2 Kolinte 2 - Libuka Lya Kuyela

¹ Pe nahanganiki ebye mu mutima wami ngayi nifwako kukeza kukwenu na kumiyuvwisha lisheni.

² Ndaba ndi nikamiyuvwisha lisheni, yani ou ukangwahililisha? Ndele enubene aba nayeneshele.

³ Nibyo natikitilile byuma ebye kukwenu, kutina oho nezi, kukwabo bafwanina kungwahilisha banyuvwishe lisheni. Ndaba nikulimuka ngayi ami nawahilili nenu, kami mwafwanina ku wahilila.

⁴ Oho namitikitilile liya liñwati nakolele ku mutima na kuyena, kami nalilile shikuma. Kaliha ngayi muyuvwe lisheni, ngoboni ngayi mulimuke shishemo eshe nili nasho shikuma kukwenu.

Kuyatila aba banabipishi

⁵ Haya ndi wamina unayuvwishi minendi lisheni, kaliha unayeneshe ami tuhu, ngoboni unayuvwishi lisheni nimwenu, ngayi nibule kumi kulikisha nimwenu.

⁶ Shashiwahe ngayi muntu wanoho kunamulingana oho ananyanciwi ku bantu babengi.

⁷ Nohobene, mu ku fwanina kumuyatila na kumubengezeka kutina ayuvwa lisheni lya kumutwala ku kunonga.

⁸ Pe nikumilomba ngayi mumoneshe na milimo ngayi mwamuhaka.

⁹ Oho namitikitilile liya liñwati nashingile kulimuka ndi mukwombatala byuma nimwabyo.

¹⁰ Ku nimwendi mu kuyatila nami kami nikumuyatila. Ndaba ndi nayatili, kukwendi nayatili ndaba yenu ku meho a Kilishitu,

¹¹ kutina Shatana awane mwanya kukwetu, ndaba tulimuka biheka byendi.

Paulu ukutinina mu Tolowashi

¹² Oho na kumine ku Tolowashi mu ku shimikila ncango zaziwahe za Kilishitu nawanine Mwene unashinkululu nzila ya mulimo wendi.

¹³ Ngoboni mu mutima wami kaliha mwekalile ku mwena ndaba nabulile kuwanako kawushinda wetu Taitashi. Niho nalishalishile nabo, pe nayile ku Mashendoniya.

Kukona muli Kilishitu

¹⁴ Tukambililenu kuli Nyambi! Ndaba kulifungila kwetu na Kilishitu, ukutwaminina bikati nimwabyo mu nzila ya kukona. Nyambi ukuliyavwisha etu ngayi bantu nimwabo balimuke Kilishitu, pe kalimukisho aka, kakukwayana ngo livumba lya kunuka shiwahe lya kwayananga mu zimbalila nimwazo.

¹⁵ Ndaba etu tukwinga ngonehe incence ya Kilishitu yatupuliwanga kuli Nyambi, mukati ka bantu ba kupuluka nanibo bakaloba.

¹⁶ Ku baya bakuya na kunonga tuli livumba lya lufu, kami likabanongesha. Ngoboni ku baya bakapuluka, tukwinga livumba lya wumi, kami likabapana wumi. Haya yani uku fwanina kutenda byuma ebye?

¹⁷ Etu kaliha tukufweka ngo bantu babengi ba Kubipisha lizu lya Nyambi, ngoboni ndaba ngayi tuli muli Kilishitu, ngonehe bantu banatumiwi na Nyambi, tukwamba kupwisha, kuya na shifungo shendi.