2 Kolinte 4 - Libuka Lya Kuyela

Wuheti wa moyo mu zinyungu za lima

¹ Nyambi mu nceshe zendi unatupaniki mulimo ou, nibyo tukubula kupopa.

² Tunalihupwizi ku byuma nimwabyo bya kuwi bya kuyuvwisha lisheni. Tufwako kutenda byuma mu ku shoshoka, hinga kufutozola lizu lya Nyambi. Tuku monesha kupwisha ha kuyela, ha kutenda noho tukulipaka na shikeketima sha kupwisha ku muntu nimwendi ku meho a Nyambi.

³ Hinga ndi ncango zetu tu ku shimikila zikulimbiwa, zikulimbiwa kukwabo bakuya na kunonga.

⁴ Nibo kukulupila bafwako, ndaba ngayi Shatana ou nengi nyambi wa litunga lino, unashipishi mitima yabo, kutina bamona mwaana wa ncango zaziwahe, lumuni luyo luku monesha wuwahe wa Kilishitu, kami mumwendi muli shifwekesha sha Nyambi.

⁵ Ndaba kaliha tukulishimikila etubene, ngoboni tu ku shimikila Yeshu Kilishitu, ngayi Mwene. Etu tuli bakamilimo tuhu ndaba ya Yeshu.

⁶ Ndaba Nyambi wambile ngayi, “Mwana umunike ku mincimpwe.” Nyambi umo niye wambile kami ngayi umunike mu mitima yetu, ngayi bantu balimuke wuwahe wa Nyambi ou ukubyazima ku lupala lwa Yeshu Kilishitu.

⁷ Ngoboni etu tuli mwakuholekelamo wuheti wa moyo zintesho za lima, ngayi kumoneke ngovu za Nyambi, kaliha ngovu zetu.

⁸ Tunawana makalikiza nimwawo, ngoboni ku tampuka mitima tufwako, tukuncincoka, ngoboni tukubula kutamwa,

⁹ bamalamo ba kutuyandisha, ngoboni tukubula kushiyiwa, ba kutuwishila hanci, ngoboni kuzihiwa tufwako.

¹⁰ Bikati nimwabyo twashimbanga lufu lwa Mwene Yeshu mu zinyutu zetu, ngayi wumi wa Yeshu kami umoneke mu zinyutu zetu.

¹¹ Bikati nimwabyo, hinga ngayi tuli na moyo, tulinakupanikiwa ku kufwa ndaba ya Yeshu, ngayi wumi wa Yeshu umoneke mu zinyutu zetu za kufwa.

¹² Nohobene etu tukutwaliwa ku kufwa, ngoboni shuma eshe shikumipana wumi.

¹³ Kwatikitiwile ngayi, “Nakulupilile nohobene namba.” Pe nanetu na moyo wumo wakukulupila, ebye tukukulupila nibyo tukwamba.

¹⁴ Ndaba tukulimuka ngayi Nyambi ou washangwile Mwene Yeshu ku bafu, ukatushangula hamo na Yeshu na kutwimika hamo nenu hambili yendi.

¹⁵ Byuma ebye nimwabyo bili na kutendiwa ndaba yenu, ngayi bantu babengi bakalimuke nceshe za Nyambi, pe bakakambilila na kuhanyisha wuwahe wa Nyambi.

Kuyoya mu kukulupila

¹⁶ Ndaba ya shuma eshe tukubula kupopa. Hinge zinyutu zetu za wuntu zikubola, ngoboni muntu wa mukati ukufutuka wamupya ha mutena ha mutena.

¹⁷ Ndaba kuyanda kwetu oku kwa kashikati pele kutubalakanyina wuwahe tutendele wulemu wa mwaya myaka, wakupitakana wakutatika.

¹⁸ Ndaba kaliha tukutilamina ha byuma bya ku moneka, ngoboni ha byuma bya kubula ku moneka, ndaba byuma bya ku moneka byenga bya kashikati kakashe, ngoboni byuma bya kubula ku moneka byenga bya mwaya myaka.