2 Kolinte 11 - Libuka Lya Kuyela

Paulu na bantumwana ba mahalo

¹ Nikushinga shikuma ngayi mutweshe kuntatilila shashishe mu wunkutala wami, mwa shikuma muntatilile.

² Ndaba nili na lihungu kukwenu, lihungu lya Wunyambi. Ndaba namibalikishile ku mulume umo, ngonehe kankanga wamuwahe na kuyela mutima ngayi mwinge ba Kilishitu.

³ Ngoboni nikutina, ngayi nehi liyoka lyongezele Eva na ku shoshoka kwendi nahiyo mitima yenu yikayongala ku kulipanika oku kuli muli Kilishitu.

⁴ Ndaba ndi muntu ukeza ukashimikila Yeshu washenge wa kushiya na nou twabulile ku shimikila enu mukamukulupila. Hinga ndi mu kutambula moyo washenge, mu kulishiya na Moyo wa Kuyela mwatambula, enu mu kutambula. Hinga kampe mu kutambula ncango zaziwahe zashenge za kulishiya na nezi mwatambula, enu mwazitambulanga wanguwangu.

⁵ Ndaba nikuhanganika ngayi kaliha nili mukala ku bantumwana ba bakulwane benu.

⁶ Ngoboni hinge nikulavwata mu nyambilo yami, kaliha mu kalimukisho. Tunaholoko mukati kenu mu byuma nimwabyo.

⁷ Nalilimbwilishile amimwine, ngayi enu mukule nashimikilile kwakubula kuyumbisha ncango zaziwahe za Nyambi. Kati ha kutenda nahiyo nabipisha ndi?

⁸ Ha kutambula bya kuyavwa byafumine ku matengo amina nengile ngo ku bayibila ngayi nimitendele milimo.

⁹ Oho nekalile nenu na kubula, kaliha nakatashile muntu. Ndaba ngayi bawushinda bafumine ku Mashendoniya banyavwile byuma nimwabyo nabulile. Ha byuma nimwabyo nalamine ngayi hinga ninga muziho kukwenu, kami nikapitilisha nahiyo.

¹⁰ Nehi kupwisha kwa Kilishitu kuli mumwami, kowa muntu ukandehesha byuma ebye ku kuliyemeza oku mu litunga nimwalyo lya Akaya.

¹¹ Ndaba ngani nikwambila noho? Kati nikubula kumi haka ndi? Kukulimuka Nyambi.

¹² Byuma ebye nikutenda, nikabitenda, ngayi nifumishe mwanya kukwabo bali na kushinga mwanya, aba bakuliyemeza ngayi nabo ba kutenda milimo nehi etu.

¹³ Bantu banoho bantumwana ba mahalo, ngoboni bakamilimo bakwongeza, ba kuliholeka na kulifwekesha nehi bantumwana ba Kilishitu.

¹⁴ Kaliha shuma sha kukomokesha, ndaba hinga Shatana ukulifwekesha niye mwine kwinga ngo lingeloyi lya mwana!

¹⁵ Nohobene kaliha shuma shashinene ndi bakamilimo bendi ba kulifwekesha nehi bakamilimo bakulunga. Ku kukotoka bakatambula kuya na milimo batendele.

Makando a Paulu ha kwinga ntumwana

¹⁶ Nikwamba kami ngayi muntu hinga ahanganika ngayi nili wakuyeba. Ngoboni enu mu kuhanganikila kuyeba, shashiwahe muntambule ngo wakuyeba, ngayi niliyemeze shashishe.

¹⁷ Byuma nikwamba hano, kaliha nibyo akushinga Mwene ngayi nambe, ngoboni nikuliyemeza ngonehe atendanga wakuyeba.

¹⁸ Ndaba ngayi babengi bakuliyemeza na bihanganiko bya wuntu, nikaliyemeza na nami kami.

¹⁹ Enu mukwamba ngayi muli ba kukeya, ngoboni mu kutatilila bibulangana na ku wahilila.

²⁰ Mukulehelela muntu nimwendi kuminga bandungo, hinge muntu ukulya shuma shenu, hinge muntu ukumiyongeza, hinge muntu ukuminyanca, hinge muntu ukumikama ku lupala.

²¹ Nikwamba noho na lisheni ndaba ngayi etu twengile bakakubota. Ngoboni mu shuma eshe nikwamba ngo kankutala, byuma muntu wamina a kuliyemeza nami nikuliyemeza.

²² Kati nibo Bahebelu ndi? Nami kami. Kati nibo Baishalela ndi? Nami kami. Kati nibo mbuto ya Abulahama ndi? Nami kami.

²³ Kati nibo bakakutendela milimo Kilishitu ndi? Nikwamba ngo muntu wakupempela, ngoboni ninapitakana. Natendele milimo kubapitakana, nekalile mu tolongo bikati byabingi, banyandishile bikati byabingi bya kushinga kufwa.

²⁴ Ku Bayunda natambwile mutanu zimpafwa za makumi anaa ha kubula imo.

²⁵ Kahatu Baloma bankamine na muwana. Kamo bantu bampuhile mamanya. Kahatu ha mikala yetu ya ha mema, shishepe shetu shandokamine, shikati shimina nonzelele mu mema mwaana na wushiku.

²⁶ Bikati byabingi mu mikala yami nekalile mu malamo a mema, mu malamo a bezi, mu malamo ku bakamushobo wami Bayunda na byamina bya kufuminina ku Bakamatunga. Nekalile mu malamo mu minzi na mu libelelengwa, malamo mukati ka mawate na mukati ka bawushinda ba mahalo.

²⁷ Natendele milimo ya kukwangisha na kukonkama bikati byabingi. Nekalile na nzala na linyotwa. Nazilile byakulya bikati byabingi nafwile mashika ndaba ya wuvwu.

²⁸ Kuwezelela ku byuma ebye nimwabyo, mutena ha mutena, nikulifulankana bya matengo nimwawo.

²⁹ Yani ukubota? Nanami nikubula kubota. Yani ukupukala? Nanami nikuyena.

³⁰ Ndi niku fwanina kuliyemeza, nikaliyemeza ndaba ya byuma bya wuboto wami.

³¹ Nyambi Tata Mwene wetu Yeshu Kilishitu, ou ukuyemeziwa mwaka nimwawo, ukulimuka ngayi nifwako kwamba mahalo.

³² Oho nekalile ku Ndamashika, kalela mukakwimanina Mwene Aletashi, wakwipikile munzi na mapokola na kushinga kunkwata.

³³ Ngoboni bantu banyakile mu shibondo nafumishiwile ku limpananga ha kembi na kunyenzumuna, pe napanzile.