2 Shamwele 15 - Libuka Lya Kuyela

Ambishalome ukufunga kufutulukila mwene Ndavita

¹ Ebye oho byapitile, Ambishalome waliwaninine koloyi na bambishi na balume makumi mutanu kumbili yendi.

² Watweshelenga ku pinduka lumenemene shikuma kuya mukwimanina hahepi na nzila ku lipangati lya lukena. Oho muntu nimwendi waletelenga shambo shendi ngayi ukushinga mwene kumuyata, Ambishalome watweshele kumwihana na kumwipula okwe akufuma. Pe, ku mona ndi muntu unamutongweze ngayi ukufuma ku mushobo owe.

³ Ambishalome wamutongwezele ngayi, “Mona, shambo shobe shinawaha kami sha kwoloka, ngoboni kowa mukakwimanina mwene ayuvwe shambo shobe.”

⁴ Pe wanungileko ngayi, “Shinga ngayi nengile mukakuyata, shinga muntu, enge yani hinge yani wekalile na shambo hinge, manyengo, shinga ukutwesha kwiza kukwami, pe nikamuketwila shambo shendi shiwahe na kubula shihota.”

⁵ Oho muntu ahenyenene kuli Ambishalome na ku shintama hambili yendi, Ambishalome wolwele liboko lyendi na ku mu kwata na ku mu zupeza.

⁶ Ambishalome watendele noho ku Baishalela nimwabo aba bezilenga kuli mwene mu kubaketwila byambo, pe ha kutenda noho wakokele mitima yabo.

⁷ Kunyima ya myaka yinaa Ambishalome wambile kuli mwene Ndavita ngayi, “Hekulu, nyintabilishe kuya ku Hembuloni na kulama shikulupisho eshe natende kuli Nyambi ya Ngula.

⁸ Aha nekalilenga mu Ngeshula mu Alamu na kulupishile Nyambi ya Ngula ngayi ndi ukatwesha kumbwesha ku Yelushalema, nikatwesha kumulemeshela mu Hembuloni.”

⁹ “Yanga mu ku mwena,” nisho ambile mwene. Pe Ambishalome wayile ku Hembuloni.

¹⁰ Ngoboni watumine bantumwana kuwi ku mishobo nimwayo ya Ishalela na kwamba ngayi, “Oho mukayuvwa kutendoka kwa zimpandula, mukawulumwine tunkelenkele ngayi, ‘Ambishalome wengakale mwene ku Hembuloni.’ ”

¹¹ Kwekalile balume 200 behaniwile kuli Ambishalome, afumine nabo ku Yelushalema, kowa naneshe balimukile ha kubeba oku, pe nimwabo bayile muwumwe.

¹² Pe oho atupwilenga zinkombela, Ambishalome kami watumine lizu ku munzi waku Ngilo mu kuleta Ahitofwele, owe wengile umo wa bakakubela mwene Ndavita. Kubebiwa kwa mwene kwanenehele, pe bantu ba Ambishalome bengihilenga.

Kushila kwa Ndavita mu Yelushalema

¹³ Ntumwana wabuzikile kuli Ndavita ngayi, “Mitima ya Baishalela yayakale kuli Ambishalome.”

¹⁴ Niho Ndavita ambile ku babilolo bendi nimwabo bekalilenga nendi mu Yelushalema ngayi, “Twafwanina kuya hamo ngayi tupuluke kuli Ambishalome. Nyankupenu! Wuluno kampe akume kuno na ku tu koma na kuziha bantu nimwabo mu lukena.”

¹⁵ Pe bakumbwile ngayi, “Ingoi, obe hekulu. Tunaliwahishi kutenda nimwabyo ebye ukwamba.”

¹⁶ Niho mwene akatukile na babilolo bendi na ba lupashi lwendi nimwalwo bamukonkele, ndele tuhu ba mahano bakwinginina likumi, aba ashiyile mu kulama musheke.

¹⁷ Pe aha mwene na bantu bendi nimwabo bashiyilenga lukena, bemanine ku litala lya mamaninino.

¹⁸ Pe nimwabo babilolo bendi bemanine kulundamina kukwendi oho byamanga ba wene bapitilenga hahepi, kuya kumbili yendi. Bakanzita 600 ba ku Ngati bamukonkele nanibo kami bapitile hahepi.

