2 Kolinte 12 - Libuka Lya Kuyela

Shimono sha Paulu

¹ Niku fwanina kuliyemeza. Ngoboni ndaba kaliha shashiwahe ngayi niliyemeza, haya nikwamba bya bimonekesho nanebye Mwene aholwele kukwami.

² Nikulimuka muntu muli Kilishitu ou wakatuliwile na kutwaliwa ku liyilu lya wuhatu, haya kwapitakale myaka likumi na yinaa kufuma ku shikati shiyo (kulimuka nifwako ndi uya muntu wakatuliwile na lutu lwendi, hinge ndi shengile shimonekesho, Nyambi tuhu niye ukulimuka).

³ Nikulimuka ngayi ou muntu waliwanine uli mu Palandayishi (ndi wayile na lutu, hinge ndi wayile kwakubula lutu, kulimuka nifwako, Nyambi tuhu niye ukulimuka),

⁴ wayuvwile mazu a muyilu aya muntu a kubula kutwesha kuwamba.

⁵ Ndaba ya muntu wanoho nikaliyemeza, ngoboni amimwine kukaliyemeza nifwako, ndele tuhu ha kupopa kwami.

⁶ Ndaba hinge ndi nikushinga kuliyemeza, kaliha ngayi nikwinga wakubula ngana, ndaba nikamba bya kupwisha. Ngoboni kukaliyemeza nifwako, ndaba kaliha nikushinga ngayi muntu wamina ahanganikile bya kupitakana ebye anamono kukwami, hinge ebye akuyuvwa kukwami.

⁷ Haya ha kutinisha ngayi nikaliyemeza shikuma ha byuma byabingi biya byaholokele kukwami nayakiwile muhongela mu lutu lwami uya wengile ngo ntumwana wa Shatana ngayi unyuvwishenga kukola, pe mwanga hinga niliyemezanga.

⁸ Ndaba ya shuma eshe nalombelele kuli Mwene kahatu ngayi shifume kukwami.

⁹ Ngoboni wambile kukwami ngayi, “Nceshe zami nizo ukushinga, ndaba ngovu zami zanenehanga mu kupopa kwobe.” Nohobene nikaliyemeza shikuma na ku wahilila mu kupopa kwami, ngayi ngovu za Kilishitu zikale hahami.

¹⁰ Nohobene ndaba ya Kilishitu niku wahilila mu kupopa na mu makendu na mu makando na mu byezeko na mu makalikiza. Ndaba ndi nikupopa, pe nikwinga mukakushumisha.

Shitima sha Paulu ku Bakakolinte

¹¹ Ninengi ngo shibulangana, ngoboni enu munanyingishi nehe, ndaba enu munafwanini kumpaka. Hinge ndi nili tuhu wanahiya, kaliha ngayi nili ntumwana wamamaninino wakubula kulimuka shamina ku “Bantumwana” benu babanene.

¹² Mwa shikuma bilimukisho na bikomokesho na milimo ya ngovu ebye biku monesha wuntumwana wami, byatendiwile mukati kenu mu lunzewe ni mwalwo,

¹³ kati enu mu nzila yiti mwabulile kwinga bakakuyamiziziwa kupitakana matengo amina? Ndele tuhu ngayi ami kaliha naminyepelenga mali a kuliyavwa nawo. Munyatile ha kubula kutenda noho!

¹⁴ Hano naliwahishilakale kwiza na kumi zingula kawuhatu, kaliha nikushinga shamina kukwenu, ngoboni nikushinga enu kaliha ebye muli nabyo. Ndaba kaliha ngayi bana nibo ba ku fwanina kutentekela bahemi, ngoboni bahemi nibo ba ku fwanina kutentekela bana.

¹⁵ Nikawahilila shikuma ngayi niliyavwishe ebye nilinabyo nimwabyo, hamo na nami mwine ndaba ya wumi wenu. Ndi ami ninamihaka shikuma, pe ami nikahakiwa shashishe kukwenu ndi?

¹⁶ Ngoboni hinge ndi ngayi shikenga noho, ami kaliha namipanine wulemezezi, ngoboni, mu kushangama namikwatile na kukeya.

¹⁷ Kati namipombwele na wamina wa bayo natumine kukwenu ndi?

¹⁸ Nalambililile Taitashi ngayi eze kukwenu namutumine hamo na kawushinda wetu umo muli Kilishitu. Kati Taitashi wamipombwele ndi? Kati etu kaliha twendele mu moyo umo ndi? Kati etu kaliha twendele mu zintambo zimo ndi?

¹⁹ Kampe munahanganiki ngayi shikati nimwasho tukuliyawila etu bamwine kukwenu ndi? Byo, tukwamba ngonehe Kilishitu akushinga ngayi twambe ku meho a Nyambi, pe nimwabyo tukutenda, binengi bya kushumisha enu bahoni ba kuhakiwa.

²⁰ Nili na bowa, ngayi kampe oho nikeza nikabula kumiwana ngonehe nikushinga ngayi mwikale, kami ami nikabula ku moneka kukwenu ngonehe mukushinga ngayi nikamoneke. Nili na bowa ngayi kampe kukwikala nkani na ntalu na wukali na kulitapatapa na katungwila na tuyebetelo na kuliyemeza na mushunga.

²¹ Kami nili na bowa ngayi, oho nikeza Nyambi yami ukancepesha mukati kenu, kami ngayi nikekala na wunginga ha babengi batendakale wubi, baya banabulu kutenguluka ku mazilo na ku wunjenge na ku bya lwiholwiho ebye banatende.