2 Shamwele 13 - Libuka Lya Kuyela

Aminoni na Tamale

¹ Ambishalome mwana Ndavita wekalile na mpanzendi wamuwahe wa muzike, watumbiwile Tamale. Aminoni mwana Ndavita wamina walishozelengaye.

² Wamuminininenga mate shikuma pe wafumishileho na kukola, ndaba shamonekele kwinga shashikalu kukwendi ha kumuwana, ngo shiheka sha kankanga, walamiwilenga kubula kuliwananga na balume.

³ Ngoboni Aminoni wekalile na minendi Yehonandambu mwana Shama yayiyendi Ndavita, mulume walikeyelela.

⁴ Yonandabe wambile kuli Aminoni ngayi, “Unengi mwana mwene hayaboni, kati bishini na ku monanga ku moneka kuhomba?” Wakumbwile ngayi, “Nikuminina mate Tamale, mpanza mukonzo wami Ambishalome.”

⁵ Yonandabe wambile kukwendi ngayi, “Lyongeze kukola, pe uye mu kulala. Oho tatiyobe akwiza mu kuku mona, wambe kukwendi ngayi, ‘Hekulu, ntongwezelenu mpanzami Tamale eze na kumpana byakulya. Nikumushinga ngayi eze na kutenda byakulya okwe nikutwesha kumumona, pe niho abipane kukwami.’”

⁶ Niho Aminoni alyongezele ngo wakolelenga na kuya mu kulala. Mwene Ndavita wayile mu kumumona, Aminoni wambile kukwendi ngayi, “Hekulu, ambila Tamale kwiza na kubumba mankende amashe okwe nikutwesha kumumona, pe niho abipanike kukwami.”

⁷ Niho Ndavita atumine lizu mu musheke kuli Tamale ngayi, “Yanga ku litala lya Aminoni mu kumutendela byakulya.”

⁸ Nohobene wayile kuyo pe wamuwanine nalangana. Watolele muvuba, wawuwahishile, pe wabumbile mankende okwe atweshele kumumona. Niho ayohele mankende

⁹ pe wawafumishile mu shivulu ngayi alye, ngoboni kaliha walile. Aminoni wambile ngayi, “Tongweza bantu nimwabo ngayi baye.” Pe nimwabo batutikilemo.

¹⁰ Niho Aminoni ambile kuli Tamale ngayi, “Leta mankende kuno ku wulili wami pe uwampane.” Watolele mankende pe wayile kukwendi.

¹¹ Ngoboni oho amupaninewo, wamukwatile pe wambile kukwendi ngayi, “Yeka ku wulili nilalenobe.”

¹² Tamale wambile kukwendi ngayi, “Nakana. Hinga unkandamika kutenda shuma sha lisheni nehe. Shinengi sha shibi.

¹³ Kati nikatwesha nahiti kupenza bantu? Pe ukashampuka shikuma mu Ishalela. Enu yaya, kambenu tuhu kuli mwene, pe nikwamba kupwisha ngayi ukampana kukwobe.”

¹⁴ Ngoboni Aminoni kaliha wamuyuvwililile, pe haya wekalile na ngovu za kumupitakana, wamukwatile na kulala nendi.

¹⁵ Aminoni wekalile na nzimbo yayinene kukwendi, haya wamuzimbile kupitakana ngonehe eshe amuhakilenga ha kutatika. Wambile kukwendi ngayi, “Tutika ha munkanda.”

¹⁶ Ngoboni Tamale wakumbwile ngayi, “Enu yaya ami nakana. Ndaba eshe sha kuntanda nehe sha shibi shikuma kupitakana eshe unatende.” Ngoboni Aminoni kaliha wayuvwileko.

¹⁷ Wehanine mukamulimo wendi pe wamwambilile ngayi, “Tutwisha owe mushimbi ha munkanda, pe mwanga upateko.”

¹⁸ Mukamulimo wamututwishile ha munkanda na kupatako. Tamale wavwalile shivwalo sha wene shashitali shekalile na maboko amatali, bivwalo bavwalilenga bana ba bamyene babambuyama bakubula kuyekiwa mu matena akunyima.

¹⁹ Niho Tamale alifukwilile mutoko ku mutwe wendi, watabwile shivwalo shendi, shashitali shiya avwalile na kuli kwatilila mbimba mutwe, haya na kulila.

²⁰ Oho mpanzendi Ambishalome amumonene wamwipwile ngayi, “Obe mpanzami, kampe Aminoni unalala nobe ndi? Hinga ulinyenga shikuma noho. Unengi mpanzobe wa ku livumo lyashenge, pe haya obe hinga utongwezako muntu.” Niho Tamale ekalilenga mu litala lya Ambishalome, wengile wakuhomba na winka shikati nimwasho.

