2 Pita 1 - Libuka Lya Kuyela

¹ Ami Shimoni Pita, mukamulimo na ntumwana wa Yeshu Kilishitu. Nikutikitila aba banatambulu kukulupila kwakuwahe oku tuli nakwo nanetu, kupitila mukwoloka kwa Nyambi na Mupulwishi wetu Yeshu Kilishitu.

² Nceshe na ku mwena bihanye kukwenu kupitila mu kalimukisho ka Nyambi na Yeshu Mwene wetu.

Kwihana na kuhata kwa Nyambi

³ Ngovu za Nyambi zinatupana byuma nimwabyo biku fwanina wumi na Wunyambi, kupitila mu kalimukisho kendi ou unatwihana mu wuwahe na mukwoloka.

⁴ Kupitila mumwabyo, Nyambi unatupana bikulupisho byabinene shikuma na byabiwahe, ngayi nanibyo mwinge bakakutambula shitapilo sha shihemwa sha kuyela, ngayi mutweshe kupanza ku mazika kanwa ali mu kaye, ndaba ya mahungu amabi.

⁵ Nohobene, ezekenu shikuma ngayi muwezelele byabiwahe ku kukulupila kwenu, ku byabiwahe wezelelenuko kalimukisho,

⁶ ku kalimukisho wezelelenuko kulizikilila, ku kulizikilila wezelelenuko kulilama, ku kulilama wezelelenuko lunzewe, ku lunzewe wezelelenuko Wunyambi,

⁷ ku Wunyambi wezelelenuko shikeketima sha wushinda, ku shikeketima sha wushinda, wezelelenuko shishemo.

⁸ Ndaba ndi mukwikala nanebye mu wingi, pe bikamingisha ngayi enu mwinge bakakukalamana na bakakuyima mikabo mu kalimukisho ka Mwene wetu Yeshu Kilishitu.

⁹ Ngoboni niye wakubula byuma ebye, nengi mukakumonena hahepi, kami kashishitwa, unavulama ngayi wayoweshiwa ku wubi wendi wa mwaka.

¹⁰ Nohobene bawushinda, shinene zundaminenu shikuma ngayi mushumishe, ndaba munehaniwi, kami munahatiwi. Ndi mukutenda ebye, kukawa mufwako nihani,

¹¹ pe mukatambuliwa na maleema ha kwingina mu Wene wa mwaya myaka wa Mwene na Mupulwishi wetu Yeshu Kilishitu.

¹² Nohobene nikumyanukishanga ebye byuma shikati nimwasho, hinge ndi ngayi mwabilimuka kami munalishumishi mu kupwisha okwe muli nakwo.

¹³ Nikuhanganika ngayi shinawaha kupindulanga bihanganiko byenu, oho nishili kuyoya mu lutu luno.

¹⁴ Ndaba hinilimuka ngayi wuluno nivule lutu luno ngonehe antongwezele Mwene wetu Yeshu Kilishitu.

¹⁵ Kami nikwezeka shikuma ngayi mwanga kunyima ya lufu lwami, mukatweshe kwanukanga shikati nimwasho ebye ninamba.

Bapaki bekalileko oho Kilishitu amonekele mu wuwahe

¹⁶ Oho twamitongwezele bya ngovu na kwiza kwa Mwene wetu Yeshu Kilishitu, kaliha twambilenga bya tushimpu twa ku shangama, ngoboni ebye twamonene na meho etu.

¹⁷ Ndaba oho atambwile maleema na wuwahe kuli Nyambi Tate, kwayuvwanikile lizu lyafumine ku Wuwahe Wakukangana lyambile ngayi, “Ou niye Mwanami nahaka, niye ukungwahililisha.”

¹⁸ Twayuvwile elye lizu lyafumine muyilu, oho twekalile nendi ha lipili lya kuyela.

¹⁹ Kami tuli na lizu lya bamiluwe lya kupwisha shikuma, mukutenda shiwahe ndi mu kuliyuvwilila, ngo ku lambi yikumunika mu mwanya wa mincimpwe, hantu malungashiku na litota litutike mu mitima yenu.

²⁰ Shuma sha kutatika mwafwanina ku yuvwishisha ngayi, kowa kulubulula kwanebye byatikitiwa kwezile na kutontolola kwa muntu.

²¹ Ndaba kulubulula kaliha kwezile na shamutima wa muntu, ngoboni bantu bambilenga bya Nyambi ngonehe Moyo wa Kuyela wabatwamininine.