2 Kolinte 13 - Libuka Lya Kuyela

Mazu amamaninino

¹ Eshe shikati sha wuhatu nikwiza kukwenu. Ndaba kwatikitiwile ngayi, “Mu tunwa twa bapaki babili hinge bahatu shambo nimwasho shishumishiwe.”

² Nikushinga kwamba kukwabo batendele wubi ku matena akunyima na ku bamina nimwabo namitongwezele mwaka nehi nekalileko shikati sha wubili nehi nikwamba kami ngayi nakeza kami nifwako kukekala na shihota na muntu.

³ Pe mukamona bilimukisho mukushinga bya ku monesha ngayi Kilishitu wambanga mumwami. Kilishitu kaliha wakubota kukwenu, ngoboni uku monesha ngovu zendi kukwenu.

⁴ Ndaba hinge wengile wakubota oho akolekiwile ha shishempakano, ngoboni ha shikati shino uli na kuyoya mu ngovu za Nyambi. Nanetu kami tukubota mumwendi, ngoboni tukayoya hamo nendi mu ngovu za Nyambi, ha kutenda milimo yetu kukwenu.

⁵ Lihengolenu na kuliyata enubene na ku shingishisha ndi muli mu kukulupila. Kati kulimuka mufwako ndi Yeshu Kilishitu uli mumwenu ndi? Ndi kaliha noho, pe munakwanga.

⁶ Ngoboni nikukulupila ngayi mukalimuka ngayi etu kaliha tunakwanga.

⁷ Tukulomba kuli Nyambi ngayi mubule kutenda wubi. Kaliha ngayi etu tumoneke ngo tunapitakana, ngoboni ngayi enu mutende bya ku fwanina, hinge etu tukukwanga.

⁸ Ndaba kutwesha tufwako kutenda shuma sha kukana kupwisha, ngoboni tukatenda bya kwimanina kupwisha.

⁹ Tuku wahilila oho etu tukubota, ngoboni enu mu kushuma. Shuma tukulomba kuli Nyambi ngayi enu mulembuke.

¹⁰ Nohobene nikutikita byuma ebye oho nabuluko, ngayi nakeza kukwenu hinga nikatenda milimo na wukali. Kutina shinga nekalako nambe na mazu amatwe, nehi ngovu eze Mwene anampana, ngovu za kuzikisha matengo, kaliha za kunongesha.

Kushangwisha kwa mamaninino

¹¹ Pe bawushinda, shangwe! Yuvwililenu ebye nikumitongweza, lembulukenu. Liyuvwenu umo na wamina na kwikala hamo mu ku mwena. Nyambi wa shishemo na ku mwena ukekala nenu.

¹² Lishangwishenu umo na wamina na kulizupeza kwa kupwisha.

¹³ Bantu ba Nyambi nimwabo ba kumishangwisha.

¹⁴ Nceshe za Mwene Yeshu Kilishitu na shishemo sha Nyambi wa Kuyela, bikale nenu nimwenu.