2 Shamwele 17 - Libuka Lya Kuyela

Hushayi ukushanwisha Ambishalome

¹ Kaliha kwapitile shikati shashitali, oho Ahitofwele ambile kuli Ambishalome ngayi, “Leha nihate 12,000 bantu, pe nikalwishe Ndavita wushiku.

² Nikamulwisha oho na kwanga na kupopa. Pe nikamuyaka mukampwe pe bantu bendi nimwabo baketuka na kuya. Nikaziha tuhu mwene,

³ niho nikabwesha bantu nimwabo kukwobe. Oho babokakale nimwabo, ndele tuhu ou uli na ku shinga, bantu nimwabo bakekala mu ku mwena.”

⁴ Oku kwengile kubela kwakuwahe kuli Ambishalome naku bantwamina ba Ishalela nimwabo.

⁵ Niho Ambishalome ambile ngayi, “Haya yihana Hushayi wa kaakite tuyuvwe eshe ambe.”

⁶ Oho Hushayi akumine, Ambishalome wambile kukwendi ngayi, “Okwe nikwo kubela kuya anatupaniki Ahitofwele, kati tukwombatala ndi? Ndi kaliha noho, ututongweze eshe tutende.”

⁷ Niho Hushayi akumbwile Ambishalome ngayi, “Kubela okwe anamipana Ahitofwele shikati shino kunengi kwakubi.

⁸ Ukulimuka ngayi tatiyobe Ndavita na bantu bendi banengi bakakulwa bangovu, pe kami babakali ngonehe mbeya wa nkaziwa unayanguliwi bana bendi. Tatiyobe unengi kanzita wakulilongesha pe kaliha wekalanga na bantu bendi ku shikati sha wushiku.

⁹ Sha wuluno nehe unaliholeke mu linzolongoma hinge ku mwanya wamina. Wanguwangu oho Ndavita akalwisha bantu bobe, nimwendi ukayuvwako ukamba ngayi bantu bobe banakomiwi.

¹⁰ Hinga bene bantu ba kukanca shikuma, ngonehe babimbwi bakubula bowa, bakatina ndaba bantu nimwabo mu Ishalela ba kulimuka ngayi tatiyobe wenga kanzita wamunene, pe kami bantu bendi benga bakakulwa bangovu shikuma.

¹¹ Ngoboni kubela kwami kunengi okwe, obe ukungulule Baishalela nimwabo ku zimbalila nimwazo za litunga. Ku balika ku Ndani ku ncelele kukuma ku Mbelishemba ku mabukubuku, benge babengi ngonehe lihekelela, pe obe mwanga ubatwaminine obe mwine mu nzita.

¹² Tukawana Ndavita nimwako okwe ali na kumulwisha oho niye shilolokale atoshe ngayi shumangani shikutendiwa. Hinge niye, hinge umo wa bantu bendi kowa nowe akayoye.

¹³ Ndi ukaboka mu lukena, pe bantu betu nimwabo bakaleta nyimbwa na kukokela lukena mu nceto mu mukulo. Kukabule ku shala hinge luweluwe.”

¹⁴ Ambishalome na Baishalela nimwabo bambile ngayi, “Kubela kwa Hushayi wa kaakite kunapitakana kwa Ahitofwele.” Nyambi ya Ngula wayongwele kubela kwa Ahitofwele kwakuwahe kuzimangane, pe ngayi wukalu ukeza hali Ambishalome.

Hushayi ukukeyesha Ndavita

¹⁵ Niho Hushayi atongwezele bakankombela ba Zandoki na Ambiyatale kubela okwe apanikile kuli Ambishalome na bakakutwaminina ba Baishalela na kubela okwe apanine Ahitofwele.

¹⁶ Hushayi wawezeleleko kwamba ngayi, “Haya nyankupishenu. Mutume ntumwana kuli Ndavita ngayi hinga alangana ku mwaba wa mishinzi mu libelelengwa, ngoboni azabuke mishinzi wa Yondana, ngayi mwene na bantu bendi babule kukwatiwa na kuzihiwa nimwabo.”

¹⁷ Yonatana mwana Ambiyatale wa mulume na Ahimayazi mwana Zandoki wa mulume batatililenga ku Kaheloke ka Enilongela, ha zinginza za ku Yelushalema, ndaba balifulankanine ngayi hinga babamona hibengina mu lukena. Shikati nimwasho mukamulimo wa mushimbi wayilenga mu kubatongweza shumangani shatendiwilenga, pe niho baye na kutongweza Mwene Ndavita.

¹⁸ Ngoboni ndumbana wabamonene, pe watongwezele Ambishalome. Niho Yonatana na Ahimayazi banyankupile kuya mu kuholama mu litala lya mulume umo wamu Mbahulima. Wekalile na lishima hahepi na litala lyendi, pe bengininemo.

¹⁹ Mukazendi owe mulume washimbile shifwiko na kushifwika hayilu ya lishima na ku yanika mpeka hayilu, nohobene ngayi kowa muntu ukutwesha kutosha hinge shuma shimo.

²⁰ Babilolo ba Ambishalome bezile ku litala na kwipula mbuyama ngayi, “Ba Yonatana na Ahimayazi balikuti?” Wakumbwile ngayi, “Bazabukilakale mu nciza.” Balume babashingile ngoboni kaliha babawanine, pe niho babokele ku Yelushalema.

²¹ Oho bayakale, Ahimayazi na Yonatana baholokele mu lishima, pe bayile na ku shimika kuli Mwene Ndavita. Bamutongwezele eshe amutoyelenga Ahitofwele, pe bambile ngayi, “Nyankupenu na kuzabuka mishinzi.”

²² Niho Ndavita na bantu bendi batatikile kuzabuka Yondana, pe mutena watutikilenga, bazabukilakale mu nciza nimwabo.

²³ Oho Ahitofwele amonene ngayi kukonka kubela kwendi bafwako, wakandamine ha mbongolo yendi na kuboka ku munzi wendi. Amanishile kuwahisha byuma byendi, pe walimangilile niyemwine. Wafundiwile ku binzimbi bya ba lupashi lwendi.

²⁴ Niho Ndavita akumine ku munzi wa Mahanayima oho Ambishalome na Baishalela bazabukakale Yondana.

²⁵ (Ambishalome oho wayakakale Amasha mu mwanya wa Yowambu kwinga mukulwane wa bakanzita. Amasha wengile mwana Itila wa mulume wa Kaishimaele, manda Amasha wengile Ambingelu, mwana Nahashi wa mbuyama na mukonzo wa Zeluya wa mbuyama, manda Yowambu.)

²⁶ Baishalela na Ambishalome batendele minkungwa mu litunga lya Ngiliyande.

²⁷ Oho Ndavita akumine ku Mahanayima, Shobi mwana Nahashi wa mulume, waku munzi wa Lamba mu litunga lya Amoni na Makiya mwana Amiyele wa mulume, waku Londemba na Mbazilayi waku Longeli mu litunga lya Ngiliyande, bamushimbawilile.

²⁸ Baletele zindonga na zinyungu za lima za kubumba na malili na bya kulifwika. Pe kami baletelele Ndavita na bantu bendi byakulya ebye, loto na luku na muhunga na katooto na manyanta na kandundwe,

²⁹ na wushi na mazi a mahwe na mafwi na bambelele bamo. Balimukile ngayi Ndavita na bantu bendi bakalanduka ku nzala na linyotwa na kukwanga mu libelelengwa.