¹⁹ Nohobene mwene wambile kuli Itayi waku Ngati, mukakutwaminina wabo ngayi, “Kati shumangani eshe ukuyila nanetu? Bokamo, pe ukekale na mwene wamupya. Obe unengi lipukwenda, kami uli kantapwa, kukwenu kwakutali.

²⁰ Munekala kuno tuhu shikati shashishe, pe shumangani kati eshi nikutendela ngayi niye nenu na ku yambangila? Kulimuka ninokwe nikuya nifwako. Bokenu mushimbe bawushindawenu, pe mwanga Nyambi ya Ngula ekale na shishemo sha mwaya myaka kukwenu na kwoloka.”

²¹ Ngoboni Itayi wakumbwile ngayi, “Hekulu, ni kulibeza kukwobe mu lizina lya Nyambi ya Ngula ngayi shikati nimwasho nikaya nobe nimwako okwe ukaye, hingebene ndi shikutontolola lufu.”

²² Ndavita wakumbwile ngayi, “Shashiwahe. Tuyenga.” Niho Itayi na bantu bendi nimwabo na bana babo bayile.

²³ Pe bantu balililenga na kumbolomoka oho bantu ba Ndavita bakatukilenga. Mwene wazabukile kashinzi ka Kindiloni na bantu bendi bamukonkele, pe bahenyenene ku libelelengwa.

²⁴ Mukankombela Zandoki wekalile kuyo, pe wekalile na Balevi bashimbilenga Likwati lya Kulimama lya Nyambi. Baliyakile hanci na kubula kulitola hantu bantu nimwabo bafumakale mu lukena. Kami mukankombela Ambiyatale nikwo ekalile.

²⁵ Niho mwene ambile kuli Zandoki ngayi, “Bweshenu Likwati lya Kulimama ku lukena. Ndi Nyambi ya Ngula unangwahilili, pe mutena umo ukanyintabilisha kwiza mu kulimona ku mwanya okwe lili.

²⁶ Ngoboni ndi kaliha ukungwahilila, pe niyemwine atende kukwami ebye akushinga.”

²⁷ Pe wambile kami kuli mukankombela Zandoki ngayi, “Mona, ebye bihanganiko byami. Shimba mwanobe Ahimayazi na Yonatana mwana Ambiyatale baboke ku lukena shiwahe.

²⁸ Nikatatilila, shikati shashishe ku mazabukilo a mishinzi mu libelelengwa hantu natambulu lizu likufuma kukwobe.”

²⁹ Niho Zandoki na Ambiyatale babweshele Likwati lya Kulimama lya Nyambi mu Yelushalema na kwikalamo.

³⁰ Ngoboni Ndavita wakankalalile ku lipili lya mitondo ya Olive halila, wavulile ncangwa ku mawulu, pe mutwe wendi wafwikiwile kwinga shimonekesho sha wunginga. Kami nimwabo aba bendelenga nendi bafwikile mitwe yabo na kulila.

³¹ Ndavita oho atongweziwile ngayi Ahitofwele unalifungili na Ambishalome mu kufutulukila kwendi, walombelele ngayi, “Obe Nyambi ya Ngula, futula kubela kwa Ahitofwele kwinga kwowa.”

³² Oho Ndavita akumine hamanina lipili, okwe kwekalile mwanya wakulemeshela Nyambi, muhoni wendi wakuhakiwa, Hushayi wa kaakite, wamuwanine. Bivwalo bya Hushayi byengile bya kutabozoka na limvu ha mutwe wendi.

³³ Ndavita wambile kukwendi ngayi, “Kunyavwa shifwako ndaba ukenga muziho kukwami.

³⁴ Ngoboni ukanyavwa ha kuboka ku lukena, pe ukatongweza Ambishalome ngayi obe haya ukamutendela na kulunga ngonehe eshe watendelelenga tatiyendi. Pe utende nimwabyo ebye ukutwesha ha kukanangana kubela kwa Ahitofwele.

³⁵ Bakankombela, ba Zandoki na Ambiyatale niko bakekala, batongweze nimwabyo ukayuvwa mu musheke wa mwene.

³⁶ Niho bali na bana babo babalume ba Ahimayazi na Yonatana, pe ukatwesha kubatuma kukwami na mazu nimwawo awa ukayuvwa.”

³⁷ Niho Hushayi, muhoni wa Ndavita, abokele ku Yelushalema ha shikati eshe akumine nasho Ambishalome.