²¹ Oho Mwene Ndavita ayuvwile eshe shatendiwile, wapilamine shikuma.

²² Pe Ambishalome wazimbile Aminoni shikuma ha ku kilukila mpanzendi Tamale, pe ngayi hinga mwaka akatanga kukalikumbula lizu na Aminoni.

Ambishalome ukubwesha wubi ku wubi

²³ Munyima ya myaka yibili Ambishalome washeheshelenga bambelele bendi ku Mbaalu Hazo hahepi na munzi wa Efulemu. Wehanine bana ba mwene Ndavita babalume nimwabo kwikalako.

²⁴ Wayile kuli Mwene Ndavita pe wambile kukwendi ngayi, “Obe Mwene ya Ngoma, nili na kushinga ku sheha bambelele bami. Kati ku fwanina shifwako ngayi obe na babilolo bobe mwize na kwikala ku shimbo eshe ndi?”

²⁵ Mwene wakumbwile ngayi, “Byo mwanami. Shikwinga shashikalu shikuma kukwobe ndi nimwetu tukuyako.” Ambishalome wamukandamikile, ngoboni mwene kaliha wamwitabilile, pe watongwezele Ambishalome ngayi ayenga, ngoboni wamutandalishile.

²⁶ Ngoboni Ambishalome wambile ngayi, “Shashiwahe, pe boni yitabilisha bayaya ba Aminoni kuyako.” Mwene wamwipwile ngayi, “Shuma ngani eshe Aminoni akuyilako?”

²⁷ Ngoboni Ambishalome wazaminine kumukandikiza hantu noho Ndavita etabilishile Aminoni na bana bendi bamina babalume nimwabo kuya na Ambishalome. Ambishalome wawahishile mayambwayambwa akwinga ngo mwene.

²⁸ Pe wafundizizile bakamilimo bendi ngayi “Monesheshenu Aminoni oho wanwakale shikuma, pe namitongweza tuhu ngayi, muzihenu, hinga mwikala na bowa. Nikalitabila ngayi nashitendele. Kancenu pe hinga mu shintazala.”

²⁹ Nohobene bakamilimo bayuvwile ebye ambile Ambishalome pe bazihile Aminoni. Pe wingi wa bana ba Ndavita babalume nimwabo bakandamine ha bambishi wabo pe batinine.

³⁰ Oho bashili kwenda ha kuboka ku lukena, Ndavita bamutongwezele ngayi, “Ambishalome unazihi bana bobe babalume nimwabo kowa ni umo unashalako.”

³¹ Mwene wemanine, watabwile bivwalo byendi mu wunginga, pe waliyumbilile hanci. Bakamilimo bemanine kuyo nendi batabwile bivwalo byabo.

³² Ngoboni Yehonandambu, mwana Shama mukonzo wa Ndavita, wambile kukwendi ngayi, “Hekulu, kuziha bana bobe babalume nimwabo wufwako, ndele tuhu Aminoni niye unazihiwi. Watweshanga kulimuka ntoneno ya Ambishalome ngayi wekalile na mutima wakutenda eshe kufuma haya Aminoni alalile na mpanzendi Tamale.

³³ Hekulu hinga ukulupila mbuzi ngayi bana bobe babalume nimwabo banafu, ndele tuhu Aminoni niye unazihiwi.”

³⁴ Shikati shiya bene Ambishalome watinine. Niho, kanzita wekalile ha mulimo wakulama wamonene likunge lyalinene lya kulishilenga kunkumo ya lipili ku nzila yaku Holanayima. Wayile kuli mwene mu kushimika ebye anamono.

³⁵ Pe Yehonandambu wambile kuli Ndavita ngayi, “Bana ba bamyene ba kumakale ngonehe anamba mukamulimo wobe.”

³⁶ Aha amanishile tuhu kwamba noho, bana ba Ndavita benginine mukati, batatikile kulila. Pe kami mwene Ndavita na babilolo bendi balilile shikuma.

Ambishalome ukuboka kukwabo

³⁷ Ngoboni Ambishalome watinine na kuya kuli Talimayi mwene wamu Ngeshula, mwana Amihundi na kwikalako myaka yihatu. Pe Ndavita walilile mwanendi Aminoni shikati shashitali.

³⁸ Ambishalome wayile kuli Ngeshula, pe wakekalile kuyo myaka yihatu.

³⁹ Mwene Ndavita washingilenga shikuma kami ku mona mwanendi Ambishalome, ndaba bantu bamubengezekele ha lufu lwa Aminoni.