2 Kolinte 5 - Libuka Lya Kuyela

¹ Ndaba tukulimuka ngayi, zinyutu tukwikalamo mu litunga lino zinafweke ngo ntanda. Ngoboni tukulimuka ngayi eye ntanda ya kubipishiwa, tukekala na litala lyamina elye Nyambi anatutendele kuyilu. Olyo litala kaliha balitendele na maboko a bantu, kami likekala mwaya myaka.

² Ndaba mu shuma eshe tukushunga na kushinga shikuma ngayi tufwikiwe na litala lyetu lya kufuma kuyilu.

³ Ngayi hinga twavwikiwa, tukabula kuwaniwa muhelengwa.

⁴ Etu tuli mu ntanda yino tukushunga, hinga twalemenena. Kaliha ngayi tukushinga kuyivula eyi ntanda, ngoboni tukushinga kuvwikiwa lutu lwa kuyilu, ngayi shiku fwanina kufwa shiminiwe ku wumi.

⁵ Nyambi niye unatuwahishili shuma eshe, kami unatupana Moyo wa Kuyela kulimama kwendi.

⁶ Ndaba ya shuma eshe tukukulupila matena nimwawo na kulimuka ngayi, shikati nimwasho tulinakwikala mu lutu olwe, tulikwakutali na Mwene.

⁷ Ndaba tukwenda na kukulupila, kaliha na ku mona.

⁸ Tukushumankana shinene ngayi tufume mu lutu luno na kuya na kwikala na Mwene.

⁹ Ngoboni ku shinga kwetu hayilu ya byuma nimwabyo kumuwahilisha, hinga tukwikala mu lutu luno hinga lwa kuyilu.

¹⁰ Ndaba nimwetu tuku fwanina kukemana kuli Kilishitu ngayi atuyate, ngayi muntu na muntu atambule byuma byamufwanini, kuya nanebye atendele, byabiwahe hinga byabibi.

Wuhoni na Nyambi kupitila muli Yeshu

¹¹ Nohobene ndaba tukulimuka kutinisha kwa Mwene, nibyo tuku kandamikila bantu kwiza kukwendi. Nyambi atulimuka shiwahe, kami niku kulupila ngayi hinga enu mutu limuka shiwahe.

¹² Tufwako kulimanina etubene kukwenu, ngoboni tukumipana mwanya wa kuliyemeza ndaba yetu, ngayi mwikale na shuma sha kukumbula kukwabo ba ku wahilila mu byuma biku moneka, kaliha na byuma bya mu mutima.

¹³ Ndaba ndi tunapempele kuli Nyambi, twatende ebye ngayi tuyemeze Nyambi. Ngoboni ndi tukutenda bya wuntu, pe tukutenda ebye ngayi tumiyavwe.

¹⁴ Shishemo sha Kilishitu shikutukandikiza, ndaba tukulimuka ngayi muntu umo wafwilile bantu nimwabo, pe nimwabo bali na shitapilo mu lufu lwendi.

¹⁵ Kilishitu wafwilile bantu nimwabo, ngayi babomi hinga baliyoyela nibobene, ngoboni bayoyele niye wabafwilile, kami washangukile ku bafu ndaba yabo.

¹⁶ Nohobene kufuma mutena walelo tufwako kuhanganikila muntu ha kukonka ngana za bantu. Hinge twalimukile Kilishitu na wuntu, ngoboni mutena uno tufwako kami kumuhanganikila.

¹⁷ Nohobene ndi muntu uli muli Kilishitu, niye nengi shibumbwabumbwa shashipya, byuma bya mwaka binamana, byuma nimwabyo binafutuku wupya.

¹⁸ Byuma nimwabyo byenga bya Nyambi, ou unatuwaniki kupitila muli Kilishitu kukwendi, kami unatupana mulimo waku tabwela.

¹⁹ Nikwo ngayi Nyambi wafungilile na bantu nimwabo muli Kilishitu kwakubula kulaba wubi wabo, kami unapana kukwetu lizu lya ku lyambwilila.

²⁰ Wuluno etu tukwinga bankamba ba Kilishitu, nehi Nyambi uli na kumi kowamina nanetu, tukumilomba mu lizina lya Kilishitu ngayi lyambwililenu na Nyambi.

²¹ Kilishitu kaliha watendele wubi, ngoboni Nyambi wamwingile wubi ndaba yetu, ngayi etu tutendiwe bakulunga kuli Nyambi.