2 Kolinte 3 - Libuka Lya Kuyela

Bakamilimo ba kulimama kwakupya

¹ Kati hakwamba ebye, tukutatika kulilundumika etubene ndi? Hinga tukushinga, ngo bamina, mañwati akutwimanina kukwenu, hinga mañwati akutwimanina akufuma kukwenu ndi?

² Enu mukwinga mañwati etu atikitiwile mu mitima yetu, akulimukiwa ku bantu nimwabo na kulabiwa.

³ Bantu nimwabo ba kutwesha ku mona ngayi enu mukwinga liñwati lya Kilishitu, lyatikitiwile kupitila mumwetu, kaliha lyatikitiwile na inki, ngoboni na Moyo wa Nyambi wakuyoya, kaliha ku matapa a mamanya, ngoboni mu matapa a mitima ya bantu.

⁴ Tulinakwamba nahiyo ndaba tunakulupili kuli Nyambi kupitila muli Kilishitu.

⁵ Ndaba ngayi etu kaliha tukutwesha kuhanganika shuma shamina sha kufwanina kutenda ou mulimo. Ngoboni watupanikanga ngovu Nyambi za ku fwanina kutenda ou mulimo.

⁶ Niye unatupana ngovu ngayi twinge baka ku shimikila kulimama kwakupya, kaliha na ndayano za kutikita, ngoboni na Moyo wa Kuyela. Ndaba ndayano za kutikita zikuleta kufwa, ngoboni Moyo wa Kuyela ukupana wumi.

Wuwahe wakulimama kwakupya

⁷ Ndayano zatikitiwile na kupabula ha mamanya, zapanikiwile na wuwahe wawunene, ngayi bana ba Ishalela kaliha batweshele kutilamina shikuma lupala lwa Moshesha ndaba ya kubyazima. Haya ndi ziya ndayano zaleta kufwa, nizo zezile na wuwahe wa nahiyo,

⁸ Kati mulimo wa Moyo wufwako kukekala na wuwahe wakupitakana oho ndi?

⁹ Ndaba ndi mulimo wakuyata bantu wengile wawuwahe, haya kati mulimo wakupulwisha ukapitakana.

¹⁰ Ndaba ya wuwahe wakupitakana wamonekakale, byuma bya myaka byekalile na wuwahe, matena ano bifwabyo wuwahe.

¹¹ Ndaba ndi eshe shamanine shengile sha kuwaha, pe eshe shikwikala shili na wuwahe wa mwaya myaka.

¹² Nohobene ndaba tuli na kulumbeza kwanoho, tukwamba na nkanca.

¹³ Kaliha tukutenda ngo Moshesha ou wafwikile lupala lwendi na likwiza kutina bana ba Ishalela batwesha ku mona kumana kwa wuwahe.

¹⁴ Ngoboni mitima yabo yekalile mu wulube, kuleta na ku mutena uno, kapayi kamo kanashala oho bashili kulaba kulimama kwa mwaka. Kapayi kakufumishiwa oho muntu ali muli Kilishitu.

¹⁵ Hinga kuleta ku mutena uno oho bakulaba Ndayano za Moshesha, kapayi kakufwika mitima yabo.

¹⁶ Ngoboni oho muntu akutengulukila kuli Nyambi, kapayi kakafumishiwa.

¹⁷ Wuluno mu liñwati lino “Mwene” wenga Moyo, kami hali Moyo wa Mwene hali ku shoboloka.

¹⁸ Etu nimwetu, kwakubula kufwika zimpala zetu, tumoneshenu wuwahe wa Mwene, niye Moyo, nehi shimboni shamoneshanga lupala lwa muntu. Nimwamo omwe tukufutwilila ku shifwekesha shendi na kwikala na wuwahe wa Mwene mu wingi.