Biblia Todo Logo
Bìoball air-loidhne

- Sanasan -

2 Byambo 9 - Libuka Lya Kuyela


Kuzingula kwa mwene wa mbuyama waku Shemba
( 1 Bamyene 10:1-13 )

1 Mwene wa mbuyama waku Shemba wayile ku Yelushalema oho ayuvwile mpupo ya Mwene Sholomoni, pe wakamwezekele kumwipula mayipu amakalu. Wayile na litanga lya bantu babengi hamo na makamela, awa ashimbile lukumba na mamanya amawahe shikuma a kulelema na ngolinde yayingi. Oho akumine kuli Sholomoni, pe wamwipwile mayipu ekalile nawo mu mutima wendi nimwawo.

2 Sholomoni wakumbwile mayipu nimwawo, kowa shuma akwangile kutontolola.

3 Oho Mwene wa mbuyama waku Shemba amonene ngana za Sholomoni na musheke ou atendele.

4 Wamonene byakulya biya byatuliwile ku tebulu yendi na noku balalanga babilolo bendi. Wamonene kami mu shinzanza na ngwahishilo ya byamanga bendi ba ku musheke wendi na bikobelo bya bakamilimo bendi aba bamutwalililenga byakulya ku mayambwayambwa. Wamonene kami zinkombela eze za kuhokesha akombelelenga mu Litala lya Nyambi ya Ngula. Wayahamine mu kanwa yahaa na kulikomokela.

5 Mwene wa mbuyama wambile kuli Mwene ngayi, “Ebye na yuvwile oho nishili mu litunga lyami bya hahobe nabya ngana zobe binengi bya kupwisha.

6 Kaliha na kulupilile ebye bantongwezelenga bantu ndele aha nezi na kulimonena amimwine. Kaliha nayuvwile hinge shitika sha ngana zobe. Unengi wakukeya shikuma kupitakana eshe bambilenga bantu.

7 Bantu bobe eshe batandala. Bakamilimo bobe eshe batandala, aba bonzela kwikala ku meho wobe, banatandala kuyuvwa zincimpi za ngana zobe.

8 Kuyemeziwe Nyambi ya Ngula, Nyambi yobe. Unakuwahilili ha kukwinga mwene wakulela mu lizina lyendi. Ndaba wahaka bantu bendi Ishalela na kushinga ku bakoweza mwaya myaka, unakwingi mwene yabo ngayi ukoweze ndayano na kulela shiwahe.”

9 Niho Mwene wa mbuyama apanine Mwene Sholomoni zintupu eze ezile nazo za ngolinde za kukuma ha makilongilamu 4,000 na wingi wawunene wa lukumba na mamanya amawahe shikuma a kulelema. Hinga kwatanga kuletiwa kuli Mwene Sholomoni lukumba lwa lu wahe ngonehe olwo aletele mwene wa mbuyama waku Shemba.

10 Bantu ba Mwene Hilamu nanaba ba Mwene Sholomoni baya baletelenga ngolinde yaku Ofwila baletele kami bitondo bya yunipa na mamanya amawahe shikuma a kulelema.

11 Mwene Sholomoni watendeshele biya bitondo bya yunipa tukandamisho twa ku Litala lya Nyambi ya Ngula na twa ku musheke wendi na kubazaho tumbuli na tumbuli twatushe twa bangomba. Hinga kwatanga ku moneka bya kulifweka na biya mu litunga lya Yunda.

12 Mwene Sholomoni wapanikile mwene wa mbuyama waku Shemba byuma nimwabyo anyepele, kupitakana ntupu eye amuletelele. Niho mwene wa mbuyama na bantu bendi babokele ku litunga lya Sheba.


Wuheti wa Mwene Sholomoni
( 1 Bamyene 10:14-25 )

13 Mwene Sholomoni watambwilenga ngolinde ya wulemu wa makilongilamu 23,000 ha mwaka ha mwaka.

14 Kubula kufungila ku mutelo batelelenga bakakuheheza na bakamikwebo. Bamyene ba ku Alembiya na batulela bamu biketu bya Ishalela kami baletelenga kukwendi shiliva na ngolinde kuli Sholomoni.

