2 Shamwele 12 - Libuka Lya Kuyela

Lizu lya Natani na kutenguluka kwa Ndavita

¹ Nyambi ya Ngula watumine muluwe wendi Natani kuli Ndavita. Natani wayile kukwendi pe wambile ngayi, “Kwekalile balume babili bekalilenga mu munzi umo, umo wengile wakuheta pe wamina wengile ncepwe.

² Mulume wakuheta wekalile na zingombe zazingi na bambelele,

³ ngoboni mulume wakushepwa wekalile na mbelele umo tuhu, owe alandile. Wamulelele shiwahe, pe wakulile ha munkanda wendi hamo na bana bendi. Watweshelenga kumulelesha byakulya byendi niyemwine na kumulehela ha nwina mu nkomoki yendi na kumuyaka mu muwombo wendi. Mbelele wafutukile kukwendi ngonehe mwanendi wa mbuyama.

⁴ Mutena umo muyeni wakumine ku litala lya mulume wakuheta. Mulume wakuheta kaliha washingile kuziha umo ku bimuna bendi na kumutendela byakulya, ngoboni washimbile mwana mbelele wa uya ncepwe na kuwahishila byakulya muyeni wendi.”

⁵ Niho Ndavita apilaminine shikuma mulume wakuheta pe wambile ngayi, “Nikulibeza muli Nyambi ya Ngula wakuyoya ngayi muntu unatende eshe wafwanina kufwa.

⁶ Ha kutenda shuma sha nehe sha ncili, wafwanina kuhingishamo bambelele banaa kupitakana uya ashimbile.”

⁷ Natani wambile kuli Ndavita ngayi, “Uya mulume nengi obe, pe eshe nisho anamba Nyambi ya Ngula, Nyambi wa Ishalela ngayi, ‘Nakwingile mwene wa Ishalela na kukupulwisha kuli Shaulu.

⁸ Nakupanine wene wendi na bakazendi nakwingile mwene wa Ishalela na Yunda. Ndi ebye byabulile kukukonkana shinga wakuyakilileko kabili.

⁹ Kati shumangani eshe unabulili kwombatala ndayano zami? Kati shumangani watendele shuma sha shibi? Waziha Uliya mu nzita, wetabilile Baamoni ngayi bamuzihe, pe niho wayekele mukazendi.

¹⁰ Haya, mushihemunwino na shihemunwino, ku bazukulyobe bamo bakafwa lufu lwa mushunga, ndaba wabula kunyombatala aha washimba mukaza Uliya.

¹¹ Nikulibeza kukwobe nami ngayi nikambila umo waku lupashi lwobe obemwine kuleta wukalu hahobe. Ukashimona oho nika kuyanga bakazobe na kupana ku mulume washenge, pe ukalala nabo mwaana ncanana.

¹² Oho wabipishile kuwi, ngoboni nikaholola eshe mwaana ncanana ngayi Baishalela nimwabo bakashimone.’ ”

¹³ Ndavita wambile ngayi, “Nabipishili Nyambi ya Ngula.” Natani wakumbwile ngayi, “Nyambi ya Ngula nakuyatili, kukafwa wufwako.

¹⁴ Ngoboni ndaba unalimbwilishi Nyambi ya Ngula ha kutenda eshe, mwanobe ukafwa.”

¹⁵ Niho Natani ayile ku munkanda wendi. Uya kanuke abelekele mukaza Uliya kuli Ndavita, Nyambi ya Ngula wamukoleshele shikuma.

Kufwa kwa mwana Ndavita wa mulume

¹⁶ Ndavita walombelele kuli Nyambi ngayi kanuke kampe ukapinduka. Wakanine kulya shuma shimo, pe zinciku nimwazo ziya ayilenga mu litala ku kampenci, walanganinenga hanci wushiku na wushiku.

¹⁷ Pe babilolo bendi bamu shinzanza bayile kukwendi na kwezeka kumupindula, ngoboni wakanine na kubula kulya nabo shuma shimo.

¹⁸ Oho kwapitile matena mutanu na abili kanuke wafwile, pe babilolo ba Ndavita bekalile na bowa wakumutongweza mbuzi. Bambile ngayi, “Oho kanuke engile wamumi, Ndavita kaliha watweshele kutwitabila oho twambilenga kukwendi. Pe tukamutongweza nahiti ngayi mwanobe unafu? Kampe ukutwesha kulilemeka.”

¹⁹ Oho Ndavita abatoshele hibaliyebetela, walimukile ngayi kanuke unafu. Pe wabepwile ngayi, “Kanuke unafu ndi?” Bakumbwile ngayi, “Ee, unafu.”

²⁰ Niho Ndavita apindukile hanci, wayowelele, washakwile huki zendi na kuvwala byashenge. Niho ayile na kulemesha mu Litala lya Nyambi ya Ngula, oho abokele ku musheke, washingile byakulya, oho bamanishile kubitenda, walile.

²¹ Babilolo bendi bambile kukwendi ngayi, “Kuyuvwishisha eshe tufwako, oho kanuke ushili wamumi, wamulililenga na kubula kulya, ngoboni wuluno oho anafu, unakonkomana na kulya.”

²² Ndavita wetabilile ngayi, “Ee nalizilikile kulya na kulila oho engile wamumi na hanganikile nami ngayi kampe Nyambi ya Ngula ukunyuvwila nceshe na kubula kwitabila ngayi kanuke afwe.

²³ Ngoboni haya unafu, kati shumangani kami eshe nikuzilila kulya? Kati nikutwesha kuyoyesha kanuke ndi? Mutena umo ninami nikaya okwe anayi, ngoboni niye kukaboka kukwami wufwako.”

Kuhemuwa kwa Sholomoni

²⁴ Niho Ndavita abengezekele mukazendi Mbatisheba. Walalile nendi, pe wabelekele mwana wa mulume, owe atumbile Ndavita lizina lya Sholomoni. Nyambi ya Ngula wahakile Sholomoni,

²⁵ pe watongwezele muluwe wendi Natani kumutumba lizina lya Yendindiya.

Ndavita ukukoma Laba

²⁶ Shikati shiya bene Yowambu wazaminine kulwisha lukena lwalunene lwa Lamba, lukena lwa Baamoni na kulukoma.

²⁷ Yowambu watumine bantumwana kuli Ndavita mu kushimika ngayi, “Ninalwishi Lamba na kukoma okwe batekulanga mema.

²⁸ Haya kungula wingi wa bakanzita bobe, lwisha lukena lwinge lwobe. Kushinga kutumbalalila lukena ndi nikulushimba nifwako.”

²⁹ Niho Ndavita alobele bakanzita bendi, kuya ku Lamba. Walwishile lukena pe walukomene.

³⁰ Washimbile munana wa ngolinde wekalile ku mutwe wa mwene yabo. Munana owe wulemu wawo wengile makilongilamu 35, niwo wekalile na limanya lya ndando yayinene lyatungiwile kumo. Washimbile kami mushiinzi wawunene wa lipuku lyamu munzi.

³¹ Washimbile bantu bamu munzi pe wabayakile ku mulimo wa mashaha na kufula makahu na tuzembe na kubakandikiza kutenda mulimo wa bintina. Watendele noho shuma shimo ku bantu nimwabo bamu minzi yamina yamu Amoni. Niho Ndavita na bantu bendi babokele ku Yelushalema.