ Nohobene, Obe Nyambi ya Ngula, haya ni kuku yemeza hakati ka matunga ni kwimbila nyimbo za kuku yemeza.

⁵¹ Nyambi mu ka ku pana ku koma kwakunene, kuli mwene yendi, mu ka ku monesha shishemo shendi sha mwaya myaka, kuli owe ana wabishi, kuli Ndavita na bazukulyendi mwaya myaka.