2 Shamwele 16 - Libuka Lya Kuyela

Ndavita na Ziba

¹ Oho Ndavita apitakanine hayilu ya lipili, wabazumukile tuhu ha kuliwana na Ziba mukamulimo wa Mefwimbosheti. Ziba wekalile na bambongolo babili, bashimbile mankende 200 na mwanda umo wa mahozozo a mikabo ya shinyanca sha kuyuma na mwanda umo wa mahozozo a mikabo ya nkuyu za kubombola na mbokoshi ya waine.

² Mwene Ndavita wamwipwile ngayi, “Ebye unalete ukubitendesha bishini?” Ziba wamukumbwile ngayi, “Bambongolo bakandameho ba lupashi ba nobe hekulu, pe mankende na mukabo binengi byakulya bya bantu, pe waine banwe aba ba kukwanga hakwenda mu libelelengwa.”

³ Mwene wamwipwile ngayi, “Mefwimbosheti muzukulya hekulyobe Shaulu uli kuti?” Ziba wakumbwile ngayi, “Wekalanga mu Yelushalema, ndaba unakuhanganika ngayi Baishalela bakapana kukwendi wene wa nkakayendi Shaulu.”

⁴ Mwene wambile kuli Ziba ngayi, “Nimwabyo biya byengile bya Mefwimbosheti haya binengi byobe.” Ziba wakumbwile ngayi, “Nili mukamulimo wobe. Mwanga niwane kuyamiziza kukwobe mwene ya Ngoma shikati nimwasho.”

Ndavita na Shimeyi

⁵ Oho mwene Ndavita akumine ku Mbahulima, Shimeyi mwana Ngela wa mulume umo wa bawushinda ba Shaulu, wamushimbawilile, heza na kumukutula.

⁶ Shimeyi watatikile kupuha mamanya kuli Ndavita na babilolo bendi, hinge noho Ndavita bamuzingulukile byamanga bendi na bantu bendi.

⁷ Shimeyi wakutwile ngayi, “Fumaha. Fumaha. Mukakuziha. Obe wakuluwa!

⁸ Obe wayangile Shaulu wene wendi, haya Nyambi ya Ngula unakushushulu ha kuziha balupashi ba Shaulu babengi. Nyambi ya Ngula unapana wene kuli mwanobe Ambishalome, pe unalobeshiwi, obe mukakuziha.”

⁹ Ambishayi, ou mandiyendi wengile Zeluya, wambile kuli mwene ngayi, “Obe Mwene ya Ngoma, kati shumangani eshe mu kulehelela owe kawa hami kutula? Lehenu niyeko nikaketule mutwe wendi.”

¹⁰ Mwene wambile kuli Yowambu mwana Zeluya na mukonzo wendi Ambishayi ngayi, “Ebye kwinga ngayi binakukundama byo. Ndi Shimeyi ukunkutula ndaba ngayi Nyambi ya Ngula unamutongweze kutenda noho, pe yani uli na ngovu za kwipula ngayi kati shumangani eshe akutenda nehe.”

¹¹ Pe Ndavita wambile kuli Ambishayi na babilolo bendi nimwabo ngayi, “Shikwangabo mwanami wa mulume wakulibelekela uli na kushinga kunziha, pe shumangani kati eshe mu kukomokela owe Kambenjamani Nyambi ya Ngula wamutongweza kunkutula, pe mulehenu ashitende.

¹² Hamina Nyambi ya Ngula ukatosha makando wami na kubweshela mfuywezi mu shikuto shendi.”

¹³ Niho Ndavita na bantu bendi bayilenga mu nzila. Shimeyi wayilenga nabo, wapitilenga ku mbalila yinaliyahikizi na lipili, ha tukana na kupuha mamanya na kubafukwila limvu okwe hibaya.

¹⁴ Pe mwene na bantu bendi nimwabo bakwangile oho bakumine ku Yondana, pe kuyo nikwo bakwangulukilile.

Ambishalome mu Yelushalema

¹⁵ Ambishalome na Baishalela nimwabo bayile nendi mu Yelushalema, pe Ahitofwele wekalile nabo.

¹⁶ Oho Hushayi wa kaakite, muhoni wa Ndavita wakuhakiwa, ahanganine Ambishalome, wabilikizile ngayi, “Mwene ayoye myaka nimwayo. Mwene ayoye myaka nimwayo.”

¹⁷ Ambishalome wambile kuli Hushayi ngayi, “Kati eshe nisho shishemo uku monesha kuli muhoni wobe Ndavita ndi? Kati shumangani eshe wabulila kuya nendi?”

¹⁸ Pe Hushayi wakumbwile Ambishalome ngayi, “Shikutwesheka nahiti kuya? Nili kumbalila ya nowe unahatiwi kuli Nyambi ya Ngula na bantu aba na Baishalela nimwabo. Nikekalanga hamo na nobe.

¹⁹ Pe kami, yani owe nikatendela, kati kaliha mwana hekulu ndi? Ngonehe eshe natendelelenga tatiyobe, pe haya nobe nikakutendela.”

²⁰ Niho Ambishalome afutukilile kuli Ahitofwele pe wambile ngayi, “Wuluno etu tuli kuno, bishini, ukutubela ngayi tutende?”

²¹ Ahitofwele wakumbwile Ambishalome ngayi, “Yanga pe ukalale na bakaza tatiyobe bakwinginina aba ashiyile kulama musheke. Niho bantu nimwabo mu Ishalela bakalimuka ngayi uli na nzimbo kuli tatiyobe, pe bantu bobe bakashumishiwa shikuma.”

²² Pe batendelele ntanda Ambishalome hayilu ya musheke, pe wenginine mukati na kulala na bakaza tatiyendi bakwinginina ku meho a bantu nimwabo.

²³ Kubela nimwako apaninenga Ahitofwele ku matena ayo kwatambuliwilenga kwengile ngo nilyo lizu lya Nyambi, wubili wabo Ndavita na Ambishalome babikonkelenga.