2 Shamwele 14 - Libuka Lya Kuyela

Yowambu ukuwahisha kuboka kwa Ambishalome

¹ Yowambu mwana Zeluya watoshele ngayi Mwene Ndavita washingilenga shikuma Ambishalome ha kubula kumumona.

² Niho ehanine mbuyama wakukeya owe wekalilenga ku Tekoya. Oho akumine, Yowambu wambile kukwendi ngayi, “Lifwanikize ngo uli mu malila, uvwale bivwalo byobe bya malila na kubula ku shakula huki zobe na kubula kuli waba mazi. Utende ngonehe mbuyama ou unekala mu malila shikati shashitali.

³ Niho uye kuli mwene ukambe kukwendi ebye nikukutongweza.” Niho Yowambu amutongwezele ebye akamba.

⁴ Mbuyama waku Tekoya wayile kuli mwene mu ku shintama hanci mu maleema, pe wambile ngayi, “Nyavwenu, obe Mwene ya Ngoma.”

⁵ Mwene wamwipwile ngayi, “Ukushinga bishini?” Wakumbwile ngayi, “Hekulu, nengi mfwile wakuyanda. Mukokwami wafwa.

⁶ Hekulu, nekalile na bana babili babalume, pe mutena umo wubili wabo balitutukishilenga ku mfuba, okwe kwabulile muntu wakubatapulula, pe umo wazihile minendi.

⁷ Haya hekulu, bawushinda wami nimwabo banamfutulukili, bali na kushinga ngayi nibapane mwanami ou waziha minendi, ngayi mwanga bamuzihe ndaba ya kuziha mukonzo wendi. Ndi ba kutenda eshe, nikashala tuhu wakubula mwana, pe bakanciya kaboko mu ncingo kubula mwana wa mulume wafwanini kukashwana lizina lya mukokwami.”

⁸ Mwene wamukumbwile ngayi, “Boka ku munzi, pe nikahanganika bya kutenda hahobe.”

⁹ Mbuyama waku Tekoya wambile ngayi, “Obe mwene ya ngoma. Nimwabyo ebye mu kutenda, lehenu ami na balupashi lwami batuhepe, ngoboni obe na ba lupashi lwa wene mubule mulandu.”

¹⁰ Mwene wamukumbwile ngayi, “Ndi muntu umo ukukutinisha, mulete kukwami, pe kuka ku kabakanisha kami wufwako.”

¹¹ Mbuyama wambile ngayi, “Obe mwene ya ngoma, hekulu, lombela kuli Nyambi ya Ngula, Nyambi yobe, nohobene ngayi kawushinda wami ou uli na ngovu za kubweshela mukeza wa lufu mwanami hinga atenda mulandu wawunene shikuma wakuziha mwanami wamina kami.” Ndavita wakumbwile ngayi, “Nikukulupisha na Nyambi ya Ngula wakuyoya, ngayi, mwanobe kuka lemekiwa wufwako nihani.”

¹² Mbuyama wambile ngayi, “Obe mwene ya ngoma, ndehenu nambe shuma shimo.” Mwene wamukumbwile ngayi, “Shashiwahe, amba.”

¹³ Mbuyama wambile kukwendi ngayi, “Shumangani kati eshe unatendele shibi ku bantu ba Nyambi? Unabulu kwitabilisha mwanobe obemwine kufuma mu wunyambangizi, pe haya unaliyata obemwine ngonehe eshe unamba.

¹⁴ Nimwetu tukafwa, tunengi shamwangalanga kashikonkana kutola. Nyambi ukutwesha ukubwesha bafu ku wumi. Nanobe mwene ya ngoma ukutwesha kuwana nzila ya kufumisha muntu mu wunyambangizi.

¹⁵ Haya, obe mwene ya ngoma, shuma eshe nezili mukwamba kukwobe shinengi eshe ndaba bantu banantinishi. Niho nalyambishile amimwine ngayi nikamba kukwobe na kukulupila ngayi ukatenda eshe ni ka lomba.

¹⁶ Nahanganika ngayi ukanyuvwa na kumpulwisha ku muntu owe uli na kwezeka kuziha mwanami hamo na nami, pe ngayi mwanga abule kutufumisha ku likona liya Nyambi atupanine.

¹⁷ Nalyambishile amimwine ngayi shikulupisho shobe, obe hekulu, shikatwesha kumpulwisha, ndaba mwene unengi ngonehe lingeloyi lya Nyambi likutwesha kuhalulula byabiwahe ku byabibi. Nyambi ya Ngula, Nyambi yobe mwanga ekale hamo nanobe.”

