2 Shamwele 2 - Libuka Lya Kuyela

Ndavita ukuyakiwa ha wene wa Yunda

¹ Ebye oho byapitile, Ndavita wepwile Nyambi ya Ngula ngayi, “Kati nikutwesha kutuntukila ku umo ku minzi yamu Yunda ndi?” Nyambi ya Ngula wakumbwile ngayi, “Ee.” Ndavita wepwile ngayi, “Munzi ngani boni?” Nyambi ya Ngula wakumbwile ngayi, “Hembuloni.”

² Nohobene Ndavita wayile ku Hembuloni na bakazendi babili, Ahinoma waku Yezilelu na Ambingelu mfwile ya Nambalu, waku Kamela.

³ Kami washimbile bantu bendi na ba lupashi lwendi, pe bazikile mu minzi yazinguluka ku Hembuloni.

⁴ Niho bantu ba ku Yunda bezile ku Hembuloni, pe bawabishile Ndavita kwinga mwene wa mushobo wa Yunda. Oho Ndavita ayuvwile ngayi bantu ba ku Yambeshi mu Ngiliyande bafundakale Shaulu,

⁵ watumine bantu bamo ba ku Yambeshi Ngiliyande kutwala lizu elye ngayi, “Nyambi ya Ngula mwanga amifuywele ha ku monesha shishemo ha kufunda mwene yenu.

⁶ Pe haya Nyambi ya Ngula mwanga amoneshe shishemo sha mwaya myaka na kwoloka kukwenu nami kami nikamikalisha shiwahe ndaba yanebye munatende.

⁷ Lishumishenu na kwinga ba kukanca. Shaulu mwene yenu unafu, pe bantu bamu Yunda banangwabishi mazi kwinga mwene yabo.”

Ishi-Mbosheti unayakiwi kwinga mwene wa Ishalela

⁸ Pe Ambina, mwana Nela wa mulume, mukulwane wa banzita ba Shaulu, wetukile na mwana Shaulu wa mulume Ishi-Mbosheti na kuzabuka nendi Yondana, kuya ku Mahanayima.

⁹ Ambina wakwatile Ishi-Mbosheti kwinga mwene wa matunga a Ngiliyande na Ashule na Yezilelu na Efulemu na Mbenjamani, kami na litunga nimwalyo lya Ishalela.

¹⁰ Ishi-Mbosheti mwana Shaulu wekalile na myaka makumi anaa, oho bamushwanishile ha wene wa Ishalela, pe walelele myaka yibili. Ngoboni ba mushobo wa Yunda bengile bakulunga kuli Ndavita,

¹¹ pe walelele mu Hembuloni mu litunga lya Yunda myaka mutanu na yibili na shitika.

Nzita mukati ka Yunda na Ishalela

¹² Ambina mwana Nela na babilolo ba Ishi-Mbosheti mwana Shaulu bafumine ku Mahanayima na kuya ku munzi wa Ngimbiyoni.

¹³ Yowambu, ou mandiyendi wengile Zeluya na babilolo ba Ndavita bamina baliwaninine ku liziba lya Ngimbiyoni. Nimwabo bekalile hanci, litanga limo lyekalile mu nciza yimo ya liziba na litanga lyamina mu nciza yamina ya liziba kuliyahikiza.

¹⁴ Pe Ambina wambile kuli Yowambu ngayi, “Tokonoko tutape bandumbana bamo ba ku mbalila na mbalila balwe ngunga kumbili yetu ya kulipitakana.” Yowambu wakumbwile ngayi “Shashiwahe balwe.”

¹⁵ Nohobene balume likumi na babili, bakwimanina Ishi-Mbosheti na mushobo wa Mbenjamani, balwile na bantu ba Ndavita likumi na babili.

¹⁶ Pe muntu na muntu wakwatile kamalamo wendi ku mutwe pe wayahile kamalamo wendi mukwale hambali, nohobene nimwabo makumi abili na banaa bawililile hanci na kufwila hamo. Pe kami eshe nisho shiya batumbilile mwanya uyo wamu Ngimbiyoni ngayi, “Mfuba ya Mikwale.”

¹⁷ Niho nzita yayinene yakatukile, pe Ambina na Baishalela bakomiwile ku bantu ba Ndavita.

¹⁸ Bana ba Zeluya babalume bekalileko bengile Yowambu na Ambishayi na Ashaheli. Ashaheli, ou watweshelenga kufukumuka wanguwangu ngonehe shineke,

¹⁹ watatikile kutanda Ambina, wamutandilenga hinga amunungama.

²⁰ Niho Ambina ashetukile kunyima pe wambile ngayi, “Obe Ashaheli ukuntanda ndi?” Wakumbwile ngayi, “Ee.”

²¹ Ambina wambile ngayi, “Lehasho kuntanda. Shanukila ku shilyo hinge ku shimoho ukwateho umo ha bakanzita pe umuyange ebye alinabyo.”

²² Ambina, wabokeleleho, wambile kukwendi ngayi, “Lehasho kuntanda. Shumangani ukunkandikizila ngayi nikuzihe? Nikutwesha kwamba nahiti kuli kawushinda wobe Yowambu?”

²³ Ngoboni Ashaheli kulehasho wufwako, nohobene Ambina, wafutwile mulinga wendi pe wamutibile ha livumo, pulutu pe mulinga wapitile mampulwa ha mongo wendi. Ashaheli wawililile hanci yolobale wakufwa, pe bantu nimwabo bezilenga ku mwanya oku awililile, batulumanine na kwimanaho.

²⁴ Ngoboni Yowambu na Ambishayi batatikile kutanda Ambina, pe ha kulela kwa mutena bezile ku shinkanda sha Ama, ku mushamuko wa Ngiya ha nzila ya kuya ku libelelengwa lya Ngimbiyoni.

²⁵ Bantu ba ku mushobo wa Mbenjamani bakungulukile kuzinguluka Ambina, pe bemanine hayilu ya shinkanda.

²⁶ Ambina wabilikizile Yowambu ngayi, “Kati tukutwalilaho kulilwisha shikati nimwasho ndi? Kati kutwesha wufwako ku mona ngayi ku mamaninino kowa shuma shikekalaho ndele tuhu wukalu ndi? Tunengi bawushindawenu. Shikatingani mukakanisha bantu benu ngayi balehe kututanda?”

²⁷ Yowambu wakumbwile ngayi, “Nikubeza na Nyambi Wakuyoya ngayi, Shinga wabula kwamba na nami, shinga bantu bami banazamini kumitanda kukakuma naku lumenemene lwa nzona.”

²⁸ Niho Yowambu ashibile mpandula kwinga shilimukisho ku bantu bendi ngayi balehesho kutanda Baishalela, nohobene nzita yamanine.

²⁹ Ambina na bantu bendi bayile na kuketula Mukulo wa Yondana wushiku uyo nimwawo, niho bazabukile mishinzi wa Yondana, pe oho bakumine ku Mahanayima hilumenemene.

³⁰ Oho Yowambu alehele kubatanda, wakungwile bantu bendi nimwabo pe wawanine ngayi 19 bantu ba Ndavita banayongala, kufungilako na Ashaheli.

³¹ Bantu ba Ndavita bazihile 360 bantu ba Ambina ba ku mushobo wa Mbenjamani.

³² Yowambu na bantu bendi bashimbile mutuntu wa Ashaheli na kumufunda ku binzimbi bya ba lupashi ku Mbetelehema. Niho bendele wushiku nimwawo pe malungashiku bakumine ku Hembuloni.