15 Sholomoni wabazishile makebo amanene myanda yibili, kami likebo na likebo lyafwikiwile na wulemu wa makilongilamu mutanu na abili a ngolinde.

16 Wabazishile kami makebo amashe myanda yihatu, nimwawo afwikiwile na wulemu wa makilongilamu ahatu a ngolinde likebo na likebo, makebo awa nimwawo ayakiwile mukati ka Litala lyatumbiwile ngayi Lishaka lya Lembanoni.

17 Mwene wabazishile kami Litanda lyalinene. Mbalila yalyo yafwikiwile na mayewe a banzovu, pe oku kwashalilile kwafwikiwile na ngolinde yayiwahe.

18 Litanda lyekalile na tukandamisho mutanu na kamo twa kukandamina, kami kwekalile shipona sha kulyatanga mawulu kumbili yalyo shafwikiwile na ngolinde. Ku mbalila na mbalila ya litanda kwekalile maleenge akukambika maboko, pe shifwekesha sha shimbwi shemanine ku nkumo na nkumo.

19 Bifwekesha bya babimbwi likumi na babili byekalile ha tukandamisho, shimo ku nkumo ya kakandamisho na kakandamisho. Hinga kwatanga shilolo kwikale litanda lya kufweka ngonehe elye mu wene wuti hinge wuti wamina.

20 Zinkomoki nimwazo anwishilenga Mwene Sholomoni zatendiwile ha ngolinde na byuma nimwabyo bya kukwatila mu Litala lya mukati lya tumbiwile ngayi Lishaka lya Lembanoni, byengile bya ngolinde ya yiwahe. Mu matena a Sholomoni shiliva kaliha yahanganikiwile ku wulemu.

21 Kami Sholomoni wekalile na muhoko wa mato amanene aya avuwiwilenga na muhoko wa mato amanene a Mwene Hilamu ayile ku Tashishi. Oho kwapitakale myaka yihatu muhoko wa mato wendi wabokelenga na ngolinde na shiliva na mayewe a banzovu na bampuya.

22 Mwene Sholomoni wengile wakuheta shikuma na kukeya shikuma kupitakana bamyene bamina bamu kaye.

23 Bamyene nimwabo bezilenga kuli Sholomoni, mu kuyuvwa ngana ziya amupanikile Nyambi.

24 Bantu nimwabo bezilenga kukwendi, baletelelenga Sholomoni zintupu na byuma bya shiliva na bya ngolinde na bivwalo na bilwisho na lukumba na bambishi na mambema. Eshe shatendiwilenga ha mwaka ha mwaka.

25 Mwene Sholomoni wekalile na milaka 4,000 bya makoloyi na bambishi baha munzi. Kami wekalile na bambishi 12,000 kwinga bya nzita, bamo wabatentekele mu Yelushalema, pe wingi wabo wabayakile mu minzi yayingi yamina.

26 Kami wengile kalela ha bamyene nimwabo mu litunga ku balika ku mushinzi wa Yufuleti kutwala ku Fwilishitina naku nginza ya Engepita.

27 Ha shikati sha kulela kwendi, shiliva yengile yayingi mu Yelushalema ngonehe mamanya owa na mitondo bya Shinda byahanyine ngonehe mitondo ya shikoomo yamu Shepula.

28 Sholomoni walandilenga bambishi ba ku Engepita naku matunga nimwawo amina.


Kuhatulula kwa kulela kwa Sholomoni
( 1 Bamyene 11:41-43 )

29 Wingi wa byambo bya Sholomoni ku kutatika na ku mabalikilo kutwala naku nkumo byatikitiwile mu byambo bya likota lya muluwe wa Nyambi Natani namukulubulula kwa Ahiya wamu Shilo namu bimonekesho bya muluwe Indo. Ebi kami bikutontolola kulela kwa Mwene Yelombowami mwana Nembati wamu Ishalela.

30 Sholomoni walelele mu Yelushalema na ha Ishalela nimwaho myaka makumi anaa.

31 Sholomoni wafwile pe wafundiwile mu Lukena lwa Ndavita mu Yelushalema, pe mwanendi wa mulume Lehombowami wamushwanine kwinga mwene.

Libuka Lya Kuyela © Bible Society of Zambia, 2020.

Bible Society of Zambia
Lean sinn:



Sanasan