¹⁸ Niho mwene akumbwile ngayi, “Oho nikukwipula liyipu hinga uholeka shuma shimo, pe mwanga untongweze kupwisha nimwako.” Wetabilile ngayi, “Obe mwene ya ngoma, nyipule.”

¹⁹ Mwene wamwipwile ngayi, “Kati Yowambu niye nakutumu ngayi wize wambe nehe ndi?” Mbuyama wakumbwile ngayi, “Obe mwene ya ngoma, nikulibeza ngayi kowa muntu ukutwesha kukanangana, ngayi obe walimuka kupwisha. Mwa shikuma shilolo wobe Yowambu, niye wantongweza eshe nafwanina kutenda naneshi sha kwamba.

²⁰ Ngoboni Yowambu watenda noho ngayi mwanga ufutulule eshe shambo nimwasho. Obe mwene ya ngoma, uli na ngana ngonehe lingeloyi lya Nyambi na kulimuka byuma nimwabyo biya bikutendiwa.”

²¹ Niho mwene ambile kuli Yowambu ngayi, “Nahanganiki kutenda ngonehe ukushinga. Yanga na kuleta ndumbana Ambishalome na kumubwesha kuno.”

²² Yowambu wafunkamine hanci ku meho a Ndavita mu maleema, pe wambile ngayi, “Obe mwene ya ngoma, Nyambi akufuywele. Haya nalimuku ngayi unangwahilili, ndaba unetabili kunyepa kwami.”

²³ Niho Yowambu akatukile pe wayile ku Ngeshula mu kuleta Ambishalome kumubwesha mu Yelushalema.

²⁴ Ngoboni, mwene wapanine ndayano ngayi Ambishalome hinga ekalanga mu musheke. Mwene wambile ngayi, “Kushinga kumumonanga nifwako.” Niho Ambishalome wekalilenga mu litala lyendi na kubula ku monekanga ku lupala lwa mwene.

Ambishalome ukulyambwilila kuli Ndavita

²⁵ Kowa muntu umo mu Ishalela wayile mpupo na kuyemeziwa ha shifwekesha shendi sha wuwahe ngonehe Ambishalome, kaliha wekalile na muhendo kubalika ku mutwe kukuma naku mawulu.

²⁶ Huki zendi zengile za kuzika, pe wazishehelenga kamo tuhu ha mwaka, oho za kulile na kutaliha na kutepuka. Wulemu wazo wapitakanine makilongilamu abili ngonehe ku wulemu watoyiwanga.

²⁷ Ambishalome wabelekele bana bahatu babalume na mbuyama owe atumbile lizina lya Tamale, wengile mbuyama wa muwahe shikuma.

²⁸ Ambishalome wekalile myaka yibili mu Yelushalema na kubula kulimona na mwene.

²⁹ Niho ehanine Yowambu ngayi eze mwanga amuyileko kuli mwene, ngoboni Yowambu kaliha wezile. Kami Ambishalome wehanine Yowambu, pe kami wakanine kwiza.

³⁰ Niho Ambishalome ambile ku bakamilimo bendi ngayi, “Monenu mfuba ya Yowambu yalilundamina na yami, pe mumwayo munamene luku. Yenu mukayohemo.” Niho bayile na kuyoha mu mfuba.

³¹ Yowambu wayile ku litala lya Ambishalome na kwipula ngayi, “Kati shumangani eshe bakamilimo bobe bayohela mu mfuba yami?”

³² Ambishalome wakumbwile Yowambu ngayi, “Mona! Wakanine kwiza oho nakwihanine. Na ku shinganga ngayi uye kuli mwene mu kunyipwilako ngayi, ‘Kati shumangani eshe nafuminine ku Ngeshula na kwiza kuno? Shafwanina tuhu ngayi shinga nekalanga kwakuyo.’ ” Ambishalome wazaminine kwamba ngayi, “Nikushinga ungwahishile ngayi nilimone na mwene, pe ndi nayatiwi, hinge kufwa azihenga tuhu.”

³³ Yowambu niho ayile kuli mwene Ndavita na kumutongweza ebye ambile Ambishalome. Mwene watuminine Ambishalome, pe wayile kukwendi, niho ashinkamine hanci na kulamba hambili yendi. Mwene wamutambokeshele na ku mu zupeza.