2 Byambo 8 - Libuka Lya Kuyela

Kutwesha kwa Sholomoni

¹ Sholomoni washimbile myaka makumi abili ha kuzika Litala lya Nyambi ya Ngula na musheke wendi.

² Sholomoni watendulwile minzi iya amupanikile mwene Hilamu, pe wetabilishile Baishalela kuzikamo.

³ Sholomoni wapukwile Litunga lya Hamati Zomba,

⁴ pe wazingwilishile shipata ku munzi wa Tandimoli mu libelelengwa. Watendulwile minzi mu Hamati iya yengile ya kulongela byuma.

⁵ Sholomoni kami watendulwile minzi yamina yengile munzi wa Mbeti Holoni waha Shinkanda na Mbeti Holoni waku Mukulo. Minzi eye bazingwilishileko bipata na kuyaka mapangati aya atweshele kupatiwa.

⁶ Sholomoni watendulwile kami munzi wa Mbaalati na minzi nimwayo oku akongelelenga byuma na minzi oku kwekalilenga bambishi na makoloyi. Wamanishile bifungo byendi nimwabyo bya kuzika mu Yelushalema namu Lembanoni namu litunga nimwalyo muya alelelenga.

⁷ Sholomoni wayakile bazukulya bantu Bakenaani, aba babulile kuzihiwa ku Baishalela oho bakomene litunga, ku milimo ya likungubule. Bantu aba bengile Bahita na Baamoli na Bapelizi na Bahivi na Bayembushi,

⁸ aba bazukulyabo bashili kwinga bandungo kukuma naku shikati shino.

⁹ Ngoboni Sholomoni kaliha watendeshele Baishalela ku mulimo walikungubule. Niho batendelenga kwinga bakanzita na babilolo bakakwendesha bakanzita na bakulwane ba makoloyi na bakakukandama ha bambishi.

¹⁰ Kwekalile babilolo ba bakulwane ba mwene Sholomoni 250 bamonenenga bantu aba batendelenga milimo ya kulitapulula ya likungubule ya kuzika.

¹¹ Sholomoni watuntwile mukazendi, mwana mwene waku Engepita ku Lukena lwa Ndavita na kumuleta ku litala elye amuzikilile. Wambile ngayi, “Kaliha wafwanina kwikala mu musheke wa Mwene Ndavita wa Ishalela, ndaba mwanya nimwawo wekalile Likwati lya Kulimama lya Nyambi ya Ngula wa kuyela.”

¹² Sholomoni watupwile nkombela kuli Nyambi ya Ngula ha kaala eshe azikile kumbili ya Litala lya Nyambi.

¹³ Sholomoni wakombelelele kuli Nyambi ya Ngula ngonehe byashingiwile kufundiziza kwa Moshesha ha matena ashizila. Niwo engile matena aku katala na bimbo bya Ntelamo za Ngonda Wamupya na bimbo bihatu bya ha mwaka ha mwaka, Shimbo sha Mankende A kubula Mumena na Shimbo Sha kuteza Mbuto na Shimbo sha Minkungwa.

¹⁴ Ha kukonka ndayano eze ayakile tatiyendi Ndavita, wawahishile milimo yaha mutena ha mutena ya bakankombela na neye ya Balevi aba bayavwilenga bakankombela, mukwimbila nyimbo na kutenda mulimo wabo. Wawahishile kami bakakulama mu Litala lya Nyambi namu zimbalila za kutendela mulimo waha mutena ha mutena ku lipangati na lipangati, kuya ngo mu ndayano za Ndavita, muntu wa Nyambi.

¹⁵ Batendele ngo kufundiziza okwe afundizizile Ndavita ku bakankombela na Balevi ha bishete na ha byambo byamina byatendiwile shiwahewahe.

¹⁶ Milimo nimwayo yayinene ya Sholomoni, ku balika ku kuyala mwimbi wa Litala lya Nyambi ya Ngula kukuma na kukumana kwalyo, milimo nimwayo yatweshekele.

¹⁷ Niho Sholomoni ayile ku Eziyoni Ngemba na Elati ku shibumbo sha Likobo lya Akaba, mu Litunga lya Endoma.

¹⁸ Mwene Hilamu wamutumininine mato bendeshelenga babilolo bendi na bantu benzilila kuvuwa. Bavuwile na babilolo ba Sholomoni na kuya ku litunga lya Ofwila pe baletelele Sholomoni ngolinde ya wulemu wakupitakana makilongilamu 15,000.