2 Shamwele 1 - Libuka Lya Kuyela

Ndavita ukuyuvwa bya lufu lwa Shaulu

¹ Oho Shaulu wafwakale, Ndavita wafumine ku nzita kuya ayile ya kukoma Baamaleki, pe wekalile matena abili mu Zikilangi.

² Oho kwashileko, ku munkungwa wa Shaulu kwafumine ndumbana, ha ku monesha wunginga wendi wezile na kutabozola bivwalo byendi na kulifukwila limvu ku mutwe. Pe oho akumine kuli Ndavita, wafunkamine hanci na kulamba.

³ Ndavita wamwipwile ngayi, “Kati ukufuma kuti?” Pe wakumbwile ngayi, “Ninakapanza ku munkungwa wa Baishalela.”

⁴ Ndavita wamwipwile ngayi, “Ntongweze ebye binakatendiwiko.” Wakumbwile ngayi, “Bakanzita betu banetuku ku nzita, pe bantu betu babengi banazihiwi. Shaulu kami na mwanendi Yonatana banazihiwi.”

⁵ Ndavita wamwipwile ngayi, “Ukulimuka nahiti ngayi Shaulu na mwanendi Yonatana banafu?”

⁶ Wakumbwile ngayi, “Nekalile ku lipili lya Ngilimbowa namonene Shaulu hinga ayendamina ku mulinga wendi, pe makoloyi a nzita na bantu banakandama ha bambishi ba bamalamo betu bali na kumulalabila.

⁷ Niho ashetukile, wamonene pe wanyihanine na kumbwile ngayi, ‘Ingoi, hekulu.’

⁸ Wanyipwile ngayi, ‘Kati obe yani?’ Pe namutongwezele ngayi, ‘Nili Kaamaleki.’

⁹ Niho ambile ngayi, ‘Ndaba nalemana shikuma, pe nili hahepi na kufwa. Yeka kuno umfuwulule.’

¹⁰ Niho nayile na kumuziha ndaba nalimuka ngayi wuluno afwe awila tuhu hanci. Niho nashukulu munana ku mutwe wendi na likaya lya ku liboko pe nabilete kukwobe obe hekulu.”

¹¹ Ndavita watabwele bivwalo byendi mu ku monesha wunginga. Pe bantu bendi nimwabo batendele shuma shimo.

¹² Balinyengele na kulila hali Shaulu na Yonatana na ha bantu ba Nyambi ya Ngula na ha mukoka wa Ishalela pe bazilile kulya kukuma naku mazolo ndaba babengi shikuma bazihiwile mu nzita.

¹³ Ndavita wepwile ndumbana ou wamuletelele mbuzi ngayi, “Kati wafuma kuti?” Wakumbwile ngayi, “Nili Kaamaleki mwana lipukwenda, ngoboni nekala mu litunga lyobe.”

¹⁴ Ndavita wamwipwile ngayi, “Bishini ebye wabulila kwikala na bowa wakuziha mwene ou awabishile Nyambi ya Ngula?”

¹⁵ Niho Ndavita ehanine umo ha bantu bendi pe wambile ngayi, “Muzihe.” Mulume washwangile Kaamaleka pe wamuzihile.

¹⁶ Ndavita wambile kuli Kaamaleka ngayi, “Unengi ngulube unafu ku shitamba. Waliyata obemwine oho wetabila ngayi waziha muntu ou awabishile Nyambi ya Ngula kwinga mwene.”

Mbingo za Ndavita hali Shaulu na Yonatana

¹⁷ Ndavita watuwile mbingo hali Shaulu na mwanendi Yonatana.

¹⁸ Pe washingile ngayi lulongeshiwe ku bantu ba Yunda. Eze mbingo zatumbiwile ngayi Shipando sha mukunzi. (Nizo zatikitiwa mu libuka lya Yasha.)

¹⁹ “Baishalela bakakutwaminina betu ba maleema banafwili ha binkanda! Bakanzita betu ba kukanca shikuma banawu.

²⁰ Hinga ubilikasho mu Ngati, hinge mu zimbanza zamu Ashikeloni. Hinge kuwahililisha bambuyama bamu Fwilishitina. Hinge kwitabilisha bana babambuyama babaya babula kuya ku mukanda ngayi batangale.”

²¹ “Mwanga kubule mvula hinge mume wakuwila ha mapili a Ngilimbowa. Mwanga mafuba wamo enge anyuminine shikati nimwasho. Ndaba makebo a bakakukanca analangana kuyo, na likebo lya Shaulu lina shampuku.

²² Shipando sha Yonatana sha mukunzi shengile sha kufwana, kuwishila hanci bangovu, mukwale wa Shaulu wazihile bamalamo.”

²³ “Shaulu na Yonatana, mu kuyoya benganga bakulihaka na kulishinga shikuma. Bekalile hamo mu kuyoya kwabo pe bafwilile kami hamo, bafukumukilenga kupitakana bangonga, kami bengile bangovu kupitakana babimbwi.

²⁴ Tuwenu mbingo hali Shaulu, enu bambuyama bamu Ishalela. Wamivwikilenga bivwalo byabiwahe bya shimbombo, pe wayalilengaho bya kuliyenga bya ngolinde.

²⁵ Bakanzita ba kukanca banawu, banazihiwili mu nzita. Yonatana unalangana hanci wakufwa, ha binkanda bya Ngilimbowa.

²⁶ Nili na manyengo hahobe, obe mbayi Yonatana wangwahilishilenga ku mutima. Shishemo shobe kukwami shengile sha kukomokesha, kupitakana shishemo shiya sha bambuyama ku bakokwabo.

²⁷ Baishalela bakanzita betu ba kukanca nimwabo banamana, na bilwisho byabo byengakale hibyowa.”