2 Shamwele 21 - Libuka Lya Kuyela

Kufwa kwa bazukulya Shaulu

¹ Ha shikati sha kulela kwa Ndavita kwekalile kapande kakanene shikuma kashimbile myaka yihatu ya nzimba. Ndavita wepwile Nyambi ya Ngula hakati kapande, Nyambi ya Ngula wambile ngayi, “Shaulu na ba lupashi lwendi bali na mulandu ha kuziha Bangimbiyoni.”

² (Bangimbiyoni kwinga ngayi bengile Baishalela byo, bengile tuhu kanzunga kakashe ka Baamoli. Hinge ndi Baishalela balibezele kubalamwina, ngoboni Shaulu wezekele kubanongesha ndaba ya shitima shendi ha Baishalela na bayunda.)

³ Niho Ndavita ehanine Bangimbiyoni pe wambile kukwabo ngayi, “Kati bishini ebye nikutwesha kumitendela? Nikushinga kumiyumbila wubi watendiwile kukwenu, nohobene ngayi mwanga mukafuywele bantu ba Nyambi ya Ngula kami.”

⁴ Bangimbiyoni bakumbwile ngayi, “Shambo shetu na Shaulu na ba lupashi lwendi kwinga ngayi shikutwesha kuketuliwa na kuyumba shiliva hinge ngolinde shifwako, hinge kushinga kuziha Kaishalela umo.” Ndavita wepwile ngayi, “Bishini boni ebye mukushinga ngayi nimitendelebyo?”

⁵ Bakumbwile ngayi, “Shaulu washingile kutunongesha na kubula ku shiyaho umo wamumi hakatiketu mu Ishalela nimwamo.

⁶ Nohobene, tupane bazukulyendi babalume mutanu na babili, pe tukabakolekele ha lipili lya Nyambi ya Ngula ku Ngimbiya lukena lwa Shaulu, mwene ou ahatile Nyambi ya Ngula.” Mwene wakumbwile ngayi, “Nikamipanabo.”

⁷ Ngoboni ndaba ya kulimama kwendi na Yonatana, Ndavita watentekele Mefwimbosheti mwana Yonatana wa mulume, muzukulya Shaulu.

⁸ Pele haya, washimbile bana ba Lizipa babalume babili mwana Aiya wambuyama, ba Alimoni na Mefwimbosheti, baya abelekelele kuli Shaulu. Ndavita washimbile kami bana ba Mikale mwana Shaulu wambuyama, babalume mutanu, baya abelekelele kuli Andiliyele mwana Mbazilayi waku Mehola.

⁹ Ndavita wa bapanine ku Bangibiyoni, pe babokolele ha lipili kumbili ya mwanya ou balemeshalanga Nyambi ya Ngula, pe nimwabo hamo mutanu na babili babalobeshele. Kwengile, ku matatikilo akuteza luku oho bazihiwile.

¹⁰ Niho Lizipa mwana Aiya, mukaza Shaulu wa kwinginina, walitendelele shishawashawa sha kufwika bicancolo kutenda mubombola wendi ha limanya okwe kwekalile mituntu ya bantu ba kufwa, pe wekalile kuyo ku matatikilo akuteza mbale hantu ndele shikati sha mayinza sha kumine. Ku shikati sha mwaana watandilenga tuyoni ha mituntu, pe ku wushiku wayilaminenga ku tunzama.

¹¹ Oho Ndavita ayuvwile eshe atendele Lizipa mwana Aiya wa mbuyama mukaza Shaulu wa kwinginina,

¹² wayile mu kutola bifupa bya Shaulu na mwanendi Yonatana ku Bayambeshi mu Ngiliyande. (Biya bayibile mwaka mu mbanza ya Mbeti Shani, okwe Bafwilishitina bakolekelenga zinyutu ha mutena uyo bazihile Shaulu ha lipili lya Ngilimbowa.)

¹³ Ndavita watolele bifupa bya Shaulu na mwanendi Yonatana, pe kami wakungwile bifupa bya balume mutanu na babili aba bakolekiwile.

¹⁴ Niho bafundile bifupa bya Shaulu na mwanendi Yonatana mu shinzimbi sha Kishi tata Shaulu, mu Zela mu litunga lya Mbenjamani, batendele nimwabyo biya atoyela mwene. Pe byamanine, Nyambi wakumbwile malombelo abo a litunga.

Nzita ya kulwisha malengwalengwa a Bafwilishitina

¹⁵ Kwekalile kami nzita yamina mukati ka Bafwalishitina na Ishalela. Ndavita na bantu bendi bayile mu kulwisha Bafwilishitina. Shikati shimo sha nzita Ndavita wakwangile shikuma.

¹⁶ Pe lilengwalengwa umo wa lizina lya Ishimbi Mbenombu, owe washimbilenga mulinga wa lubemba wakubula mu luntondo, wulemu wawo wengile wa makilongilamu ahatu na shitika, pe kami wapakatile mukwale wa wupya, wekalile na shihanganiko sha ku ziha Ndavita.

¹⁷ Ngoboni Ambishayi mwana Zeluya wezile mu kuyavwa Ndavita na ku lwisha lilengwalengwa, pe wamuzihile. Niho bantu ba Ndavita bambile kukwendi ngayi tufwako kushinga ngayi obe ukaye kami nanetu ku nzita. Ndaba ngayi, “Obe unengi mpangwa ya Ishalela pe kushinga tufwako ngayi tukuyawe.”

¹⁸ Ebye oho byapitile kwekalile kami nzita na Bafwilishitina ku Ngombu, ku nzita eye Shibekayi waku Husha wazihile Lilengwalengwa watumbiwile Shafwi.

¹⁹ Kwekalile kami nzita yamina na Bafwilishitina ku Ngombu, pe Elihanani mwana Yeya waku Mbetelehema wazihile Ngoliyati waku Ngati, wekalile na mulinga wawunene, luntondo lwawo lwengile ngonehe mukambo wakupohelela wutonge.

²⁰ Niho kami kwekalile nzita yamina ku Ngati, oku kwekalile lilengwalengwa ou wahakilenga shikuma kulwa. Wekalile na minwe mutanu na umo ku liboko na liboko pe kami manyenca mutanu na limo ku liwulu na liwulu, nimwayo hamo makumi abili na yinaa. Niye wafumine ku mushobo wa malengwalengwa.

²¹ Wahandwile Baishalela, pe Yonatana mwana Shimeyi, yaya Ndavita, wamuzihile.

²² Awa malengwalengwa anaa bengile bazukulya malengwalengwa ba ku Ngati, pe Ndavita wabazihile na bantu bendi.