2 Shamwele 11 - Libuka Lya Kuyela

Ndavita na Mbatisheba

¹ Shikati sha mvumbi, ha shikati bamyene bayilenga ku nzita, Ndavita watuminenga Yowambu na babilolo bendi na bakanzita ba Ishalela, bakomene Baamoni na kuzinguluka lukena lwa Lamba. Ngoboni Ndavita washalilenga mu Yelushalema.

² Mutena umo, ku shikati sha mazolo, Ndavita wapindukile ha wulili wendi pe wayile ha shihoke sha musheke wendi. Oho endelenga na kuzinguluka kuyo, wamonene mbuyama wayowelelenga, wengile mbuyama wamuwahe shikuma.

³ Niho Ndavita atumine ntumwana mu ku mona ndi wengile yani, pe wakawanine ngayi wengile Mbatisheba, mwana Eliyami, mukaza Uliya wa Kahita.

⁴ Nohobene Ndavita watumine bantumwana mu kumuleta, bamuletele kukwendi pe walalile nendi. (Oho niho ha kufuma ku nciza ya munzi.) Niho abokele ku munkanda wendi.

⁵ Niho aliwanine ngayi unemiti pe watumine lizu kuli Ndavita mu kumutongweza.

⁶ Ndavita niho atumine lizu kuli Yowambu ngayi, “Ntumine Uliya wa Kahita kuno.” Niho Yowambu amutumine kuli Ndavita.

⁷ Oho Uliya akumine, Ndavita wamwipwile ndi Yowambu na mihoko ya bakanzita bekalile shiwahe naneshi yikwenda nzita.

⁸ Niho ambile kuli Uliya ngayi, “Yanga ku munkanda wobe ukakwanguluke shashishe.” Uliya wayile, pe Ndavita wamutuminine shishemo ku munkanda wendi.

⁹ Ngoboni Uliya kaliha wayile ku munkanda wendi, pe niho alanganine ku lipangati lya musheke wa bakakulama ba mwene.

¹⁰ Ndavita oho ayuvwile ngayi Uliya kaliha waya ku munkanda wendi, wamwipwile ngayi, “Obe wafumineho, haya shumangani wabulila kuya ku munkanda wobe?”

¹¹ Uliya wakumbwile Ndavita ngayi, “Bantu ba Ishalela na Yunda banayi ku nzita, pe Likwati lya Kulimama lili kukwabo. Yowambu, mukulwane wa bakanzita na babilolo bendi banatulili mu mfuba mwa nahiya. Pe nikatwesha nahiti kuya ku munkanda wami mu kulya na ku nwa na kulala na mukazami? Na biya bya shizila nimwabyo, aha uli na kuyoya, nikulibeza kukwobe ngayi kukatenda shuma shiyo nifwako.”

¹² Niho Ndavita ambile ngayi, “Pe onzela kuno mutena nimwawo, pe nzona nika kubwesha.” Niho Uliya onzelele mu Yelushalema mutena uyo wamina.

¹³ Pe Ndavita wehanine Uliya ku mulalilo, wamukolweshele. Ngoboni kami wushiku uyo Uliya kaliha wayile ku munkanda wendi, ngoboni walalile ha muyemba wendi mu kampenci ka bakakulama ku musheke.

¹⁴ Kwashileko lumenemene Ndavita watikitilile Yowambu liñwati na kulituma na Uliya.

¹⁵ Watikitile nehe ngayi, “Twamika Uliya ku muhoko wakumbili, okwe kunanenehele nzita, pe shintulukenu na kumuleha azihiwe.”

¹⁶ Pe oho Yowambu alwishilenga lukena, watumine Uliya ku mbalila okwe alimukile ngayi kwekalile bamalamo ba kushuma.

¹⁷ Pe bakanzita ba bamalamo bafumine mu lukena na kulwisha bakanzita ba Yowambu, bamo ha babilolo ba Ndavita bazihiwile, pe na Uliya kami wazihiwile.

¹⁸ Niho Yowambu atumine lizu kuli Ndavita lya kumutongweza ha bakanzita.

¹⁹ Niho atongwezele ntumwana ngayi, “Oho wamanishakale kutongweza mwene ha nimwabyo bya nzita,

²⁰ pe hamina ukapilama na kukwipula ngayi, ‘Shumangani kati mwahenyena kwakwipi na lukena mu kubalwisha? Kati kulimuka mufwako ngayi ba kutwesha kumipuha mivwi yamu twimbi ndi?

²¹ Kati munavulama eshe Ambimeleki, mwana Ngindiyoni wa mulume, azihiwile ku Tembezi ndi? Okwe amwandumwinine mbuyama limanya lya kupela ku kembi na kumuziha. Pe shumangani mwahenyena kwakwipi na kembi?’ Ndi mwene ukukwipula eshe, mutongweze ngayi, ‘Na shilolo wobe kami Uliya wa kahita wazihiwa.’ ”

²² Niho ntumwana ayile kuli Ndavita mu ku shimikila ebye amutongwezele kwamba Yowambu.

²³ Wambile ngayi, “Bamalamo betu bengile bangovu kupitakana pe bezile ha munkanda wa lukena na kutulwisha mu mfuba mwa kubula shimina, ngoboni twa babweshelele ku lipangati lya lukena.

²⁴ Niho bapuhile mivwi kukwetu ku kembi, pe bamo ba babilolo bahekulu banazihiwi, kami shilolo wenu Uliya unazihiwi.”

²⁵ Ndavita wambile ku ntumwana ngayi, “Kakancishe Yowambu na kumutongweza ngayi hinga alinyenga, ndaba kowa umo ukulimuka ngayi yani ou akafwe mu nzita. Mutongweze kutuma bakakulwa ba kushuma ha lukena na kulukoma.”

²⁶ Oho Mbatisheba ayuvwileko ngayi mukokwendi Uliya unazihiwi, wamulilile.

²⁷ Pe oho shikati sha kulila shamanine, Ndavita wamuletele ku musheke, wafutukile kwinga hi mukazendi pe wamubelekelele mwana wa mulume. Ngoboni kaliha shawahilishile Nyambi ya Ngula eshe atendele Ndavita.