2 Kolinte 10 - Libuka Lya Kuyela

Paulu ukwimanina mulimo wendi

¹ Amibene Paulu nikumilomba na kulilimbwilisha na kubomba kwa Kilishitu, amibene ou bantu bamina ba kutoya ngayi nekalanga na lisheni ndi nili hamo nenu, ngoboni oho nili kwashenge, nenganga wakukanca kukwenu.

² Nikumilomba ngayi hinga kunkandamika ngayi nikekale na wukali oho nikeza, ndaba mwa shikuma, nikutwesha kwikala na wukali ku bantu baya bakwamba ngayi etu tukuyoya ngonehe batendanga bakalitunga.

³ Ndaba hinge ndi tukuyoya mu kaye, kulwa ngonehe balwanga bakalitunga tufwako.

⁴ Ndaba ebye bilwisho byetu tukuliyavwisha mu nzita, kaliha bya muno mu kaye, ngoboni bya ngovu za Nyambi biya bikuwisha bipata bya ku shuma.

⁵ Tukunongesha nkani za mahalo na kuwishila hanci biya nimwabyo bikulilundumika ngayi bilwishe kalimukisho ka Nyambi. Shihanganiko nimwasho tukushiyaka mu wuntapwa ngayi shombatale Kilishitu.

⁶ Enu mwamonesha kwombatala kwenu nimwako, pe etu tukaliwahishila kushushula mulimo nimwawo wakubula kwoloka.

⁷ Kati enu mu kupenza tuhu ha munkanda wa byuma ndi? Ndi muntu wamina ukulikulupila niye mwine ngayi Mukakilishitu nafwanini kami kuhanganika ngayi nanetu tuli Bakakilishitu ngonehe niye.

⁸ Ndaba hinge ndi nikaliyemeza shikuma ha byuma byamina ndaba ya ngovu zetu, eze atupanine Nyambi za kumi kulisha kaliha za kuminongesha, kukekala na lisheni nifwako.

⁹ Kaliha ngayi niku moneka ngo nikushinga kumitinisha na mañwati.

¹⁰ Ndaba bamo bakwamba ngayi, “Mazu amu mañwati a Paulu amalemu kami ali na ngovu, ngoboni ndi tuli nendi, wamonekanga kupopa kami mazu wendi kaliha ayuvwanikanga shiwahe!”

¹¹ Bantu banoho banafwanini ku yuvwishisha ngayi kowa kutapuluka hakati ka mazu twatikitanga mu mañwati nanebye twatendanga ndi tulihamo nanenu.

¹² Etu kaliha tukushinga kulyezeka hamo, hinge kulifwanikiza na baya ba kulilundumika shikuma nibo bamwine. Bakuyeba ndaba ba kulifwanikiza nibo bamwine na bipimisho byabo, kami ba kuliyata nibo bamwine na bipimisho byabo.

¹³ Ngoboni etu kaliha tukaliyemeza kupitakana haya tunafwanini kukumina. Etu tukaliyemeza kwezekesha na milimo anatuyaka Nyambi, milimo eye tukutenda mukati kenu.

¹⁴ Ndaba tufwako kulinenehesha etu bamwine ngo ngayi kaliha twezile kukwenu. Etu twatatikile kwiza kukwenu na ku shimikila ncango zaziwahe za Kilishitu.

¹⁵ Etu kaliha tukuliyemeza kupitakana haya tunafwanini kukumina, ngayi tuliyemezele mu milimo ya bantu bamina, ngoboni tukulumbeza ngayi kukulupila kwenu kukule, pe mwanga tukatweshe kutenda milimo yayinene mukati kenu, kwezekesha ngonehe anatuyaka Nyambi,

¹⁶ ngayi mwanga tu kashimikile ncango zaziwahe mu matunga amina kami, kaliha kuliyemeza na mulimo unatendiwi mwaka mu mfuba ya minobe.

¹⁷ Ngonehe kwatikitiwa ngayi, “Niye ukuliyemeza, aliyemeze muli Mwene.”

¹⁸ Ndaba uya ukulilundumika niye mwine kaliha ukatambuliwa, ngoboni kukatambuliwa uya Mwene akwimanina.